മുംബൈ: ഷാഹിദ് കപൂർ നായകനായ പുതിയ ചിത്രം ‘ഓ റോമിയോ’യെ പുകഴ്ത്തി രംഗത്തെത്തിയ ഹൃത്വിക് റോഷന് സോഷ്യൽ മീഡിയയിൽ കടുത്ത പരിഹാസം (Hrithik Roshan Trolled For O’Romeo Review). ഷാഹിദ് ഈ വിഭാഗം സിനിമകളിൽ ഏറ്റവും മികച്ചവനാണെന്നും സിനിമയിലെ ‘റണ്ണിംഗ് ഇൻ സർക്കിൾസ്’ ആക്ഷൻ ഗംഭീരമാണെന്നുമാണ് ഹൃത്വിക് എക്സിൽ കുറിച്ചത്. എന്നാൽ, അടുത്തിടെ പുറത്തിറങ്ങിയ ബ്ലോക്ക്ബസ്റ്റർ ചിത്രം ‘ധുരന്ധറി’ലെ രാഷ്ട്രീയത്തെ വിമർശിച്ച ഹൃത്വിക്, ഈ ചിത്രത്തെ പുകഴ്ത്തിയത് ഇരട്ടത്താപ്പാണെന്നാണ് ആരാധകരുടെ പക്ഷം.
വിശാൽ ഭരദ്വാജ് സംവിധാനം ചെയ്ത ‘ഓ റോമിയോ’യിൽ ഹിന്ദു കഥാപാത്രങ്ങളെ മോശമായി ചിത്രീകരിക്കുന്നുവെന്നും സിനിമയുടെ രാഷ്ട്രീയം മോശമാണെന്നും ആക്ഷേപമുയർന്നിരുന്നു. ‘ധുരന്ധർ’ എന്ന സിനിമയുടെ രാഷ്ട്രീയത്തോട് യോജിക്കാൻ കഴിയില്ലെന്ന് ഇൻസ്റ്റാഗ്രാമിൽ കുറിച്ച ഹൃത്വിക്, ഓ റോമിയോയിലെ രാഷ്ട്രീയത്തെക്കുറിച്ച് എന്താണ് മിണ്ടാത്തതെന്ന് ആരാധകർ ചോദിക്കുന്നു. “ധുരന്ധർ പോലുള്ള മാസ്റ്റർക്ലാസ് സിനിമയെ വെറുക്കുകയും ഇത്രയും മോശം സിനിമയെ പുകഴ്ത്തുകയും ചെയ്യുന്നത് ശരിയല്ല” എന്നാണ് പലരും കമന്റ് ചെയ്തത്. ഹൃത്വിക്കിന്റെ പോസ്റ്റിന് മറുപടിയുമായി ഷാഹിദ് കപൂറും എത്തിയിരുന്നു.
The quirkiness of #ORomeo eventually wins you over. I had fun. @shahidkapoor you do this genre BEST. Too good you are. Go watch it in the theatres guys. Also that running in circles action was brilliant.
— Hrithik Roshan (@iHrithik) February 20, 2026
ഹുസൈൻ സൈദിയുടെ ‘മാഫിയ ക്വീൻസ് ഓഫ് മുംബൈ’ എന്ന പുസ്തകത്തെ ആസ്പദമാക്കി ഒരുക്കിയ ചിത്രമാണ് ‘ഓ റോമിയോ’. തൃപ്തി ഡിമ്രി, നാനാ പടേക്കർ എന്നിവരും പ്രധാന വേഷങ്ങളിലെത്തിയ ചിത്രം ഫെബ്രുവരി 13-നാണ് തിയേറ്ററുകളിൽ എത്തിയത്. അതേസമയം, ഹൃത്വിക് റോഷൻ ആദ്യം വിമർശിക്കുകയും പിന്നീട് പുകഴ്ത്തുകയും ചെയ്ത ‘ധുരന്ധർ’ എന്ന സിനിമയുടെ രണ്ടാം ഭാഗം മാർച്ച് 19-ന് മലയാളം ഉൾപ്പെടെയുള്ള ഭാഷകളിൽ പുറത്തിറങ്ങും. ഹൃത്വിക്കിന്റെ പരസ്പരവിരുദ്ധമായ റിവ്യൂകൾ കണ്ട് അദ്ദേഹത്തിന്റെ ഇൻസ്റ്റാഗ്രാമും എക്സും കൈകാര്യം ചെയ്യുന്നത് രണ്ട് പേരാണോ എന്ന് പോലും ആരാധകർ സംശയം പ്രകടിപ്പിക്കുന്നുണ്ട്.
