ശ്രീഹരിക്കോട്ട: ഐഎസ്ആർഒയുടെ കരുത്തുറ്റ വിക്ഷേപണ വാഹനമായ എൽവിഎം-3 (ലോഞ്ച് വെഹിക്കിൾ മാർക്ക്-3) വീണ്ടും വിജയഗാഥ രചിച്ചു. ബുധനാഴ്ച രാവിലെ 8.24-ന് ശ്രീഹരിക്കോട്ടയിലെ സതീഷ് ധവാൻ സ്പേസ് സെന്ററിൽ നിന്നായിരുന്നു വിക്ഷേപണം. യുഎസ് കമ്പനിയായ എഎസ്ടി സ്പേസ് മൊബൈലിന്റെ ബ്ലൂബേർഡ്-6 (BlueBird-6) എന്ന ആശയവിനിമയ ഉപഗ്രഹത്തെയാണ് റോക്കറ്റ് ലക്ഷ്യസ്ഥാനത്ത് എത്തിച്ചത്.(ISRO BlueBird Block-2, India's Heaviest Communication Satellite, Lifts Off on 'Bahubali' Rocket)
ടെലികോം ടവറുകളുടെയോ കേബിളുകളുടെയോ സഹായമില്ലാതെ സാധാരണ സ്മാർട്ട്ഫോണുകളിലേക്ക് നേരിട്ട് ബ്രോഡ്ബാൻഡ് സേവനം എത്തിക്കുക എന്നതാണ് ഈ ദൗത്യത്തിന്റെ ലക്ഷ്യം. ഇന്ത്യയിൽ നിന്ന് ഇതുവരെ വിക്ഷേപിച്ചിട്ടുള്ളതിൽ വെച്ച് ഏറ്റവും ഭാരമേറിയ ഉപഗ്രഹമാണ് 6.5 ടൺ വരുന്ന ബ്ലൂബേർഡ്-6.
43.5 മീറ്റർ ഉയരവും 640 ടൺ ഭാരവുമുള്ള ഈ റോക്കറ്റിന്റെ എട്ടാമത്തെ വിജയകരമായ വിക്ഷേപണമാണിത്. വെറും 16 മിനിറ്റുകൊണ്ട് ഉപഗ്രഹത്തെ ഭൂമിയിൽ നിന്ന് 520 കിലോമീറ്റർ അകലെയുള്ള ഭ്രമണപഥത്തിൽ എത്തിക്കാൻ റോക്കറ്റിനായി. ഖര, ദ്രവ, ക്രയോജനിക് ഇന്ധനങ്ങൾ ഉപയോഗിക്കുന്ന മൂന്ന് ഘട്ടങ്ങളുള്ള റോക്കറ്റാണ് ഐഎസ്ആർഒയുടെ 'ബാഹുബലി'. ഐഎസ്ആർഒയുടെ വാണിജ്യ വിഭാഗമായ ന്യൂ സ്പേസ് ഇന്ത്യ ലിമിറ്റഡും (NSIL) എഎസ്ടി സ്പേസ് മൊബൈലും തമ്മിലുള്ള കരാർ പ്രകാരമാണ് ഈ വിക്ഷേപണം നടന്നത്.