ന്യൂഡൽഹി: എത്യോപ്യയിലെ ഹെയ്‌ലി ഗുബ്ബി അഗ്നിപർവതം പൊട്ടിത്തെറിച്ചതിനെ തുടർന്ന് അന്തരീക്ഷത്തിലേക്ക് ഉയർന്ന ചാരം നിറഞ്ഞ മേഘങ്ങൾ ഇന്ത്യയിലേക്ക് നീങ്ങുന്നുവെന്ന വിലയിരുത്തലിൻ്റെ അടിസ്ഥാനത്തിൽ രാജ്യത്തെ വിമാനക്കമ്പനികൾ അതീവ ജാഗ്രതയിൽ. ഇൻഡിഗോ, ആകാശ എയർ, എയർ ഇന്ത്യ തുടങ്ങിയ പ്രമുഖ വിമാനക്കമ്പനികളെല്ലാം യാത്രക്കാർക്കായി പ്രത്യേക അറിയിപ്പുകൾ പുറപ്പെടുവിച്ചു.(Ethiopian volcano erupts, Indian airlines on high alert)
അഗ്നിപർവത ചാരം നിലവിൽ പടിഞ്ഞാറൻ ഇന്ത്യൻ സംസ്ഥാനങ്ങൾക്ക് മുകളിലേക്കാണ് പറന്നെത്തുന്നത്. വിമാന എൻജിനുകൾക്ക് ചാരം ഭീഷണിയാകാൻ സാധ്യതയുള്ള സാഹചര്യത്തിലാണ് ജാഗ്രതാ നിർദേശം. യാത്രക്കാരുടെ സുരക്ഷയ്ക്കാണ് മുൻഗണനയെന്നും സാഹചര്യം സൂക്ഷ്മമായി നിരീക്ഷിക്കുകയാണെന്നും ഇൻഡിഗോ സോഷ്യൽ മീഡിയ പ്ലാറ്റ്‌ഫോമുകളിലൂടെ വ്യക്തമാക്കി. യാത്രക്കാർക്ക് ആവശ്യമായ എല്ലാ സഹായവും നൽകുന്നതിനായി പ്രത്യേക ടീമിനെ സജ്ജമാക്കിയതായും കമ്പനി അറിയിച്ചു.
നിലവിൽ വിമാന സർവീസുകൾക്ക് പ്രശ്‌നങ്ങളൊന്നും ഇല്ലെങ്കിലും സാഹചര്യം അതീവ ഗൗരവത്തോടെ വീക്ഷിക്കുന്നതായി എയർ ഇന്ത്യയും ആകാശ എയറും അറിയിച്ചിട്ടുണ്ട്. അന്താരാഷ്ട്ര സർവീസുകൾ തടസ്സപ്പെടാൻ സാധ്യതയുണ്ടെന്ന് മുംബൈ അന്താരാഷ്ട്ര വിമാനത്താവള അധികൃതർ അറിയിച്ചു.
ഏകദേശം 10,000 വർഷമായി നിഷ്ക്രിയമായിരുന്ന ഹെയ്‌ലി ഗുബ്ബി അഗ്നിപർവതം ഞായറാഴ്ച രാവിലെ 8:30 ഓടെയാണ് പൊട്ടിത്തെറിച്ചത്. നിലവിൽ ഇവിടെ സ്ഫോടനം അവസാനിച്ചതായാണ് റിപ്പോർട്ട്. ഞായറാഴ്ച ചെങ്കടലിന് കുറുകെ ഒമാനിലേക്കും യെമനിലേക്കും വ്യാപിച്ച ചാരമേഘങ്ങൾ അവിടെനിന്ന് കിഴക്കൻ ദിശയിൽ ഇന്ത്യ ലക്ഷ്യമിട്ട് നീങ്ങുകയാണ്. അന്തരീക്ഷത്തിൽ ചാരത്തിൻ്റെ സാന്നിധ്യം ഉണ്ടെങ്കിലും, വിമാന ഗതാഗതത്തെ ബാധിക്കുന്ന തരത്തിലുള്ള സുരക്ഷാ അറിയിപ്പുകൾ ഇതുവരെ പുറപ്പെടുവിച്ചിട്ടില്ല. എന്നാൽ മുൻകരുതലിൻ്റെ ഭാഗമായി വിമാനക്കമ്പനികൾ സ്ഥിതിഗതികൾ കർശനമായി നിരീക്ഷിച്ച് വരികയാണ്.