ന്യൂഡൽഹി: സാങ്കേതിക വിദ്യയിലും പ്രതിരോധ മേഖലയിലും നിർണ്ണായകമായ സുരക്ഷിത വിതരണ ശൃംഖല ഉറപ്പാക്കാൻ രൂപീകരിച്ച രാജ്യാന്തര കൂട്ടായ്മയായ ‘പാക്സ് സിലിക്ക’യിൽ ഇന്ത്യ ചേർന്നു. ഡൽഹിയിൽ നടക്കുന്ന ‘ഇന്ത്യ എഐ ഇംപാക്ട് ഉച്ചകോടി’യിൽ വെള്ളിയാഴ്ചയാണ് ഇന്ത്യ ഔദ്യോഗികമായി കരാറിൽ ഒപ്പുവെച്ചത്.(India officially joins US-led Pax Silica alliance)
അടുത്ത തലമുറ വ്യവസായങ്ങൾക്ക് അത്യാവശ്യമായ വിഭവങ്ങൾ സുരക്ഷിതമായി ലഭ്യമാക്കാൻ യുഎസിന്റെ നേതൃത്വത്തിൽ രൂപീകരിച്ച തന്ത്രപ്രധാന സഖ്യമാണിത്. പ്രധാനമായും മൂന്ന് മേഖലകളിലാണ് ഈ സഖ്യം ശ്രദ്ധ കേന്ദ്രീകരിക്കുന്നത്. ബാറ്ററികൾക്കും മറ്റ് നൂതന സാങ്കേതിക വിദ്യകൾക്കും ആവശ്യമായ ധാതുക്കൾ, സെമികണ്ടക്ടറുകൾ, എഐ ഇൻഫ്രാസ്ട്രക്ചർ എന്നിവയാണിത്.
കഴിഞ്ഞ ഡിസംബറിൽ വാഷിംഗ്ടണിൽ നടന്ന ഉച്ചകോടിയിലാണ് ഈ സംരംഭത്തിന് തുടക്കമിട്ടത്. ഓസ്ട്രേലിയ, ഗ്രീസ്, ഇസ്രായേൽ, ജപ്പാൻ, ഖത്തർ, കൊറിയ, സിംഗപ്പൂർ, യുഎഇ, യുകെ എന്നീ രാജ്യങ്ങൾ ഈ സഖ്യത്തിലുണ്ട്. ഇന്ത്യ കൂടി എത്തിയതോടെ സഖ്യത്തിന്റെ കരുത്ത് വർദ്ധിക്കും.
