ന്യൂഡൽഹി: രാജ്യത്തെ സുപ്രധാന ഭരണഘടനാ സ്ഥാപനങ്ങളായ മുഖ്യ വിവരവകാശ കമ്മീഷണർ (CIC), വിവരവകാശ കമ്മീഷണർമാർ (IC), കേന്ദ്ര വിജിലൻസ് കമ്മീഷണർ (CVC) എന്നിവരുടെ നിയമനം സംബന്ധിച്ച് ചേർന്ന നിർണായക ഉന്നതതല സമിതി യോഗത്തിൽ ലോക്സഭാ പ്രതിപക്ഷ നേതാവായ രാഹുൽ ഗാന്ധി ശക്തമായ വിയോജന കുറിപ്പ് നൽകി. പ്രധാനമന്ത്രി നരേന്ദ്ര മോദി, കേന്ദ്ര ആഭ്യന്തര മന്ത്രി അമിത് ഷാ, രാഹുൽ ഗാന്ധി എന്നിവർ ഉൾപ്പെട്ട സമിതിയാണ് നിയമനത്തിന് പരിഗണിക്കേണ്ട പേരുകൾ ചർച്ച ചെയ്തത്. നിയമനത്തിനായി സർക്കാർ സമർപ്പിച്ച പട്ടികയിൽ സാമൂഹിക നീതിയും സുതാര്യതയും ഉറപ്പാക്കുന്നതിൽ നിരവധി പോരായ്മകൾ ഉണ്ടെന്ന് ചൂണ്ടിക്കാട്ടിയാണ് കോൺഗ്രസ് നേതാവ് വിയോജിപ്പ് അറിയിച്ചത്.(Important constitutional appointments, Rahul Gandhi gives dissenting note to Appointments Committee)
നിയമനത്തിനായി പരിഗണിച്ച പേരുകളുടെ പട്ടികയിൽ പിന്നാക്ക, ന്യൂനപക്ഷ വിഭാഗങ്ങൾക്ക് തീരെ പ്രാതിനിധ്യമില്ലെന്ന് രാഹുൽ ഗാന്ധി കുറ്റപ്പെടുത്തി. സാമൂഹ്യ നീതി ഉറപ്പാക്കേണ്ട സുപ്രധാന പദവികളിൽ പിന്നാക്ക വിഭാഗങ്ങൾക്ക് അവസരം നിഷേധിക്കുന്നത് ജനാധിപത്യപരമല്ലെന്നും അദ്ദേഹം ചൂണ്ടിക്കാട്ടി. പട്ടികയിൽ ഉൾപ്പെട്ട ചില വ്യക്തികളുടെ മുൻകാല പ്രവർത്തനങ്ങളും സുതാര്യതയും ചോദ്യം ചെയ്യപ്പെടേണ്ടതാണെന്ന് ഗാന്ധി ആരോപിച്ചു.
നിയമനം ലഭിക്കുന്നതിന് മുമ്പ് തന്നെ ചില പേരുകൾ മാധ്യമങ്ങളിൽ പ്രചരിച്ചത് തിരഞ്ഞെടുപ്പ് പ്രക്രിയയിലെ സുതാര്യതയില്ലായ്മയുടെ സൂചനയാണ്. അപേക്ഷകരെ തിരഞ്ഞെടുക്കുന്നതിൽ സർക്കാർ ഏകപക്ഷീയമായി ഇടപെട്ടതായി രാഹുൽ ഗാന്ധി വിയോജന കുറിപ്പിൽ രേഖപ്പെടുത്തി.
മുഖ്യ വിവരവകാശ കമ്മീഷണർ, കേന്ദ്ര വിജിലൻസ് കമ്മീഷണർ തുടങ്ങിയ തസ്തികകളിലെ നിയമനം കേന്ദ്ര സർക്കാരിൻ്റെ ശുപാർശയുടെ അടിസ്ഥാനത്തിൽ, പ്രധാനമന്ത്രി അധ്യക്ഷനായ ഉന്നതതല സമിതിയുടെ അംഗീകാരത്തോടെയാണ് നടക്കുന്നത്. ഈ സമിതിയിൽ പ്രധാനമന്ത്രി (ചെയർമാൻ), ആഭ്യന്തര മന്ത്രി, ലോക്സഭാ പ്രതിപക്ഷ നേതാവ് എന്നിവരാണ് അംഗങ്ങൾ. വിയോജന കുറിപ്പ് രേഖപ്പെടുത്തിയെങ്കിലും, സമിതി യോഗത്തിൽ ഭൂരിപക്ഷ അഭിപ്രായം സർക്കാരിന് അനുകൂലമായതിനാൽ നിയമന നടപടികളുമായി മുന്നോട്ട് പോകാനാണ് സാധ്യതയെന്നാണ് രാഷ്ട്രീയ നിരീക്ഷകരുടെ വിലയിരുത്തൽ.