മുംബൈ: ധർമ്മേന്ദ്രയുടെ വിയോഗത്തിന് പിന്നാലെ കുടുംബാംഗങ്ങൾക്കിടയിൽ അകൽച്ചയുണ്ടെന്ന തരത്തിൽ പ്രചരിക്കുന്ന വാർത്തകൾക്ക് മറുപടിയുമായി ഹേമ മാലിനി (Hema Malini Rift Rumours). സണ്ണി ഡിയോളുമായും ബോബി ഡിയോളുമായും തനിക്കും മക്കളായ ഈഷയ്ക്കും അഹാനയ്ക്കും യാതൊരു വിധത്തിലുള്ള ഭിന്നതകളുമില്ലെന്ന് അവർ വ്യക്തമാക്കി. ധർമ്മേന്ദ്ര തന്റെ മക്കൾക്ക് പകർന്നുനൽകിയ മൂല്യങ്ങൾ കുടുംബത്തെ ഒന്നിപ്പിച്ചു നിർത്തുന്നുവെന്നും ഒരു അഭിമുഖത്തിൽ ഹേമ മാലിനി പറഞ്ഞു.
കുടുംബത്തിലെ എല്ലാവരും പരസ്പരം വളരെയധികം സ്നേഹിക്കുന്നുണ്ടെന്നും പൊതുവിടങ്ങളിൽ എല്ലാ നിമിഷങ്ങളും പ്രദർശിപ്പിക്കേണ്ട ആവശ്യം തങ്ങൾക്കില്ലെന്നും ഹേമ മാലിനി പറഞ്ഞു. അടുത്തിടെ സണ്ണിയും ബോബിയും തങ്ങളുടെ പുതിയ സിനിമ കാണാൻ തന്നെ ക്ഷണിച്ചിരുന്നുവെന്നും എന്നാൽ വ്യക്തിപരമായ തിരക്കുകൾ കാരണം പോകാൻ സാധിച്ചില്ലെന്നും അവർ വെളിപ്പെടുത്തി. കുടുംബങ്ങൾക്കിടയിൽ നെഗറ്റീവ് കാര്യങ്ങൾ ഉണ്ടെന്ന് പറയുന്നവർ അത് മനസ്സിലാക്കാത്തതുകൊണ്ടാണ്. ധർമ്മേന്ദ്രയുടെ വിയോഗം സൃഷ്ടിച്ച ശൂന്യതയുമായി പൊരുത്തപ്പെടാൻ കുടുംബം ഒത്തൊരുമിച്ച് ശ്രമിക്കുകയാണെന്നും അവർ കൂട്ടിച്ചേർത്തു.
79-ാമത് ബ്രിട്ടീഷ് അക്കാദമി ഫിലിം അവാർഡ്സിൽ (BAFTA) ധർമ്മേന്ദ്രയ്ക്ക് ആദരമർപ്പിച്ചത് രാജ്യത്തിന് തന്നെ അഭിമാനമാണെന്ന് ഹേമ മാലിനി പറഞ്ഞു. ഇൻ മെമ്മോറിയം വിഭാഗത്തിൽ ഈ വർഷം ആദരിക്കപ്പെട്ട ഏക ഇന്ത്യൻ താരം ധർമ്മേന്ദ്രയായിരുന്നു. ധർമ്മേന്ദ്രയ്ക്കൊപ്പം ഒരു സിനിമ കൂടി ചെയ്യാൻ ആഗ്രഹമുണ്ടായിരുന്നുവെന്നും അദ്ദേഹമില്ലാത്ത ജീവിതം അംഗീകരിക്കാൻ പ്രയാസമാണെങ്കിലും നൃത്ത പരിപാടികളിലൂടെയും മറ്റും മനസ്സിനെ സമാധാനിപ്പിക്കാൻ ശ്രമിക്കുകയാണെന്നും അവർ പറഞ്ഞു. 2025 നവംബറിലായിരുന്നു ബോളിവുഡിന്റെ പ്രിയതാരം ധർമ്മേന്ദ്ര വിടവാങ്ങിയത്.
