ന്യൂഡൽഹി: ബംഗ്ലാദേശിലെ സുരക്ഷാ സാഹചര്യം മോശമാകുന്ന പശ്ചാത്തലത്തിൽ അവിടെയുള്ള ഇന്ത്യൻ നയതന്ത്ര ഉദ്യോഗസ്ഥരുടെ കുടുംബാംഗങ്ങളെയും ആശ്രിതരെയും ഇന്ത്യയിലേക്ക് തിരിച്ചുകൊണ്ടുവരാൻ കേന്ദ്ര സർക്കാർ തീരുമാനിച്ചു. മുൻകരുതൽ നടപടിയുടെ ഭാഗമായാണ് ഈ നീക്കമെന്ന് ഔദ്യോഗിക വൃത്തങ്ങൾ അറിയിച്ചു.
ധാക്കയിലെ ഇന്ത്യൻ ഹൈക്കമ്മീഷനിലും ചട്ടോഗ്രാം, ഖുൽന, രാജ്ഷാഹി, സിൽഹെറ്റ് എന്നിവിടങ്ങളിലെ അസിസ്റ്റന്റ് ഹൈക്കമ്മീഷനുകളിലും ജോലി ചെയ്യുന്നവരുടെ കുടുംബങ്ങളോടാണ് മടങ്ങാൻ നിർദ്ദേശിച്ചിരിക്കുന്നത്. അതേസമയം, ഹൈക്കമ്മീഷന്റെയും മറ്റ് നയതന്ത്ര കാര്യാലയങ്ങളുടെയും പ്രവർത്തനം സാധാരണ നിലയിൽ തുടരും.
ബംഗ്ലാദേശിൽ തീവ്രവാദ പ്രവർത്തനങ്ങൾ വർദ്ധിക്കുന്നതും റാഡിക്കൽ ഗ്രൂപ്പുകളിൽ നിന്നുള്ള ഭീഷണികളും കണക്കിലെടുത്താണ് ഇന്ത്യയുടെ ഈ സുപ്രധാന നീക്കം. മുഹമ്മദ് യൂനുസിന്റെ നേതൃത്വത്തിലുള്ള ഇടക്കാല സർക്കാർ അധികാരമേറ്റ ശേഷം ഇരുരാജ്യങ്ങളും തമ്മിലുള്ള ബന്ധത്തിൽ വലിയ പിരിമുറുക്കം അനുഭവപ്പെടുന്നുണ്ട്. ബംഗ്ലാദേശിലെ ഹിന്ദു ന്യൂനപക്ഷങ്ങൾക്കെതിരെ നടക്കുന്ന അക്രമങ്ങളിൽ ഇന്ത്യ നേരത്തെ തന്നെ കടുത്ത ആശങ്ക രേഖപ്പെടുത്തിയിരുന്നു.
ഫെബ്രുവരി 12-ന് നടക്കാനിരിക്കുന്ന ബംഗ്ലാദേശ് പാർലമെന്റ് തിരഞ്ഞെടുപ്പിന് ആഴ്ചകൾ മാത്രം ബാക്കിനിൽക്കെയാണ് ഇന്ത്യ ഈ തീരുമാനമെടുത്തത് എന്നത് ശ്രദ്ധേയമാണ്. തിരഞ്ഞെടുപ്പ് വേളയിൽ അക്രമങ്ങൾ വർദ്ധിക്കാനുള്ള സാധ്യത കൂടി കണക്കിലെടുത്താണ് നയതന്ത്ര ഉദ്യോഗസ്ഥരുടെ കുടുംബങ്ങളുടെ സുരക്ഷ മുൻനിർത്തിയുള്ള ഈ നടപടി.