പട്ന: നിയമനക്കത്ത് വിതരണ ചടങ്ങിൽ വെച്ച് ബിഹാർ മുഖ്യമന്ത്രി നിതീഷ് കുമാർ പരസ്യമായി മുഖാവരണം വലിച്ചു താഴ്ത്തിയ മുസ്ലിം വനിതാ ഡോക്ടർ നുസ്രത് പർവീൺ ജോലി ഉപേക്ഷിക്കുന്നു. അപമാനഭാരം കാരണം ജോലിയിൽ പ്രവേശിക്കാൻ താല്പര്യമില്ലെന്നാണ് ഇവർ വ്യക്തമാക്കിയത്. ഈ മാസം 20-ന് ജോലിയിൽ പ്രവേശിക്കാനായിരുന്നു ഡോക്ടർക്ക് ലഭിച്ച നിർദ്ദേശം. കുടുംബാംഗങ്ങൾ ഇവരെ ആശ്വസിപ്പിക്കാനും ജോലിയിൽ ചേരാൻ പ്രേരിപ്പിക്കാനും ശ്രമിക്കുന്നുണ്ടെങ്കിലും നുസ്രത് തന്റെ തീരുമാനത്തിൽ ഉറച്ചുനിൽക്കുകയാണ്.(Female doctor who's Niqab was pulled down by Nitish Kumar to quit job due to humiliation)
ഡിസംബർ 15-ന് ആയുഷ് ഡോക്ടർമാർക്കുള്ള നിയമനക്കത്ത് വിതരണ ചടങ്ങിനിടെയായിരുന്നു വിവാദ സംഭവം. സർട്ടിഫിക്കറ്റ് നൽകുന്നതിനിടെ നുസ്രത് പർവീണിന്റെ നിഖാബ് (മുഖാവരണം) നിതീഷ് കുമാർ ബലമായി വലിച്ചുതാഴ്ത്താൻ ശ്രമിക്കുകയായിരുന്നു. വേദിയിലുണ്ടായിരുന്ന ഉപമുഖ്യമന്ത്രി സാമ്രാട്ട് ചൗധരി മുഖ്യമന്ത്രിയെ തടയാൻ ശ്രമിച്ചെങ്കിലും ഇതിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുകയും വലിയ പ്രതിഷേധത്തിന് വഴിവെക്കുകയും ചെയ്തു.
നിതീഷ് കുമാറിന്റെ നടപടി ജമ്മു കശ്മീരിലെ രാഷ്ട്രീയ നേതാക്കൾക്കിടയിൽ വലിയ വാക്പോരിന് കാരണമായി. സംഭവത്തിൽ പ്രതികരിച്ച മുഖ്യമന്ത്രി ഒമർ അബ്ദുള്ള മുൻ മുഖ്യമന്ത്രി മെഹബൂബ മുഫ്തിയെ കടന്നാക്രമിച്ചു. വർഷങ്ങൾക്ക് മുൻപ് ഒരു പോളിംഗ് സ്റ്റേഷനിൽ വെച്ച് വോട്ടറുടെ ബുർഖ അഴിച്ചുമാറ്റിയ മെഹബൂബ മുഫ്തിയുടെ "മതേതര പ്രവൃത്തിയുടെ" തുടർച്ചയാണ് നിതീഷിന്റേതെന്ന് ഒമർ പരിഹസിച്ചു. രണ്ട് സംഭവങ്ങളും ഒരുപോലെ ഖേദകരമാണെന്നും നിതീഷ് കുമാർ തന്റെ യഥാർത്ഥ നിറം പുറത്തെടുക്കുകയാണെന്നും അദ്ദേഹം കൂട്ടിച്ചേർത്തു.
ഒമർ അബ്ദുള്ളയുടെ പ്രസ്താവന ലജ്ജാകരമാണെന്ന് പി.ഡി.പി വക്താവ് മോഹിത് ഭാനും ഇൽതിജ മുഫ്തിയും പ്രതികരിച്ചു. ഒരു മുസ്ലിം സ്ത്രീ പൊതുമധ്യത്തിൽ അപമാനിക്കപ്പെടുമ്പോൾ കുറ്റവാളിയെ പ്രതിരോധിക്കാനാണ് ഒമർ ശ്രമിക്കുന്നതെന്നും, ഇന്ത്യൻ മുസ്ലീങ്ങളെ രണ്ടാം തരം പൗരന്മാരാക്കാനാണ് അദ്ദേഹം വാദിക്കുന്നതെന്നും ഇൽതിജ മുഫ്തി ആരോപിച്ചു. പ്രതിപക്ഷവും ഈ പ്രവൃത്തിക്കെതിരെ പ്രതിഷേധിച്ചിരുന്നു.