ഭോപ്പാൽ: മധ്യപ്രദേശിലെ കട്നി ജില്ലയിലെ ഒരു അംഗൻവാടി കേന്ദ്രത്തിൽ കുട്ടികൾക്കൊപ്പം സ്റ്റീൽ പ്ലേറ്റുകളിൽ നിന്ന് ആടുകൾ ഉച്ചഭക്ഷണം കഴിക്കുന്നതിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചതിന് പിന്നാലെ സർക്കാർ അന്വേഷണത്തിന് ഉത്തരവിട്ടു.(Goats eat food on steel plates with children in the scorching sun at an Anganwadi in MP)
ആദിവാസി ഭൂരിപക്ഷമുള്ള ധീമർഖേദ ബ്ലോക്കിലെ കോത്തി ഗ്രാമത്തിലെ സെഹ്റ മൊഹല്ലയിലാണ് സംഭവം. വാടകക്കെട്ടിടത്തിൽ പ്രവർത്തിക്കുന്ന അംഗൻവാടിക്ക് പുറത്ത്, നിരനിരയായി ഇരിക്കുന്ന കുട്ടികൾക്കൊപ്പം പ്ലേറ്റുകളിൽ വിളമ്പിയ ഭക്ഷണം ആടുകൾ കഴിക്കുന്ന ഞെട്ടിക്കുന്ന ദൃശ്യങ്ങളാണ് പുറത്തുവന്നത്.
വീഡിയോകൾ പുറത്തുവന്ന ഉടൻ തന്നെ അന്വേഷണത്തിനായി ഉദ്യോഗസ്ഥ സംഘത്തെ ഗ്രാമത്തിലേക്ക് അയച്ചതായി കട്നി ജില്ലാ കളക്ടർ ആശിഷ് തിവാരി അറിയിച്ചു. അംഗൻവാടി സൂപ്പർവൈസറുടെ ശമ്പള വർദ്ധനവ് തടഞ്ഞുവെച്ചു. സഹായിക്കും അംഗൻവാടി വർക്കർക്കും കാരണം കാണിക്കൽ നോട്ടീസ് നൽകിയിട്ടുണ്ട്.
സ്ഥിരമായ കെട്ടിടം ഇല്ലാത്തതിനാലാണ് അംഗൻവാടി കേന്ദ്രം കഴിഞ്ഞ വർഷം മുതൽ സ്വകാര്യ വാടക കെട്ടിടത്തിൽ പ്രവർത്തിക്കുന്നതെന്ന് അധികൃതർ വ്യക്തമാക്കി. മറ്റൊരു സ്ഥലത്ത് സ്ഥിരം കെട്ടിടത്തിന്റെ നിർമ്മാണം പുരോഗമിക്കുകയാണെന്നും കളക്ടർ കൂട്ടിച്ചേർത്തു.
അംഗൻവാടിയിലെ ഈ സംഭവത്തിന് മുമ്പും മധ്യപ്രദേശിൽ സമാനമായ അലംഭാവങ്ങൾ റിപ്പോർട്ട് ചെയ്തിട്ടുണ്ട്. നേരത്തെ, വിജയ്പൂർ ബ്ലോക്കിലെ ഹൽപൂർ ഗ്രാമത്തിലെ ഒരു സർക്കാർ പ്രൈമറി സ്കൂളിലെ കുട്ടികൾക്ക് ഉച്ചഭക്ഷണം പ്ലേറ്റുകൾക്ക് പകരം കടലാസിൽ വിളമ്പിയ സംഭവവും പുറത്തുവന്നിരുന്നു.