നിങ്ങൾക്ക് ട്രെയിന്‍ ടിക്കറ്റ് ബുക്ക് ചെയ്തശേഷം യാത്ര മുടങ്ങിയിട്ടുണ്ടോ? ടിക്കറ്റ് ബുക്ക് ചെയ്തശേഷം യാത്ര ചെയ്യാനായില്ലെങ്കിൽ 'ഇനിയെന്ത് ചെയ്യണം' എന്നറിയാതെ വിഷമിക്കുന്നവരും ഉണ്ട്. എന്നാലിനി വിഷമിക്കേണ്ട, അത്തരത്തിലുള്ള പ്രതിസന്ധി ഇനി യാത്രക്കാർ അനുഭവിക്കേണ്ടി വരില്ല. അതിനുള്ള പ്രതിവിധിയുമായി എത്തിയിരിക്കുകയാണ് നമ്മുടെ സ്വന്തം ഇന്ത്യന്‍ റെയില്‍വേ.
ഇന്ത്യന്‍ റെയില്‍വേയില്‍ പലപ്പോഴും ആളുകൾ യാത്രാടിക്കറ്റുകള്‍ മുന്‍കൂട്ടി ബുക്ക് ചെയ്യാറുണ്ട്. എന്നാല്‍, അപ്രതീക്ഷിതമായ കാരണങ്ങളാൽ യാത്രകള്‍ മുടങ്ങാറുണ്ട്. ചിലപ്പോള്‍ മറ്റൊരു ദിവസത്തേക്ക് യാത്ര മാറ്റേണ്ടിയും വരാം. അങ്ങനെ വരുമ്പോൾ ബുക്ക് ചെയ്ത ടിക്കറ്റ് എന്ത് ചെയ്യും? ട്രെയിന്‍ ടിക്കറ്റ് മറ്റൊരാളുടെ പേരിലേക്ക് മാറ്റാനാകുമോ? ടിക്കറ്റിൽ തീയതി മാറ്റാന്‍ പറ്റുമോ? പറ്റും. പേരും തീയതിയും മാറ്റാം.
എന്നാല്‍, അത്തരത്തിലുള്ള പ്രതിസന്ധികൾ ഇനി ഉണ്ടാവില്ല. ഒരു പ്രത്യേക വ്യവസ്ഥ ഇനി മുതല്‍ ഇന്ത്യന്‍ റെയില്‍വേയിലുണ്ട്. ബുക്ക് ചെയ്ത ടിക്കറ്റിലെ പേര് മാറ്റാന്‍ കഴിയും. അതിനായി ചില നിബന്ധനകള്‍ പാലിക്കേണ്ടതുണ്ട്. അടുത്ത കുടുംബാംഗങ്ങള്‍ക്ക് മാത്രമാണ് ഇത്തരത്തില്‍ ടിക്കറ്റ് കൈമാറാനാകുക. കൃത്യസമയത്ത് അതേ റെയില്‍വേ കൗണ്ടറില്‍ നിന്ന് തന്നെ ചെയ്യേണ്ടതും അനിവാര്യമാണ്. അല്ലാത്തപക്ഷം ടിക്കറ്റ് കൈമാറാനാകില്ല. കാരണം, ഈ പ്രക്രിയ ഓണ്‍ലൈനായി നടത്താന്‍ കഴിയില്ല.
നിയമപ്രകാരം, യാത്രയ്ക്ക് ഒരു മണിക്കൂര്‍ മുമ്പെങ്കിലും പേര് മാറ്റാനുള്ള അഭ്യര്‍ഥന നടത്തിയിരിക്കണം. ഒരു ടിക്കറ്റില്‍ ഒരിക്കല്‍ മാത്രമേ പേര് മാറ്റാന്‍ പറ്റുകയുള്ളൂ. ഈ നിബന്ധനങ്ങള്‍ പാലിച്ച് കുടുംബാംഗങ്ങള്‍ക്ക് അവരുടെ സ്ഥാനത്ത് യാത്ര ചെയ്യാം. എന്നാൽ, ടിക്കറ്റ് വെയിറ്റിങ് ലിസ്റ്റിലോ ആര്‍എസി സ്റ്റാറ്റസിലോ ആണെങ്കില്‍ പേര് മാറ്റാന്‍ കഴിയില്ല.
ടിക്കറ്റിലെ പേര് മാറ്റത്തിന് ആവശ്യമായ രേഖകള്‍
ടിക്കറ്റ് ഓണ്‍ലൈനായോ ഓഫ്‌ലൈനായോ ബുക്ക് ചെയ്തിട്ടുണ്ടെങ്കിലും പേര് മാറ്റണമെന്നുണ്ടെങ്കില്‍ യാത്രക്കാരന്‍ റെയില്‍വേ റിസര്‍വേഷന്‍ കൗണ്ടറില്‍ അപേക്ഷ നൽകണം. പുതിയ യാത്രക്കാരനെ ചേര്‍ക്കുന്നതിനായി പേര് മാറ്റുന്നതിനുള്ള അപേക്ഷാ ഫോം പൂരിപ്പിച്ച് നൽകുമ്പോൾ ഒപ്പം കൗണ്ടറില്‍ ടിക്കറ്റിന്റെ പ്രിന്റൗട്ട് കൂടി നൽകണം.
യാത്ര മുടങ്ങിപ്പോയ ആളിന്റെയും പുതിയ യാത്രക്കാരന്റെയും ഫോട്ടോയോടുകൂടിയ ആധാര്‍ കാര്‍ഡ്, പാന്‍ കാര്‍ഡ് അല്ലെങ്കില്‍ വോട്ടര്‍ ഐഡി പോലുള്ള തിരിച്ചറിയല്‍ രേഖകളും സമര്‍പ്പിക്കണം.
ട്രെയിന്‍ ടിക്കറ്റിലേ തീയതി മാറ്റാൻ
ടിക്കറ്റുകളിലെ യാത്ര ചെയ്യുന്ന തീയതിയും മാറ്റാന്‍ കഴിയും. ഓണ്‍ലൈന്‍ ടിക്കറ്റുകള്‍ക്ക് ഇത് സാധ്യമല്ല. ട്രെയിന്‍ പുറപ്പെടുന്നതിന് 48 മണിക്കൂർ മുമ്പ് റിസര്‍വേഷന്‍ കൗണ്ടറില്‍ എത്തിയാല്‍ മാത്രമേ തീയതി മാറ്റാനാകൂ. ഒറിജിനല്‍ ടിക്കറ്റും ഒപ്പം തീയതി മാറ്റാനുള്ള അപേക്ഷയും നല്‍കണം. കൂടെ യാത്ര ചെയ്യാൻ ഉദ്ദേശിക്കുന്ന പുതിയ തീയതിയും നല്‍കുക. ഇത്രയും ക്രമീകരണങ്ങള്‍ നടത്തിയാല്‍ പുതിയ തീയതിയിലുള്ള ടിക്കറ്റ് ലഭിക്കും. ആര്‍ എ സി ടിക്കറ്റുകള്‍ക്കോ സ്ഥിരീകരിച്ച ടിക്കറ്റുകള്‍ക്കോ മാത്രമേ തീയതി മാറ്റാന്‍ സാധിക്കൂ.