നഹാൻ: ഹിമാചൽ പ്രദേശിലെ സിർമൗറിൽ പ്രവർത്തിക്കുന്ന തിരുപ്പതി ലൈഫ് സയൻസ് ഫാക്ടറിയിൽ വാതക ചോർച്ച (Gas Leak Himachal Pradesh). ശനിയാഴ്ച രാത്രിയുണ്ടായ അപകടത്തിൽ എട്ട് ജീവനക്കാർക്ക് പരിക്കേറ്റു. ഇതിൽ ശാരീരിക അസ്വസ്ഥതകൾ രൂക്ഷമായ നാല് പേരെ ആശുപത്രിയിൽ പ്രവേശിപ്പിച്ചു. ഫാക്ടറിയിലെ സംഭരണ ടാങ്കിൽ നിന്ന് മെത്തിലീൻ ഡൈക്ലോറൈഡ് (Methylene Dichloride) ചോർന്നതാണ് അപകടത്തിന് കാരണം.
ഫാക്ടറിയിലെ സ്റ്റോറേജ് ടാങ്കിൽ നിന്നാണ് വാതകം ചോർന്നത്. ഗ്യാസ് ശ്വസിച്ച ഉടൻ തന്നെ ജീവനക്കാർക്ക് തലകറക്കവും ശ്വാസതടസ്സവും അനുഭവപ്പെടുകയായിരുന്നു.ഫാക്ടറി മാനേജ്മെന്റിന്റെ ഭാഗത്തുനിന്നുണ്ടായ അശ്രദ്ധയ്ക്ക് സിർമൗർ പോലീസ് കേസെടുത്തു. ബിഎൻഎസ് (BNS) പ്രകാരമുള്ള വിവിധ വകുപ്പുകൾ ചുമത്തിയാണ് അന്വേഷണം നടത്തുന്നതെന്ന് എസ്പി നിശ്ചിത് സിംഗ് നേഗി അറിയിച്ചു.
പെയിന്റ് സ്ട്രിപ്പറായും ലായകമായും ഉപയോഗിക്കുന്ന മെത്തിലീൻ ക്ലോറൈഡ് അതീവ അപകടകാരിയാണ്. ഇത് ശ്വസിക്കുന്നത് ഹൃദയത്തെയും കരളിനെയും കേന്ദ്ര നാഡീവ്യൂഹത്തെയും ബാധിക്കുമെന്ന് ആരോഗ്യ വിദഗ്ധർ മുന്നറിയിപ്പ് നൽകുന്നു. ആശുപത്രിയിൽ പ്രവേശിപ്പിക്കപ്പെട്ട നാല് പേരുടെയും ആരോഗ്യനില നിലവിൽ തൃപ്തികരമാണെന്ന് അധികൃതർ അറിയിച്ചു. വാതക ചോർച്ച നിയന്ത്രണവിധേയമാക്കിയതായും ഫാക്ടറിയിൽ സുരക്ഷാ പരിശോധന തുടരുകയാണെന്നും പോലീസ് വ്യക്തമാക്കി.
