ന്യൂഡൽഹി: രാജ്യത്തിന്റെ പുതിയ നയങ്ങൾ രൂപീകരിക്കുന്നത് യുവജനങ്ങളെ മുൻനിർത്തിയാണെന്നും വികസിത ഭാരതത്തിലേക്കുള്ള പ്രയാണത്തിൽ യുവശക്തിക്കാണ് കേന്ദ്രസർക്കാർ പ്രഥമ പരിഗണന നൽകുന്നതെന്നും പ്രധാനമന്ത്രി നരേന്ദ്ര മോദി. ഡൽഹിയിലെ ഭാരത് മണ്ഡപത്തിൽ സംഘടിപ്പിച്ച 'വീർ ബാൽ ദിവസ്' ചടങ്ങിൽ സംസാരിക്കുകയായിരുന്നു അദ്ദേഹം.(Gen Z and Gen Alpha will transform India into a developed nation, says PM Modi)
ഇന്നത്തെ യുവജനത ജെൻ സി, ജെൻ ആൽഫ എന്നിവയെ പ്രതിനിധീകരിക്കുന്നു. ഇന്ത്യയെ ഒരു വികസിത രാഷ്ട്രമായി മാറ്റുന്നത് ഈ തലമുറയായിരിക്കുമെന്ന് അദ്ദേഹം പറഞ്ഞു. മുൻകാലങ്ങളിൽ നിരാശാജനകമായ അന്തരീക്ഷത്തിൽ സ്വപ്നം കാണാൻ പോലും ഭയന്നിരുന്ന സ്ഥിതിയായിരുന്നു. എന്നാൽ ഇന്ന് രാജ്യം പ്രതിഭകളെ തേടിപ്പിടിക്കുകയും അവർക്ക് മതിയായ വേദികൾ ഒരുക്കുകയും ചെയ്യുന്നു. 140 കോടി ജനങ്ങളുടെ ശക്തി യുവാക്കളുടെ അഭിലാഷങ്ങൾക്കൊപ്പമുണ്ടെന്നും അദ്ദേഹം കൂട്ടിച്ചേർത്തു.
ഡിജിറ്റൽ ഇന്ത്യയിലൂടെ ഇന്റർനെറ്റിന്റെയും അറിവിന്റെയും കരുത്ത് യുവാക്കൾക്ക് ലഭിച്ചു. സ്റ്റാർട്ടപ്പ് ഇന്ത്യ, ഖേലോ ഇന്ത്യ തുടങ്ങിയ പദ്ധതികൾ ശാസ്ത്ര-സാങ്കേതിക-കായിക മേഖലകളിൽ മാറ്റങ്ങൾ കൊണ്ടുവരുന്നു. മേരാ യുവ ഭാരത് പോലുള്ള വേദികൾ യുവാക്കളുടെ നേതൃത്വപാടവം വികസിപ്പിക്കാൻ സഹായിക്കുമെന്നും പ്രധാനമന്ത്രി പറഞ്ഞു.
താല്ക്കാലികമായ ആകർഷണങ്ങളിൽ കുടുങ്ങിപ്പോകരുത്. ചിന്തകളിലും തത്വങ്ങളിലും വ്യക്തത പുലർത്തണം. മഹത്തായ വ്യക്തിത്വങ്ങളിൽ നിന്ന് പാഠങ്ങൾ ഉൾക്കൊള്ളണമെന്നും യുവാക്കളോട് അദ്ദേഹം നിർദ്ദേശിച്ചു. ഗുരു ഗോവിന്ദ് സിങ്ങിന്റെ പുത്രന്മാരായ ബാബാ ജോരാവർ സിങ് ജി, ബാബാ ഫത്തേ സിങ് ജി എന്നിവരുടെ ധീരമായ രക്തസാക്ഷിത്വത്തിന്റെ ഓർമ്മയ്ക്കായാണ് ഡിസംബർ 26 'വീർ ബാൽ ദിവസ്' ആയി ആചരിക്കുന്നത്. 2022 ജനുവരിയിലാണ് പ്രധാനമന്ത്രി ഈ പ്രഖ്യാപനം നടത്തിയത്.