ചണ്ഡീഗഢ്: ചണ്ഡീഗഡീൽ ഭൂഗർഭജലം വൻതോതിൽ മലിനമാക്കിയതുമായി ബന്ധപ്പെട്ട കള്ളപ്പണം വെളുപ്പിക്കൽ കേസിൽ മാൽബ്രോസ് ഇൻ്റർനാഷണൽ പ്രൈവറ്റ് ലിമിറ്റഡ് (Malbros International) എന്ന കമ്പനിയുടെ 79.93 കോടി രൂപയുടെ ആസ്തികൾ എൻഫോഴ്സ്മെൻ്റ് ഡയറക്ടറേറ്റ് കണ്ടുകെട്ടി. വ്യവസായശാലയിലെ ശുദ്ധീകരിക്കാത്ത മലിനജലം 'റിവേഴ്സ് ബോറിംഗ്' എന്ന രീതിയിലൂടെ ആഴത്തിലുള്ള ഭൂഗർഭ ജലസ്രോതസ്സുകളിലേക്ക് നേരിട്ട് ഒഴുക്കിവിട്ടു എന്നതാണ് കമ്പനിക്കെതിരെയുള്ള പ്രധാന ആരോപണം.
മലിനജല ശുദ്ധീകരണത്തിനായി ചെലവാകുന്ന വൻതുക ലാഭിക്കാനാണ് കമ്പനി ഈ ക്രൂരത ചെയ്തതെന്ന് ഇ.ഡി കണ്ടെത്തി. ഇത് വഴി ലാഭിച്ച തുക 'കുറ്റകൃത്യത്തിലൂടെ നേടിയ സമ്പാദ്യമായി' കണക്കാക്കിയാണ് ഇ.ഡി നടപടിയെടുത്തത്. ജലന്ധർ സോണൽ ഓഫീസാണ് ഭൂമി, കെട്ടിടങ്ങൾ, യന്ത്രസാമഗ്രികൾ എന്നിവയുൾപ്പെടെയുള്ള ആസ്തികൾ പിടിച്ചെടുത്തത്.
കമ്പനിയുടെ നടപടി മൂലം സമീപത്തെ ഗ്രാമങ്ങളിലെ ഭൂഗർഭജലം കുടിക്കാൻ കഴിയാത്ത വിധം വിഷമയമായി. ഇത് വ്യാപകമായ കൃഷിനാശത്തിനും കന്നുകാലികളുടെ മരണത്തിനും പ്രദേശവാസികൾക്ക് ഗുരുതരമായ ആരോഗ്യപ്രശ്നങ്ങൾക്കും കാരണമായി. പഞ്ചാബ് മലിനീകരണ നിയന്ത്രണ ബോർഡ് നൽകിയ പരാതിയുടെ അടിസ്ഥാനത്തിലാണ് അന്വേഷണം ആരംഭിച്ചത്. 2024 ജൂലൈയിൽ നടത്തിയ റെയ്ഡിൽ 78 ലക്ഷത്തിലധികം രൂപയും ഇ.ഡി പിടിച്ചെടുത്തിരുന്നു. പരിസ്ഥിതി നിയമങ്ങൾ ലംഘിക്കുന്നത് സാമ്പത്തിക കുറ്റകൃത്യമായി (PMLA) കണക്കാക്കി ഇ.ഡി നടത്തുന്ന അപൂർവ്വവും കർശനവുമായ നടപടിയാണിത്.
The Enforcement Directorate (ED) has provisionally attached assets worth Rs 79.93 crore belonging to Malbros International Pvt Ltd, a Punjab-based company, in a money laundering case linked to environmental crimes. The company is accused of injecting untreated industrial wastewater directly into deep aquifers using "reverse boring" to save on effluent treatment costs.