ന്യൂഡൽഹി: അൽ മക്തൂം അന്താരാഷ്ട്ര വിമാനത്താവളത്തിൽ നടന്ന ദുബായ് എയർഷോയുടെ അവസാന ദിവസത്തെ വ്യോമാഭ്യാസ പ്രകടനത്തിനിടെ ഇന്ത്യൻ വ്യോമസേനയുടെ തേജസ് യുദ്ധവിമാനം തകർന്നുവീണത് കാണികളെ ഞെട്ടിച്ചു. ഉച്ചയ്ക്ക് 2:10-ന് ശേഷം പ്രകടനം ആരംഭിച്ച് ഏകദേശം മൂന്ന് മിനിറ്റുകൾക്ക് ശേഷമാണ് ദുരന്തം സംഭവിച്ചത്. വിമാനത്തിന്റെ പൈലറ്റും വിംഗ് കമാൻഡറുമായ ഹിമാചൽ പ്രദേശ് കംഗ്ര സ്വദേശി നമൻഷ് സ്യാൽ വീരമൃത്യു വരിച്ചു.(Eyewitnesses shocked by Indian Tejas fighter jet crash)
രാവിലെ മുതൽ വലിയ ജനക്കൂട്ടമാണ് എയർഷോ കാണാൻ എത്തിയിരുന്നത്. ഉച്ചയ്ക്ക് 1:30 ഓടെ ഇന്ത്യയുടെ സൂര്യ കിരൺ ടീം നടത്തിയ ഹൃദയാകൃതിയിലുള്ള പ്രകടനം ഏറെ ശ്രദ്ധ നേടിയിരുന്നു. എന്നാൽ മിനിറ്റുകൾക്കകം എല്ലാം മാറിമറിഞ്ഞു.
2:10 ന് ശേഷം തേജസ് ജെറ്റ് ആകാശത്ത് പ്രത്യക്ഷപ്പെട്ടു. പ്രകടനം ആരംഭിച്ച് ഏകദേശം മൂന്ന് മിനിറ്റിന് ശേഷം, വിമാനം കുത്തനെ മുകളിലേക്ക് കയറുകയും മധ്യഭാഗത്ത് വെച്ച് നിയന്ത്രണം നഷ്ടപ്പെടുന്നതായി തോന്നുകയും ചെയ്തു. തുടർന്ന് കാണികൾക്ക് മുന്നിലുള്ള തുറന്ന സ്ഥലത്തേക്ക് അതിവേഗം തകർന്നുവീഴുകയായിരുന്നു. പൈലറ്റ് കാണികളെ രക്ഷിക്കാൻ ശ്രമിച്ചതായി തോന്നുന്നുവെന്നാണ് ദൃക്‌സാക്ഷികൾ പറഞ്ഞത്.