മുംബൈ: മുംബൈ കോർപ്പറേഷൻ (ബിഎംസി) തെരഞ്ഞെടുപ്പിൽ ബിജെപി നയിക്കുന്ന മഹായുതി സഖ്യം വൻ വിജയം നേടിയതോടെ, ഉദ്ധവ് താക്കറെയെ കടന്നാക്രമിച്ച് നടി കങ്കണ റണാവത്ത് (Kangana Ranaut). തന്റെ വീട് പൊളിച്ചവർക്കും അധിക്ഷേപിച്ചവർക്കും മഹാരാഷ്ട്രയിലെ ജനങ്ങൾ വോട്ടിലൂടെ കൃത്യമായ മറുപടി നൽകിയെന്ന് കങ്കണ പറഞ്ഞു. 28 വർഷത്തെ ശിവസേനയുടെ ആധിപത്യം അവസാനിപ്പിച്ചുകൊണ്ടാണ് മുംബൈ നഗരസഭയുടെ ഭരണം ബിജെപി സഖ്യം പിടിച്ചെടുത്തത്.
"എന്നെ അധിക്ഷേപിച്ചവരെയും എന്റെ വീട് തകർത്തവരെയും മഹാരാഷ്ട്രയിലെ ജനങ്ങൾ ഇന്ന് കൈവിട്ടിരിക്കുന്നു. സ്ത്രീവിരുദ്ധർക്കും സ്വജനപക്ഷപാത മാഫിയകൾക്കും ജനം പുറത്തേക്കുള്ള വഴി കാണിച്ചതിൽ അതിയായ സന്തോഷമുണ്ട്," കങ്കണ പ്രതികരിച്ചു. 2020-ൽ മഹാരാഷ്ട്രയിൽ ഉദ്ധവ് താക്കറെ സർക്കാർ അധികാരത്തിലിരിക്കെ, കങ്കണയുടെ ഉടമസ്ഥതയിലുള്ള ഓഫീസിന്റെ ഒരു ഭാഗം ബിഎംസി പൊളിച്ചുനീക്കിയത് വലിയ വിവാദമായിരുന്നു. അന്ന് "ഇന്ന് എന്റെ വീട് തകർന്നു, നാളെ നിന്റെ അഹങ്കാരം തകരും" എന്ന് ഉദ്ധവിനെതിരെ കങ്കണ നടത്തിയ വെല്ലുവിളിയും ഇപ്പോൾ സോഷ്യൽ മീഡിയയിൽ വീണ്ടും ചർച്ചയാകുന്നുണ്ട്.
മുംബൈയിലെ 227 സീറ്റുകളിൽ ബിജെപി 89 സീറ്റുകൾ നേടി ഏറ്റവും വലിയ ഒറ്റകക്ഷിയായി. സഖ്യകക്ഷിയായ ഏകനാഥ് ഷിൻഡെ വിഭാഗം ശിവസേന 29 സീറ്റുകൾ നേടി. ഇതോടെ 118 സീറ്റുകളുമായി മഹായുതി സഖ്യം ഭൂരിപക്ഷം ഉറപ്പിച്ചു (ഭരിക്കാൻ 114 സീറ്റുകൾ വേണം). ഉദ്ധവ് താക്കറെയുടെ നേതൃത്വത്തിലുള്ള ശിവസേന (UBT) 65 സീറ്റുകൾ നേടി കടുത്ത പോരാട്ടം കാഴ്ചവെച്ചെങ്കിലും ഭരണം നിലനിർത്താനായില്ല. പ്രധാനമന്ത്രി നരേന്ദ്ര മോദി, മുഖ്യമന്ത്രി ദേവേന്ദ്ര ഫഡ്നാവിസ് എന്നിവരെ കങ്കണ വിജയത്തിൽ അഭിനന്ദിച്ചു.
Actor and BJP MP Kangana Ranaut expressed immense joy over the BJP-led Mahayuti alliance's victory in the 2026 BMC elections, calling it a moment of "justice." Recalling the 2020 demolition of her property by the then-Uddhav Thackeray administration, she remarked that those who targeted her have been rejected by the people. The BJP emerged as the single largest party with 89 seats, ending the nearly three-decade dominance of the Thackeray family over India's richest civic body.