ന്യൂഡൽഹി: ബംഗ്ലാദേശ് രാഷ്ട്രീയത്തിൽ ചരിത്രപരമായ നയതന്ത്ര മാറ്റത്തിനൊരുങ്ങി ഇന്ത്യ. അന്തരിച്ച മുൻ പ്രധാനമന്ത്രി ബീഗം ഖാലിദ സിയയുടെ മകൻ താരിഖ് റഹ്മാൻ നയിക്കുന്ന ബംഗ്ലാദേശ് നാഷണൽ പാർട്ടിക്ക് പിന്തുണ പ്രഖ്യാപിച്ച് പ്രധാനമന്ത്രി നരേന്ദ്ര മോദി രംഗത്തെത്തി. ഖാലിദ സിയയുടെ നിര്യാണത്തിൽ അനുശോചനം രേഖപ്പെടുത്തി താരിഖ് റഹ്മാന് അയച്ച കത്തിലാണ്, ബി.എൻ.പിയുടെ നേതൃത്വത്തിൽ ഒരു 'നവ ബംഗ്ലാദേശ്' സൃഷ്ടിക്കപ്പെടട്ടെ എന്ന് മോദി ആശംസിച്ചത്.(India expresses support to BNP in Bangladesh, PM's letter handed over to Tarique Rahman)
ധാക്കയിലെത്തിയ വിദേശകാര്യ മന്ത്രി എസ്. ജയശങ്കർ മുഖേനയാണ് പ്രധാനമന്ത്രിയുടെ ഈ സന്ദേശം കൈമാറിയത്. 2026 ഫെബ്രുവരി 12-ന് ബംഗ്ലാദേശിൽ പൊതുതിരഞ്ഞെടുപ്പ് നടക്കാനിരിക്കെ ഇന്ത്യ നടത്തുന്ന ഈ നീക്കം ഏറെ രാഷ്ട്രീയ പ്രാധാന്യമർഹിക്കുന്നു.
ഖാലിദ സിയയുടെ ദർശനങ്ങൾ പിന്തുടരാൻ താരിഖ് റഹ്മാന് കഴിയട്ടെയെന്നും ബി.എൻ.പിയുടെ നേതൃത്വത്തിൽ ബംഗ്ലാദേശിന്റെ പുനർനിർമ്മാണം സാധ്യമാകട്ടെ എന്നും പ്രധാനമന്ത്രി കുറിച്ചു. ഖാലിദ സിയയുടെ കാലത്ത് ഇരുരാജ്യങ്ങളും പുലർത്തിയിരുന്ന ബന്ധത്തെ അനുസ്മരിച്ച മോദി, ഭാവിയിൽ ഇന്ത്യയുമായുള്ള നയതന്ത്ര ബന്ധം കൂടുതൽ ദൃഢമാക്കാൻ ബി.എൻ.പിക്ക് കഴിയുമെന്ന് പ്രത്യാശ പ്രകടിപ്പിച്ചു.
നയതന്ത്രതലത്തിലും അല്ലാതെയും ഇരുരാജ്യങ്ങളും തമ്മിലുള്ള സഹകരണം മെച്ചപ്പെടുത്തേണ്ടതിന്റെ ആവശ്യകത കത്തിൽ ഊന്നിപ്പറയുന്നു. ബംഗ്ലാദേശിലെ നിലവിലെ ഇടക്കാല സർക്കാരിനോടുള്ള ഇന്ത്യയുടെ തണുപ്പൻ സമീപനം ഈ സന്ദർശനത്തിൽ ഉടനീളം പ്രകടമായിരുന്നു.
ധാക്കയിലെത്തിയ എസ്. ജയശങ്കർ ബി.എൻ.പി നേതാക്കളെ കണ്ടെങ്കിലും ഇടക്കാല സർക്കാർ ഉപദേഷ്ടാവ് മുഹമ്മദ് യൂനുസുമായി കൂടിക്കാഴ്ച നടത്താതിരുന്നത് ശ്രദ്ധേയമായി. ബംഗ്ലാദേശിൽ ഹിന്ദുക്കൾക്കും ഇന്ത്യൻ പൗരന്മാർക്കും നേരെ നടക്കുന്ന അക്രമങ്ങളിൽ ഇന്ത്യ നേരത്തെ തന്നെ കടുത്ത അതൃപ്തി രേഖപ്പെടുത്തിയിരുന്നു.