ന്യൂഡൽഹി: അയൽരാജ്യമായ പാകിസ്താന്റെ പ്രതിബന്ധങ്ങളെ മറികടന്ന് അഫ്ഗാനിസ്താനിലെ താലിബാൻ ഭരണകൂടവുമായി വ്യാപാര ബന്ധം ശക്തിപ്പെടുത്താൻ ഇന്ത്യ സുപ്രധാന നീക്കം ആരംഭിച്ചു. അഫ്ഗാൻ വാണിജ്യ മന്ത്രി അൽഹാജ് നൂറുദ്ദീൻ അസീസിയുടെ ഡൽഹി സന്ദർശനത്തിന് പിന്നാലെയാണ് ഇരു രാജ്യങ്ങളും തമ്മിൽ സുപ്രധാന ധാരണകൾ ഒപ്പുവെച്ചത്.(India to boost trade with Taliban amid Pakistan threats)
വെള്ളിയാഴ്ച ധാരണയായ പ്രധാന വിഷയങ്ങളിൽ വ്യോമഗതാഗതവും ഉൾപ്പെടുന്നു. ഡൽഹി, അമൃത്സർ എന്നീ നഗരങ്ങളിൽ നിന്നും അഫ്ഗാൻ തലസ്ഥാനമായ കാബൂളിലേക്കുള്ള വ്യോമ ഗതാഗതം പുനരാരംഭിക്കാൻ തീരുമാനമായി. ഇറാന്റെ ചബഹാർ തുറമുഖം വഴിയും ഇന്ത്യയും അഫ്ഗാനിസ്താനും തമ്മിലുള്ള ചരക്ക് നീക്കം ശക്തിപ്പെടുത്തും. ഇതുവഴി ഇരു രാജ്യങ്ങളും തമ്മിലുള്ള വ്യാപാര ബന്ധം കൂടുതൽ ശക്തിപ്പെടുത്താനാകുമെന്നാണ് പ്രതീക്ഷ.
ഗിൽജിത്-ബാൾട്ടിസ്താനിൽ പാകിസ്താൻ നിയമവിരുദ്ധമായി അധിനിവേശം നടത്തിയതിനുശേഷം അഫ്ഗാനുമായുള്ള വ്യാപാരത്തിനായി ഇന്ത്യ പാകിസ്താനെ ആശ്രയിക്കുന്നത് നിർത്തിയിരുന്നു. ഇത് അഫ്ഗാനുമായുള്ള ഇന്ത്യയുടെ വ്യാപാരത്തെ സാരമായി ബാധിച്ചിരുന്നു. പുതിയ കരാറോടെ ഈ പ്രശ്നത്തിന് പരിഹാരമാകുമെന്നാണ് വിലയിരുത്തൽ.
പാകിസ്താൻ-അഫ്ഗാനിസ്താൻ അതിർത്തിയിൽ കഴിഞ്ഞ മാസം സംഘർഷങ്ങൾ ഉടലെടുത്തതിനെ തുടർന്ന് പാകിസ്താൻ അതിർത്തി അടച്ചിരുന്നു. ഇത് അഫ്ഗാനിസ്താന് 10 കോടി ഡോളറിലധികം നഷ്ടമുണ്ടാക്കി. ഇതിനെത്തുടർന്ന്, വ്യാപാരത്തിനായി ഇനി പാകിസ്താനെ ആശ്രയിക്കേണ്ടതില്ലെന്ന് താലിബാൻ ഭരണകൂടം തീരുമാനമെടുത്തിരുന്നു. ഇതാണ് ഇന്ത്യയുമായുള്ള വ്യാപാര ബന്ധം ശക്തിപ്പെടുത്താൻ അഫ്ഗാനെ പ്രേരിപ്പിച്ചത്.
ഖനനം, കൃഷി, ആരോഗ്യ സംരക്ഷണം, ഫാർമസ്യൂട്ടിക്കൽസ്, ഐ.ടി., ഊർജ്ജം, തുണിത്തരങ്ങൾ തുടങ്ങിയ മേഖലകളിൽ പങ്കാളികളാകാൻ അഫ്ഗാൻ വാണിജ്യ മന്ത്രി അൽഹാജ് നൂറുദ്ദീൻ അസീസി ഇന്ത്യൻ വ്യാപാരികളോട് അഭ്യർഥിച്ചു. ഇന്ത്യൻ കമ്പനികൾക്കായി അദ്ദേഹം നിരവധി ആനുകൂല്യങ്ങളും വാഗ്ദാനം ചെയ്തു.
അസംസ്കൃത വസ്തുക്കൾക്കും യന്ത്രങ്ങൾക്കും ഒരു ശതമാനം താരിഫ് മാത്രം, സൗജന്യ ഭൂമിയും വൈദ്യുതി വിതരണവും, അഞ്ച് വർഷത്തെ നികുതി ഇളവുകൾ എന്നിവ ഇതിൽ ഉൾപ്പെടുന്നു. മേഖലയിലെ രാഷ്ട്രീയ സാഹചര്യങ്ങൾക്കിടയിൽ ഇരു രാജ്യങ്ങളും തമ്മിലുണ്ടാക്കിയ ഈ വ്യാപാരക്കരാർ ഏറെ പ്രാധാന്യം അർഹിക്കുന്നു.