ന്യൂഡൽഹി : ഇന്ത്യക്കെതിരെ കടുത്ത വ്യാപാര സമ്മർദ്ദവുമായി അമേരിക്കൻ പ്രസിഡന്റ് ഡൊണാൾഡ് ട്രംപ് വീണ്ടും രംഗത്ത്. അമേരിക്കയുടെ വ്യാപാര-ഊർജ്ജ താൽപ്പര്യങ്ങളോട് സഹകരിച്ചില്ലെങ്കിൽ ഇന്ത്യൻ ഉൽപ്പന്നങ്ങൾക്ക് മേൽ അതിവേഗം അധിക നികുതി ചുമത്തുമെന്നാണ് ട്രംപിന്റെ മുന്നറിയിപ്പ്. റഷ്യയിൽ നിന്നുള്ള ഇന്ത്യയുടെ എണ്ണ ഇറക്കുമതിയിലാണ് ട്രംപ് പ്രധാനമായും അതൃപ്തി രേഖപ്പെടുത്തിയിരിക്കുന്നത്.(It's important to make me happy, Trump again threatens tariffs against India)
പ്രധാനമന്ത്രി നരേന്ദ്ര മോദിയുമായുള്ള വ്യക്തിപരമായ സൗഹൃദത്തെ പ്രശംസിക്കുമ്പോഴും വ്യാപാര കാര്യങ്ങളിൽ ട്രംപ് കടുത്ത നിലപാടാണ് സ്വീകരിച്ചത്. "മോദി വളരെ നല്ല മനുഷ്യനാണ്, അദ്ദേഹം എന്റെ സുഹൃത്താണ്. പക്ഷേ വ്യാപാര കാര്യങ്ങളിൽ ഇന്ത്യയുടെ നിലപാടുകളിൽ ഞാൻ സന്തോഷവാനല്ല. എന്നെ സന്തോഷിപ്പിക്കേണ്ടത് പ്രധാനമാണെന്ന് അദ്ദേഹത്തിനറിയാം. ഇന്ത്യയുടെ മേൽ അതിവേഗം നികുതി വർദ്ധിപ്പിക്കാൻ ഞങ്ങൾക്ക് കഴിയും, അത് അവർക്ക് വലിയ തിരിച്ചടിയാകും."
അമേരിക്കൻ സമ്മർദ്ദം ശക്തമായതോടെ, റഷ്യയിൽ നിന്നും അമേരിക്കയിൽ നിന്നും വാങ്ങുന്ന എണ്ണയുടെ കൃത്യമായ വിവരങ്ങൾ ശേഖരിക്കാൻ കേന്ദ്ര സർക്കാർ തീരുമാനിച്ചു. ജനുവരി രണ്ട് മുതൽ ആഴ്ച തിരിച്ചുള്ള കണക്കുകൾ സമർപ്പിക്കാൻ എണ്ണ ശുദ്ധീകരണശാലകൾക്ക് നിർദ്ദേശം നൽകി. അമേരിക്ക വിവരങ്ങൾ ആവശ്യപ്പെടുമ്പോൾ കൃത്യമായ കണക്കുകൾ നൽകുന്നതിനും മറ്റ് സ്രോതസ്സുകളിൽ നിന്നുള്ള തെറ്റായ പ്രചാരണങ്ങൾ ഒഴിവാക്കാനുമാണ് ഈ നീക്കം.