ബെംഗളൂരു: കൊഗിലു ലേഔട്ടിൽ വർഷങ്ങളായി താമസിച്ചുവരുന്ന ദരിദ്ര കുടുംബങ്ങളെ മുൻകൂട്ടി നോട്ടീസ് നൽകാതെ കുടിയിറക്കിയ സർക്കാർ നടപടി അങ്ങേയറ്റം മനുഷ്യത്വവിരുദ്ധമാണെന്ന് സി.പി.എം കർണാടക സംസ്ഥാന കമ്മിറ്റി പ്രസ്താവനയിൽ പറഞ്ഞു. മുപ്പത് വർഷത്തിലേറെയായി താമസിക്കുന്നവരെ പെട്ടെന്ന് ഒഴിപ്പിക്കുന്നതിന് പിന്നിൽ ഗൂഢലക്ഷ്യങ്ങളുണ്ടെന്ന് സി.പി.എം സംസ്ഥാന സെക്രട്ടറി ഡോ. കെ. പ്രകാശ് ആരോപിച്ചു.(Inhumane, CPM against the bulldozer action in Karnataka and visits the place)
സി.പി.എം സംസ്ഥാന സെക്രട്ടേറിയറ്റ് അംഗം ഗോപാലകൃഷ്ണ ഹരളഹള്ളി, ബെംഗളൂരു നോർത്ത് ജില്ലാ സെക്രട്ടറി ഹുള്ളി ഉമേഷ് എന്നിവരുടെ നേതൃത്വത്തിലുള്ള സംഘം സംഭവസ്ഥലം സന്ദർശിച്ച് ഇരകളെ ആശ്വസിപ്പിച്ചു. വീട് നഷ്ടപ്പെട്ട കുടുംബങ്ങൾ ഭക്ഷണവും വെള്ളവുമില്ലാതെ തെരുവിൽ കഴിയുകയാണെന്ന് നേതാക്കൾ ചൂണ്ടിക്കാട്ടി. തകർത്ത വീടുകൾ സർക്കാർ പുനർനിർമ്മിച്ചു നൽകണമെന്നും അവർ ആവശ്യപ്പെട്ടു.
കർണാടകയിലെ കോൺഗ്രസ് സർക്കാരിന്റെ നടപടിക്കെതിരെ കേരള മുഖ്യമന്ത്രി പിണറായി വിജയനും മുതിർന്ന കോൺഗ്രസ് നേതാവ് പി. ചിദംബരവും രംഗത്തെത്തിയതോടെ വിഷയം ദേശീയ തലത്തിൽ ചർച്ചയായി. എ.ഐ.സി.സി ജനറൽ സെക്രട്ടറി കെ.സി. വേണുഗോപാൽ കർണാടക ഉപമുഖ്യമന്ത്രി ഡി.കെ. ശിവകുമാറിൽ നിന്ന് വിശദീകരണം തേടി. നിയമപരമായ നടപടികൾ പാലിച്ചാണ് കൈയേറ്റം ഒഴിപ്പിച്ചതെന്നാണ് പ്രാഥമിക വിശദീകരണം.
പ്രതിഷേധം ശക്തമായതോടെ കുടിയൊഴിപ്പിക്കപ്പെട്ടവർക്കായി 200 ഫ്ലാറ്റുകൾ അടങ്ങിയ സമുച്ചയം നിർമ്മിച്ച് നൽകുമെന്ന് സർക്കാർ പ്രഖ്യാപിച്ചു. ഇതിനായുള്ള സർവ്വേ നടപടികൾ തുടങ്ങാൻ ജില്ലാ ഭരണകൂടത്തിന് നിർദ്ദേശം നൽകി കഴിഞ്ഞു.