അഹമ്മദാബാദ്: സൗദി അറേബ്യയിലെ മദീന വിമാനത്താവളത്തിൽ നിന്ന് ഹൈദരാബാദിലേക്ക് വന്ന ഇൻഡിഗോ വിമാനം അഹമ്മദാബാദിൽ അടിയന്തിരമായി ഇറക്കി. യാത്രക്കാരുമായി വന്ന വിമാനമാണ് ലക്ഷ്യസ്ഥാനത്ത് എത്തുന്നതിന് മുൻപ് ഇറക്കിയത്. അടിയന്തിരമായി വിമാനം ഇറക്കാൻ കാരണമായ പ്രതിസന്ധി എന്താണെന്നതുൾപ്പെടെയുള്ള ഔദ്യോഗിക വിവരങ്ങൾ ഇതുവരെ പുറത്തുവന്നിട്ടില്ല.(IndiGo flight from Madinah makes emergency landing in Ahmedabad)
ഇൻഡിഗോ വിമാനക്കമ്പനി വലിയ പ്രതിസന്ധി നേരിടുന്നതിനിടെയാണ് ഈ സംഭവവും ഉണ്ടായിരിക്കുന്നത്. ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (ഡി.ജി.സി.എ.) കൊണ്ടുവന്ന പുതിയ ഫ്ലൈറ്റ് ഡ്യൂട്ടി ടൈം ലിമിറ്റേഷൻസ് (എഫ്.ഡി.ടി.എൽ.) നിയമങ്ങളാണ് കമ്പനിയെ പ്രതിസന്ധിയിലാക്കിയത്. പുതിയ നിയമപ്രകാരം സർവീസുകൾ പൂർത്തിയാക്കാൻ ആവശ്യമായത്ര ജീവനക്കാർ ഇല്ലാത്തതാണ് പ്രശ്നമായത്. ജീവനക്കാരെ പുനഃക്രമീകരിക്കാൻ കമ്പനിക്ക് സാധിക്കാതെ വന്നതോടെ ദേശീയ-അന്തർദേശീയ സർവീസുകൾ റദ്ദാക്കേണ്ടി വരികയും വിമാനങ്ങൾ മണിക്കൂറുകളോളം വൈകുകയും ചെയ്തിരുന്നു. ഈ പ്രതിസന്ധി ഇപ്പോഴും തുടരുകയാണ്.
യാത്രക്കാർ പ്രതിസന്ധി മൂലം വലഞ്ഞതിനെ തുടർന്ന് കമ്പനിയുടെ ഓഹരി വിലയിലും നഷ്ടം രേഖപ്പെടുത്തിയിരുന്നു. വിമാനക്കമ്പനിയോ വിമാനത്താവളം അധികൃതരോ അടിയന്തിരമായി വിമാനം ഇറക്കിയ സംഭവത്തെക്കുറിച്ച് കൂടുതൽ വിവരങ്ങൾ പുറത്തുവിട്ടിട്ടില്ല. വിമാനത്തിൽ ഉണ്ടായിരുന്ന യാത്രക്കാരുടെയും ജീവനക്കാരുടെയും എണ്ണവും വ്യക്തമല്ല.