ന്യൂഡൽഹി: പുകയില ഉത്പന്നങ്ങൾക്കുമേൽ ഉയർത്തിയ തീരുവ, ധനകാര്യ കമ്മീഷൻ്റെ ശുപാർശകൾ അനുസരിച്ച് സംസ്ഥാനങ്ങളിൽ നിന്ന് ഈടാക്കുമെന്ന് കേന്ദ്ര ധനമന്ത്രി നിർമല സീതാരാമൻ രാജ്യസഭയിൽ അറിയിച്ചു. ഈ തീരുവ സെസ് അല്ല, എക്സൈസ് ഡ്യൂട്ടിയാണ് എന്നും മന്ത്രി കൂട്ടിച്ചേർത്തു. പുകയില കർഷകരെയും ബീഡി തൊഴിലാളികളെയും ഈ നടപടി ദോഷകരമായി ബാധിക്കില്ലെന്ന് മന്ത്രി ഉറപ്പുനൽകി. (Excise duty on tobacco products to be increased)
രാജ്യത്ത് 49.82 ലക്ഷം രജിസ്റ്റർ ചെയ്ത ബീഡി തൊഴിലാളികൾ ഉണ്ടെന്നും ധനമന്ത്രി വ്യക്തമാക്കി. 1944-ലെ സെൻട്രൽ എക്സൈസ് ആക്ട് ഭേദഗതി ചെയ്യുന്നതിനാണ് ഈ നിയമനിർമ്മാണം ലക്ഷ്യമിടുന്നത്. സിഗരറ്റ്, സിഗാർ, ഹുക്ക, സർദ തുടങ്ങിയ പുകയില ഉൽപ്പന്നങ്ങളുടെ എക്സൈസ് തീരുവയാണ് വർധിക്കുന്നത്.
സിഗരറ്റുകളുടെ നീളത്തിനനുസരിച്ചാകും ഇനി നികുതി ചുമത്തുക. 1,000 സിഗരറ്റുകൾക്ക് 2,700 രൂപ മുതൽ 11,000 രൂപ വരെ ലെവി ഏർപ്പെടുത്താനാണ് നിർദേശം. 65 എം.എം വരെ നീളമുള്ള ഫിൽട്ടർ സിഗരറ്റുകൾക്ക് 1,000 എണ്ണത്തിന് 3,000 രൂപയും, 65 മുതൽ 70 എം.എം വരെ നീളമുള്ളവയ്ക്ക് 1,000 എണ്ണത്തിന് 4,500 രൂപയും നികുതി ചുമത്തും.
ചുരുട്ട്, ച്യൂയിങ് ടുബാക്കോ തുടങ്ങിയ ഉൽപ്പന്നങ്ങൾക്ക് 25 ശതമാനം ഡ്യൂട്ടി ഏർപ്പെടുത്താനും നിർദേശമുണ്ട്. പാൻമസാലയുടെ കാര്യത്തിൽ, ഉൽപ്പാദനത്തിനുള്ള സെസ് കമ്പനികളിലെ മെഷീനുകളുടെ ഉൽപ്പാദന ശേഷി അടിസ്ഥാനമാക്കിയാകും ചുമത്തുക. ഇത് പാൻമസാല മേഖലയിൽ പുതിയൊരു നികുതി ഘടന കൊണ്ടുവരും.