മൈസൂരുവിൽ നരഭോജി കടുവയുടെ ആക്രമണത്തിൽ കർഷകൻ കൊല്ലപ്പെട്ടു |Tiger attack

ബംഗളൂരു: മൈസൂരു ജില്ലയിലെ സരഗുരു താലൂക്കിലെ മുള്ളൂർ ഗ്രാമത്തിൽ നരഭോജി കടുവയുടെ ആക്രമണത്തിൽ കർഷകൻ കൊല്ലപ്പെട്ടു. മുള്ളൂർ സ്വദേശി രാജശേഖര മൂർത്തിയാണ്(58) മരിച്ചത്. ഉച്ചകഴിഞ്ഞ് തുറസ്സായ വയലിൽ തന്റെ കന്നുകാലികളെ മേയ്ക്കുന്നതിനിടെയാണ് മൂർത്തിയെ ആക്രമിച്ചത്.

മൈസൂരുവിൽ ഒരു മാസത്തിനിടെ നടക്കുന്ന രണ്ടാമത്തെ കടുവ ആക്രമണമാണിത്. നേരത്തെ, ബഡഗൽപുര ഗ്രാമത്തിൽ ഒരാൾ കൊല്ലപ്പെട്ടിരുന്നു.ഹെഡിയാലയിലെ വനംവകുപ്പ് ഉദ്യോഗസ്ഥരും ജീവനക്കാരും സരഗുരു പൊലീസും സംഭവസ്ഥലത്ത് ക്യാമ്പ് ചെയ്യുന്നുണ്ട്.

തുടരെയുള്ള ആക്രമണങ്ങളിൽ നരഭോജിയായ കടുവയെ പിടികൂടുന്നതിൽ വനംവകുപ്പിന്റെ അവഗണനയും പരാജയവും ആരോപിച്ച് മുള്ളൂരിലെയും സമീപ ഗ്രാമങ്ങളിലെയും രോഷാകുലരായ ഗ്രാമവാസികൾ പ്രതിഷേധ പ്രകടനം നടത്തി.