ഭുവനേശ്വർ: ബംഗ്ലാദേശിൽ നിന്ന് അനധികൃതമായി ആളെക്കടത്തി അനാശാസ്യ പ്രവർത്തനങ്ങൾക്ക് ഉപയോഗിക്കുന്ന റാക്കറ്റിലെ മുഖ്യകണ്ണിയായ സീക്കോ എന്നറിയപ്പെടുന്ന സിക്കന്ദർ അലാം ഒഡീഷയിൽ പിടിയിലായി. ഇയാളുടെ സഹോദരനും ഒപ്പം പിടിയിലായിട്ടുണ്ട്.
ബെഹറാംപൂരിലെ ഒരു കോളനിയിൽ നിന്നാണ് ഇയാൾ പിടിയിലായത്. പലയിടത്തായി താവളം മാറി താമസിക്കുന്ന പ്രതിയെ പോലീസ് വിവിധയിടങ്ങളിൽ നടത്തിയ റെയ്ഡിനൊടുവിലാണ് പിടികൂടിയത്.ഇയാളുടെ പക്കൽ നിന്ന് പാസ്‌പോർട്ടുകളും മറ്റ് സുപ്രധാന രേഖകളും പോലീസ് പിടിച്ചെടുത്തു.ഇയാൾ മറ്റ് ചില സംഘാംഗങ്ങളോടൊപ്പം ചേർന്ന് അനധികൃത കുടിയേറ്റക്കാരെ കടത്തി താമസിക്കാൻ ഇടം നൽകിയാണ് അനാശാസ്യത്തിനായി ഉപയോഗിച്ചിരുന്നത്. സംസ്ഥാനത്തിന് പുറത്തുനിന്നുള്ള സ്ത്രീകളെയും ഇയാൾ ഇത്തരത്തിൽ പാർപ്പിച്ചിരുന്നു.
സിക്കന്ദർ അലാം സംസ്ഥാനത്ത് സർക്കാർ ഭൂമി കൈയ്യേറി നിർമിച്ച പത്ത് മുറികളുള്ള കെട്ടിടം പോലീസ് തകർത്തു.
കൂടുതൽ നടപടി: ബംഗ്ലാദേശികൾ അനധികൃതമായി നിർമിച്ച മറ്റ് കെട്ടിടങ്ങളും പോലീസ് പൊളിച്ചുമാറ്റി.ഒഡീഷയിലേക്ക് ബംഗ്ലാദേശികൾ കടന്നുവന്ന റൂട്ട് പോലീസ് വിശദമായി പരിശോധിക്കുകയാണ്.
നവംബർ 16-ന് നടത്തിയ റെയ്ഡിൽ ഇവരിൽ നിന്ന് വാളുകളും നാടൻ തോക്കുകളും പോലീസ് പിടിച്ചെടുത്തിരുന്നു.അനധികൃതമായി സംസ്ഥാനങ്ങളിൽ കടന്നുകൂടിയിട്ടുള്ളവരുടെ രേഖകൾ പരിശോധിച്ച് നടപടിയെടുക്കണമെന്ന കേന്ദ്ര ആഭ്യന്തര മന്ത്രാലയത്തിൻ്റെ നിർദ്ദേശത്തെ തുടർന്നായിരുന്നു ഒഡീഷയിൽ പോലീസ് റെയ്ഡ് നടത്തിയത്.