മുംബൈ: പ്രശസ്ത പത്രപ്രവർത്തക ഗൗരി ലങ്കേഷിന്റെ കൊലപാതകക്കേസിലെ പ്രതി ശ്രീകാന്ത് പംഗാർക്കർ മഹാരാഷ്ട്രയിലെ ജൽനയിൽ നടന്ന നഗരസഭാ തിരഞ്ഞെടുപ്പിൽ ഉജ്ജ്വല വിജയം നേടി. ജൽന മുനിസിപ്പൽ കോർപ്പറേഷനിലെ വാർഡ് നമ്പർ 13-ൽ നിന്ന് സ്വതന്ത്ര സ്ഥാനാർത്ഥിയായി മത്സരിച്ച പംഗാർക്കർ, ബി.ജെ.പി സ്ഥാനാർത്ഥി റാവുസാഹേബ് ധോബ്ലെയെ 184 വോട്ടുകൾക്ക് പരാജയപ്പെടുത്തിയാണ് കൗൺസിലറായി തിരഞ്ഞെടുക്കപ്പെട്ടത്.
മുൻപ് അവിഭക്ത ശിവസേനയുടെ കൗൺസിലറായിരുന്ന (2001-2006) പംഗാർക്കർ, 2011-ൽ പാർട്ടി സീറ്റ് നിഷേധിച്ചതിനെത്തുടർന്ന് ഹിന്ദു ജനജാഗൃതി സമിതിയിൽ ചേർന്നിരുന്നു. ഗൗരി ലങ്കേഷ് വധക്കേസിൽ ഗൂഢാലോചന നടത്തിയെന്ന ആരോപണത്തെത്തുടർന്ന് 2018 ഓഗസ്റ്റിൽ മഹാരാഷ്ട്ര ഭീകരവിരുദ്ധ സേന (ATS) ഇയാളെ അറസ്റ്റ് ചെയ്തു. ആയുധങ്ങൾ ശേഖരിച്ചതിനും പരിശീലനം നൽകിയതിനും പംഗാർക്കറിനെതിരെ യു.എ.പി.എ (UAPA) ഉൾപ്പെടെയുള്ള കുറ്റങ്ങൾ ചുമത്തിയിരുന്നു.
2024 സെപ്റ്റംബറിൽ കർണാടക ഹൈക്കോടതിയിൽ നിന്ന് ജാമ്യം ലഭിച്ചതോടെയാണ് പംഗാർക്കർ വീണ്ടും സജീവ രാഷ്ട്രീയത്തിലേക്ക് എത്തിയത്. കഴിഞ്ഞ നിയമസഭാ തിരഞ്ഞെടുപ്പിന് മുന്നോടിയായി ഏക്നാഥ് ഷിൻഡെയുടെ നേതൃത്വത്തിലുള്ള ശിവസേനയിൽ ചേർന്നത് വലിയ പ്രതിഷേധങ്ങൾക്ക് കാരണമായിരുന്നു. ഇതേത്തുടർന്ന് മുഖ്യമന്ത്രി ഷിൻഡെ ഇയാളുടെ അംഗത്വം റദ്ദാക്കിയിരുന്നു. ഇത്തവണ ശിവസേന (ഷിൻഡെ വിഭാഗം) പംഗാർക്കറിനെതിരെ സ്ഥാനാർത്ഥിയെ നിർത്തിയിരുന്നില്ല എന്നത് ശ്രദ്ധേയമാണ്.
രാജ്യത്തെ നടുക്കിയ ഒരു രാഷ്ട്രീയ കൊലപാതകക്കേസിലെ പ്രതി ജനപ്രതിനിധിയായി തിരഞ്ഞെടുക്കപ്പെട്ടത് ജനാധിപത്യ മൂല്യങ്ങളെക്കുറിച്ചുള്ള പുതിയ ചർച്ചകൾക്ക് വഴിമരുന്നിട്ടിരിക്കുകയാണ്.