ഒരു ജോലിക്ക് അപേക്ഷിച്ചാൽ മറുപടിക്കായി എത്ര കാലം കാത്തിരിക്കേണ്ടി വരും? ദിവസങ്ങളോ മാസങ്ങളോ? എന്നാൽ ഒരു മാർക്കറ്റിംഗ് എക്സിക്യൂട്ടീവിന് ലഭിച്ച മറുപടി ഏതാണ്ട് ഒരു വർഷത്തിന് ശേഷമാണ്. സോഷ്യൽ മീഡിയ പ്ലാറ്റ്ഫോമായ റെഡ്ഡിറ്റിലൂടെ പങ്കുവെച്ച ഈ അനുഭവം ഇപ്പോൾ വൈറലായിരിക്കുകയാണ്. (Job Rejection Email After One Year)
കഴിഞ്ഞ വർഷം ഒരു മിഡ്-ലെവൽ മാർക്കറ്റിംഗ് കോർഡിനേറ്റർ തസ്തികയിലേക്കാണ് യുവാവ് അപേക്ഷ നൽകിയത്. കൃത്യമായ റെസ്യൂമെയും കവർ ലെറ്ററും നൽകിയിട്ടും കമ്പനിയുടെ ഭാഗത്തുനിന്ന് യാതൊരു പ്രതികരണവും ഉണ്ടായിരുന്നില്ല. കമ്പനി തന്നെ അവഗണിച്ചു എന്ന് കരുതിയ യുവാവ് പിന്നീട് മറ്റൊരു നഗരത്തിലേക്ക് മാറുകയും പുതിയ ജോലിയിൽ പ്രവേശിക്കുകയും ചെയ്തു. എന്നാൽ 11 മാസങ്ങൾക്ക് ശേഷം അപ്രതീക്ഷിതമായാണ് പഴയ കമ്പനിയുടെ ഇമെയിൽ എത്തിയത്.
Got a rejection email today for a job I applied to in May 2024
by
u/C0smicFable in
recruitinghell
തങ്ങളുടെ ആവശ്യങ്ങൾക്ക് അനുയോജ്യമായ മറ്റ് ഉദ്യോഗാർത്ഥികളെ കണ്ടെത്തിയെന്നും നിങ്ങളുടെ ഭാവി തിരച്ചിലുകൾക്ക് എല്ലാവിധ ആശംസകളും നേരുന്നു എന്നുമായിരുന്നു ഇമെയിലിലെ ഉള്ളടക്കം. എന്നാൽ മാസങ്ങൾക്ക് മുൻപേ തന്റെ ജോലി തിരച്ചിൽ അവസാനിച്ചുവെന്ന് യുവാവ് പരിഹാസത്തോടെ കുറിച്ചു. ഭാവിയിലെ അവസരങ്ങൾക്കായി നിങ്ങളുടെ വിവരങ്ങൾ സൂക്ഷിക്കുമെന്ന കമ്പനിയുടെ വാഗ്ദാനത്തെയും അദ്ദേഹം പരിഹസിക്കുന്നുണ്ട്.
സോഷ്യൽ മീഡിയയിൽ ഈ പോസ്റ്റ് വൈറലായതോടെ സമാനമായ അനുഭവങ്ങൾ പങ്കുവെച്ച് നിരവധി പേർ രംഗത്തെത്തി. 2011-ൽ അപേക്ഷിച്ച ജോലിക്ക് 2017-ൽ മറുപടി ലഭിച്ചതായും, ഒന്നര വർഷത്തിന് ശേഷം വന്ന ഇന്റർവ്യൂ ക്ഷണം കണ്ടപ്പോഴേക്കും ആ കമ്പനി തന്നെ പൂട്ടിയതായും ചിലർ കമന്റ് ചെയ്തു. മിക്ക കമ്പനികളിലെയും റിക്രൂട്ട്മെന്റ് സംവിധാനങ്ങൾ എത്രത്തോളം തകരാറിലാണെന്നാണ് ഇത് സൂചിപ്പിക്കുന്നതെന്ന് ഉപഭോക്താക്കൾ അഭിപ്രായപ്പെടുന്നു.
