ജോലിസ്ഥലത്തെ നേതൃസ്ഥാനങ്ങളിൽ പുരുഷന്മാരാണോ അതോ സ്ത്രീകളാണോ കൂടുതൽ അനുയോജ്യർ എന്ന കാര്യത്തിൽ പുതിയ ചർച്ചകൾക്ക് വഴിതുറക്കുകയാണ് നോയിഡയിലെ ഒരു സ്വകാര്യ കമ്പനിയിൽ നിന്നുള്ള വൈറൽ വീഡിയോ. നോയിഡ ആസ്ഥാനമായി പ്രവർത്തിക്കുന്ന 'ക്ലൗഡ് സയൻസ് ലാബ്സ്' എന്ന സ്ഥാപനത്തിലെ ജീവനക്കാർക്കിടയിൽ നടത്തിയ ഒരു രസകരമായ അഭിപ്രായപ്രകടനമാണ് ഇപ്പോൾ സോഷ്യൽ മീഡിയയിൽ വലിയ വിവാദങ്ങൾക്കും ചർച്ചകൾക്കും കാരണമായിരിക്കുന്നത്. (Manager)
സോഷ്യൽ മീഡിയയിൽ ട്രെൻഡായ 'ദിസ് ഓർ ദാറ്റ്' എന്ന ചലഞ്ചിന്റെ ഭാഗമായാണ് കമ്പനി ഈ വീഡിയോ ഇൻസ്റ്റഗ്രാമിൽ പങ്കുവെച്ചത്. ജീവനക്കാർക്ക് രണ്ട് ഓപ്ഷനുകൾ നൽകുകയും അതിൽ ഒന്ന് തിരഞ്ഞെടുക്കാൻ ആവശ്യപ്പെടുകയുമായിരുന്നു. ഇതിൽ പ്രധാനപ്പെട്ട ഒരു ചോദ്യം 'വനിതാ മാനേജറെയാണോ അതോ പുരുഷ മാനേജറെയാണോ നിങ്ങൾ ഇഷ്ടപ്പെടുന്നത്?' എന്നതായിരുന്നു. അതിശയകരമെന്നു പറയട്ടെ, സർവേയിൽ പങ്കെടുത്ത എല്ലാ ജീവനക്കാരും ഒരുപോലെ തിരഞ്ഞെടുത്തത് 'പുരുഷ മാനേജർ' എന്ന ഓപ്ഷനായിരുന്നു. ഇതിൽ കൗതുകകരമായ കാര്യം, കമ്പനിയിലെ വനിതാ ജീവനക്കാരും പുരുഷ മാനേജർമാരെയാണ് പിന്തുണച്ചത് എന്നതാണ്. ഈ വീഡിയോ പുറത്തുവന്നതോടെ വലിയ തോതിലുള്ള വിമർശനങ്ങളാണ് കമ്പനിക്കും ജീവനക്കാർക്കും എതിരെ ഉയരുന്നത്.
വീഡിയോ വൈറലായതോടെ ഭിന്നമായ അഭിപ്രായങ്ങളാണ് നെറ്റിസൺസ് പങ്കുവെക്കുന്നത്. 'സ്ത്രീകൾ പോലും വനിതാ മാനേജർമാരെ പിന്തുണയ്ക്കുന്നില്ല എന്നത് നിരാശാജനകമാണെ'ന്ന് പലരും കമന്റ് ചെയ്തു. സ്ത്രീകൾ നേതൃസ്ഥാനങ്ങളിൽ എത്തുമ്പോൾ നേരിടേണ്ടി വരുന്ന വിവേചനത്തിന്റെയും പിന്തുണയില്ലായ്മയുടെയും തെളിവാണ് ഇതെന്നും ചിലർ വാദിച്ചു. 'എനിക്ക് വളരെ മികച്ചൊരു വനിതാ സൂപ്പർവൈസറുണ്ട്. പലപ്പോഴും സ്ത്രീകളെ ആളുകൾ വിലകുറച്ചു കാണുകയാണ്' എന്നാണ് ഒരാൾ കുറിച്ചത്. ലിംഗഭേദം ഇതിലൊരു ഘടകമല്ല, കാര്യക്ഷമതയാണ് പ്രധാനം, എന്നായിരുന്നു മറ്റൊരു അഭിപ്രായം. വീഡിയോയുടെ മുൻനിരയിലുണ്ടായിരുന്ന നാല് വനിതാ ജീവനക്കാരെ വിമർശിച്ചുകൊണ്ട്, 'ഇവർക്ക് ഒരിക്കലും നല്ലൊരു ടീം ലീഡറാകാൻ കഴിയില്ല' എന്നുവരെ ചിലർ രൂക്ഷമായി പ്രതികരിച്ചു.