ലക്നൗ: ഉത്തർപ്രദേശിലെ ഫിറോസാബാദിൽ വീടിന്റെ മേൽക്കൂര തകർന്നു വീണ് നാലര വയസുകാരി മരിച്ചു (Firozabad House Collapse). ദൗലത്പുർ ഗ്രാമത്തിൽ നിർമ്മാണത്തിലിരുന്ന വീടിന്റെ രണ്ടാം നിലയിലെ സ്ലാബ് വാർക്കുന്നതിനിടെയാണ് അപകടമുണ്ടായത്. വീട്ടുയമസ്ഥന്റെ മകളാണ് മരിച്ചത്.
വെള്ളിയാഴ്ച ഉച്ചയോടെ വീടിന്റെ രണ്ടാം നിലയുടെ മേൽക്കൂര നിർമ്മാണത്തിലിരിക്കെ പെട്ടെന്ന് തകർന്നു വീഴുകയായിരുന്നു. വീട്ടുടമസ്ഥനും കുടുംബാംഗങ്ങളും നിർമ്മാണ തൊഴിലാളികളും കെട്ടിടാവശിഷ്ടങ്ങൾക്കിടയിൽ അകപ്പെട്ടു. ഉടൻ തന്നെ നാട്ടുകാരും പോലീസും ചേർന്ന് എല്ലാവരെയും പുറത്തെടുത്ത് ആശുപത്രിയിലെത്തിച്ചു.
ആശുപത്രിയിൽ ചികിത്സയിലിരിക്കെയാണ് വീട്ടുടമസ്ഥന്റെ നാലര വയസുള്ള പെൺകുട്ടി മരണത്തിന് കീഴടങ്ങിയത്. പരിക്കേറ്റ മറ്റുള്ളവർ ചികിത്സയിൽ തുടരുകയാണ്. നിർമ്മാണത്തിലെ അപാകതയാണോ അപകടത്തിന് കാരണമെന്ന് പോലീസ് അന്വേഷിച്ചുവരികയാണ്. സംഭവത്തിൽ ഗ്രാമവാസികൾ ഒന്നടങ്കം ദുഃഖത്തിലാണ്.
