റായ്പൂർ (ഛത്തീസ്ഗഢ്): മകൾക്ക് സ്കൂട്ടർ വാങ്ങാൻ ആറുമാസത്തോളം കഷ്ടപ്പെട്ട് നാണയങ്ങൾ സ്വരൂപിച്ച ഒരു അച്ഛൻ്റെ കഥയാണ് ഇപ്പോൾ സമൂഹ മാധ്യമങ്ങളിൽ ശ്രദ്ധ നേടുന്നത്. ഛത്തീസ്ഗഢിലെ ഒരു കർഷകനാണ് തൻ്റെ സ്നേഹം നിറച്ച നാണയങ്ങൾ ചാക്കിലാക്കി ഷോറൂമിൽ എത്തിച്ച് മകൾക്ക് സ്കൂട്ടർ സമ്മാനിച്ചത്.
ജാഷ്പൂർ ജില്ലയിലെ ഫോർപ്പൂരിൽ നിന്നുള്ള ബജ്‌റംഗ് റാം ഭഗത് എന്ന കർഷകനാണ് ഈ സ്നേഹസമ്മാനം നൽകിയത്. ആറുമാസംകൊണ്ട് സ്വരൂപിച്ച 40,000 രൂപയുടെ നാണയങ്ങളാണ് ചാക്കുകളിലാക്കി ഇദ്ദേഹം ഷോറൂമിൽ എത്തിച്ചത്. ഇതിൽ അധികവും 10 രൂപയുടേയും 20 രൂപയുടേയും നാണയങ്ങളായിരുന്നു. സ്കൂട്ടറിൻ്റെ വില: 98,700 രൂപ വിലവരുന്ന സ്കൂട്ടറാണ് അദ്ദേഹം മകൾക്കായി വാങ്ങിയത്. നാണയങ്ങൾക്ക് പുറമെയുള്ള തുക നോട്ടുകളായി നൽകി. നാണയങ്ങൾ എണ്ണിത്തീർക്കാൻ ഷോറൂം ജീവനക്കാർക്ക് മണിക്കൂറുകളോളം സമയമെടുത്തു.
ലോൺ എടുക്കുന്നതിന് പകരം മുഴുവൻ പണവും നൽകി സ്കൂട്ടർ വാങ്ങാനാണ് താൻ തീരുമാനിച്ചതെന്ന് ഭഗത് പറഞ്ഞു.ബികോം വിദ്യാർഥിനിയായ മകൾക്ക് കോളേജിൽ പോക്ക് എളുപ്പമാക്കാൻ വേണ്ടിയാണ് ഈ സ്കൂട്ടർ സമ്മാനിച്ചതെന്നും അദ്ദേഹം കൂട്ടിച്ചേർത്തു.
ഇടപാട് തീർത്ത് സ്കൂട്ടറിൻ്റെ താക്കോൽ നൽകിയതിനൊപ്പം, ഫെസ്റ്റിവ് ലക്കി ഡ്രോ ഓഫറിലൂടെ ഒരു മിക്സിയും ഇവർക്ക് സമ്മാനമായി ലഭിച്ചു.