ഭോപ്പാൽ: മധ്യപ്രദേശിലെ രത്‌ലാമിൽ സ്കൂൾ അധികൃതരുടെ നടപടിയെ ഭയന്ന് എട്ടാം ക്ലാസ്സുകാരൻ സ്കൂളിന്റെ മൂന്നാം നിലയിൽ നിന്ന് ചാടി ആത്മഹത്യക്ക് ശ്രമിച്ചു. ഗുരുതരമായി പരിക്കേറ്റ വിദ്യാർത്ഥിയെ ഉടൻ സ്വകാര്യ ആശുപത്രിയിൽ പ്രവേശിപ്പിച്ചു. രത്‌ലാമിലെ ഡോംഗ്രെ നഗറിലെ സ്കൂളിലാണ് സംഭവം നടന്നത്. വ്യാഴാഴ്ച എട്ടാം ക്ലാസ്സുകാരൻ മൊബൈൽ ഫോൺ സ്കൂളിൽ കൊണ്ടുവന്നു. ക്ലാസ് മുറിയിലെ വീഡിയോ റെക്കോർഡ് ചെയ്‌ത് അത് സോഷ്യൽ മീഡിയയിൽ അപ്‌ലോഡ് ചെയ്‌തെന്നും അധികൃതർ പറയുന്നു.(Eighth grader jumps from third floor of school, condition critical)
കുട്ടി സ്കൂൾ നിയമങ്ങൾ ലംഘിച്ചെന്ന് കാണിച്ച് അധികൃതർ മാതാപിതാക്കളെ വിളിച്ചുവരുത്തി. തുടർന്ന് പോലീസ് സ്കൂളിലെ സി.സി.ടി.വി. ദൃശ്യങ്ങൾ പരിശോധിച്ചപ്പോൾ, വിദ്യാർത്ഥി പ്രിൻസിപ്പലിന്റെ ഓഫീസിൽ പ്രവേശിക്കുന്നതായി കണ്ടു. ഭയത്തിലും നിരാശയിലുമായിരുന്ന കുട്ടി നാല് മിനിറ്റോളം പ്രിൻസിപ്പലിനോട് ക്ഷമിക്കണമെന്ന് ആവർത്തിച്ച് അപേക്ഷിച്ചു. ഏകദേശം 52 തവണ കുട്ടി "ക്ഷമിക്കണം" എന്ന് ആവർത്തിച്ചതായാണ് ദൃശ്യങ്ങളിൽ നിന്ന് വ്യക്തമാകുന്നത്.
സസ്‌പെൻഡ് ചെയ്യുമെന്നും കായിക ഇനങ്ങളിൽ നേടിയ മെഡലുകൾ തിരിച്ചെടുക്കുമെന്നും പ്രിൻസിപ്പൽ പറഞ്ഞതായി വിദ്യാർത്ഥി പിന്നീട് വിശദീകരിച്ചു. സ്കേറ്റിംഗിൽ ദേശീയ തലത്തിൽ രണ്ടു തവണ മത്സരിച്ച കുട്ടി ഈ ഭീഷണി കേട്ടപ്പോൾ തകർന്നുപോവുകയായിരുന്നു. പ്രിൻസിപ്പലിന്റെ ഓഫീസിൽ നിന്ന് പുറത്തേക്ക് ഓടിയ വിദ്യാർത്ഥി ഉടൻതന്നെ സ്കൂളിന്റെ മൂന്നാം നിലയിൽ നിന്ന് താഴേക്ക് ചാടി.
കുട്ടിയുടെ അച്ഛൻ പ്രീതം കട്ടാര സ്കൂളിലെ വെയ്റ്റിങ് റൂമിൽ ഇരിക്കുമ്പോഴാണ് സംഭവം. സ്കൂളിൽ എത്തിയപ്പോൾ "അവൻ വീണുപോയി" എന്നാണ് അധികൃതർ പറഞ്ഞതെന്നും ഉടനെ ആശുപത്രിയിലേക്ക് തിരിച്ചെന്നും അച്ഛൻ പറഞ്ഞു. കുട്ടി സ്കൂളിലേക്ക് ഫോൺ കൊണ്ടുവന്നത് നിയമത്തിന്റെ ലംഘനമാണെന്നും, ഈ സ്കൂളിൽ അദ്ധ്യാപകർക്കു പോലും ഫോണ്‍ ഉപയോഗിക്കാൻ അനുവാദമില്ലെന്നും എസ്.ഡി.എം. ആർച്ചി ഹരിത് പറഞ്ഞു. അച്ചടക്ക നടപടി സ്വീകരിക്കുന്നതിന് മുമ്പ് കുട്ടിയുടെ പിതാവുമായി സംസാരിക്കാനാണ് വിളിച്ചുവരുത്തിയതെന്നും, അതിനിടെയാണ് അവിചാരിതമായി ഈ സംഭവമുണ്ടായതെന്നുമാണ് സ്കൂൾ അധികൃതർ പ്രതികരിച്ചത്.