ബെംഗളൂരു: ജീവിതത്തിലെ പ്രതിസന്ധികൾ പ്രതീക്ഷിക്കാത്ത രൂപത്തിലാകും എത്തുക. ഇൻഡിഗോ വിമാന സർവീസുകൾ പരക്കെ റദ്ദാക്കിയപ്പോൾ കർണാടകയിലെ ഹുബ്ബള്ളിയിൽ നിന്നുള്ള ഒരു നവദമ്പതികൾക്ക് നേരിട്ടത് മറക്കാനാവാത്ത അനുഭവമാണ്. റിസപ്ഷൻ മുടങ്ങുമെന്ന അവസ്ഥ വന്നപ്പോൾ, സാങ്കേതികവിദ്യയുടെ സഹായത്തോടെ അവർ പ്രതിസന്ധി മറികടന്നു.(IndiGo flight cancelled, Newlyweds attend reception via video conferencing to avoid disruption)
ഹുബ്ബള്ളി സ്വദേശിയായ മേധ ഷിർസാഗറും ഒഡിഷയിലെ ഭുവനേശ്വറിൽ നിന്നുള്ള സംഗമ ദാസും നവംബർ 23-ന് ഭുവനേശ്വറിൽ വെച്ചാണ് വിവാഹിതരായത്. ഇരുവരും ബെംഗളൂരുവിലെ സോഫ്റ്റ്വെയർ എഞ്ചിനീയർമാരാണ്. ഇവരുടെ വിവാഹ റിസപ്ഷൻ ഡിസംബർ 3-ന് ഹുബ്ബള്ളിയിലെ ഗുജറാത്ത് ഭവനിൽ നടക്കേണ്ടതായിരുന്നു. റിസപ്ഷനിൽ പങ്കെടുക്കുന്നതിനായി ഡിസംബർ 2-നുള്ള വിമാനത്തിലാണ് ഇവർ ഭുവനേശ്വറിൽ നിന്ന് ബെംഗളൂരുവിലേക്ക് ടിക്കറ്റ് ബുക്ക് ചെയ്തിരുന്നത്.
യാത്രക്കായി വിമാനത്താവളത്തിൽ എത്തിയ നവദമ്പതികൾക്ക് ആദ്യം വിമാനം വൈകുമെന്ന അറിയിപ്പ് ലഭിച്ചു. മണിക്കൂറുകളോളം കാത്തിരുന്ന ശേഷം ഡിസംബർ 3-ന് പുലർച്ചെ വിമാനം റദ്ദാക്കിയെന്ന അറിയിപ്പ് വന്നതോടെ കുടുംബാംഗങ്ങളെയും ദമ്പതികളെയും ആശങ്കയിലാക്കി. പരിപാടി റദ്ദാക്കാൻ കഴിയാത്ത സാഹചര്യമായതോടെയാണ് വ്യത്യസ്തമായ വഴി തേടാൻ തീരുമാനിച്ചത്.
വരനും വധുവും പരിപാടിക്കായി കരുതിയിരുന്ന വസ്ത്രങ്ങൾ അണിഞ്ഞ് വീഡിയോ കോൺഫറൻസിങ് വഴി ചടങ്ങിൽ പങ്കെടുത്തു. ഹുബ്ബള്ളിയിലെ റിസപ്ഷനെത്തിയ ബന്ധുക്കളും സുഹൃത്തുക്കളും ഈ ഓൺലൈൻ ചടങ്ങുകളിൽ പങ്കെടുത്തു. ചടങ്ങുകൾ സന്തോഷത്തോടെ പൂർത്തിയാക്കിയ ശേഷം അതിഥികൾ ഇരുവർക്കും ആശംസകൾ നേർന്ന് മടങ്ങി.