ന്യൂഡൽഹി: പ്രതിരോധ സഹകരണം ശക്തമാക്കുന്നതിന്റെ ഭാഗമായി ഇന്ത്യയും യുണൈറ്റഡ് സ്റ്റേറ്റ്സും (യു.എസ്.) തമ്മിൽ 10 വർഷത്തേക്കുള്ള ഒരു ദീർഘകാല പ്രതിരോധ സഹകരണ ചട്ടക്കൂടിൽ ഒപ്പുവെച്ചു. ക്വാലാലംപൂരിൽ നടക്കുന്ന ആസിയാൻ പ്രതിരോധ മന്ത്രിമാരുടെ യോഗത്തിൽ പങ്കെടുക്കുന്നതിനിടെയാണ് ഇരുരാജ്യങ്ങളും ഈ നിർണ്ണായക കരാറിൽ ഒപ്പുവെച്ചത്.(India-US defense cooperation strengthened, Signed a landmark 10-year agreement)
യു.എസ്. പ്രതിരോധ സെക്രട്ടറി പീറ്റ് ഹെഗ്‌സെത്ത് ഇന്ത്യൻ പ്രതിരോധ മന്ത്രി രാജ്നാഥ് സിംഗുമായി കൂടിക്കാഴ്ച നടത്തിയ ശേഷമാണ് കരാർ പ്രാവർത്തികമാക്കിയത്.
പുതിയ പ്രതിരോധ സഹകരണ ചട്ടക്കൂട് വിവരങ്ങൾ പങ്കുവെയ്ക്കൽ, സാങ്കേതിക സഹകരണം, ഏകോപനം എന്നിവയിൽ സഹകരണം ഉറപ്പ് വരുത്തുന്നു.
സൈനിക സഹകരണം ആഴത്തിലാക്കൽ, പരസ്പരം താവളങ്ങൾ, ലോജിസ്റ്റിക്സ്, അറ്റകുറ്റപ്പണി സൗകര്യങ്ങൾ എന്നിവ തടസ്സങ്ങളില്ലാതെ ഉപയോഗിക്കാൻ സഹായിക്കും. പ്രതിരോധ ഉപകരണങ്ങളുടെ സംയുക്ത നിർമ്മാണം സാധ്യമാക്കും.
ഡ്രോണുകളിലും എ.ഐ. (AI) അധിഷ്ഠിത യുദ്ധതന്ത്രങ്ങളിലുമുള്ള സംയുക്ത ഗവേഷണവും വികസനവും ഉറപ്പുവരുത്തും. തദ്ദേശീയ പ്രതിരോധ ഉത്പാദനം, ആധുനികവൽക്കരണം എന്നിവയ്ക്ക് നിർണ്ണായകമായ നൂതന പ്രതിരോധ സാങ്കേതികവിദ്യകൾ സ്വായത്തമാക്കാൻ ഈ കരാർ ഇന്ത്യയെ സഹായിക്കുമെന്നാണ് വിലയിരുത്തൽ.
ഇൻഡോ-പസഫിക് മേഖലയിലുടനീളം ചൈനയുടെ വർദ്ധിച്ചുവരുന്ന സ്വാധീനത്തെ പ്രതിരോധിക്കുന്നതിനുള്ള ഒരു സുപ്രധാന നീക്കമായാണ് ഈ കരാറിനെ ലോകരാജ്യങ്ങൾ കാണുന്നത്. ഈ കരാറിലൂടെ പ്രാദേശിക സ്ഥിരത ഉറപ്പാക്കുന്ന ശക്തിയായും സമുദ്ര സഹകരണത്തിന് മുൻഗണനയുള്ള പങ്കാളിയായും ഇന്ത്യ മാറിക്കഴിഞ്ഞു.
പീറ്റ് ഹെഗ്‌സെത്ത് ട്വിറ്ററിലൂടെ പ്രതികരിച്ചത് ഇങ്ങനെ: "നമ്മുടെ പ്രതിരോധ ബന്ധം മുമ്പൊരിക്കലും ഇത്ര ശക്തമായിരുന്നിട്ടില്ല. 10 വർഷത്തെ യുഎസ്-ഇന്ത്യ പ്രതിരോധ ചട്ടക്കൂടിൽ ഒപ്പുവെക്കുന്നത് പ്രാദേശിക സ്ഥിരതയ്ക്കും പ്രതിരോധത്തിനും അടിത്തറയാകും." ഇന്ത്യയും യു.എസും തമ്മിലുള്ള വ്യാപാര കരാറുമായി ബന്ധപ്പെട്ട ചർച്ചകൾ പുരോഗമിക്കുന്നതിനിടെയാണ് ഈ പുതിയ പ്രതിരോധ കരാറെന്നതാണ് ശ്രദ്ധേയം.