ന്യൂഡൽഹി: പാർലമെന്റിൽ 'നാടകം കളിക്കരുത്' എന്ന പ്രധാനമന്ത്രി നരേന്ദ്ര മോദിയുടെ പരാമർശത്തിൽ വിമർശനവുമായി കോൺഗ്രസ് എം.പി. പ്രിയങ്ക ഗാന്ധി രംഗത്തെത്തി. സഭകളിൽ വിഷയങ്ങൾ ഉന്നയിക്കുന്നതും ചർച്ച ചെയ്യുന്നതും നാടകമല്ല, മറിച്ച് ജനാധിപത്യ പ്രവർത്തനത്തിന്റെ കാതലായ ഭാഗമാണ് എന്ന് പ്രിയങ്ക ഗാന്ധി പ്രതികരിച്ചു.(Drama is not allowing discussions, Priyanka Gandhi gives a scathing reply to Modi)
ഗുരുതരമായ പൊതുപ്രശ്നങ്ങൾ പാർലമെന്റിൽ ഉന്നയിക്കാനാണ് പ്രതിപക്ഷം ഉദ്ദേശിക്കുന്നതെന്നും പ്രിയങ്ക ഗാന്ധി വ്യക്തമാക്കി. "അടിയന്തരമായി ചർച്ച ചെയ്യേണ്ട വിഷയങ്ങളുണ്ട്. തിരഞ്ഞെടുപ്പ് സാഹചര്യം, എസ്.ഐ.ആർ., വായു മലിനീകരണം എന്നിവ വലിയ പ്രശ്നങ്ങളാണ്. നമുക്ക് അവ ചർച്ച ചെയ്യാം. ഇത് നാടകമല്ല. വിഷയങ്ങളെക്കുറിച്ച് സംസാരിക്കുന്നതും പ്രശ്നങ്ങളുയർത്തുന്നതും നാടകമല്ല. ചർച്ചകൾ അനുവദിക്കാത്തതാണ് നാടകം. ജനങ്ങളെ ബാധിക്കുന്ന വിഷയങ്ങളിൽ ജനാധിപത്യപരമായ ചർച്ച നടത്താത്തതാണ് നാടകം."
പാർലമെന്റ് ശീതകാല സമ്മേളനത്തിന് മുന്നോടിയായി മാധ്യമങ്ങളെ അഭിസംബോധന ചെയ്യുമ്പോഴാണ് മോദി പ്രതിപക്ഷത്തെ കടന്നാക്രമിച്ചത്. പാർലമെന്റിൽ നാടകം കളിക്കരുതെന്നും പ്രതിപക്ഷം അവരുടെ ചുമതല നിർവഹിക്കണമെന്നുമായിരുന്നു മോദിയുടെ പ്രധാന പരാമർശം. ബിഹാർ തിരഞ്ഞെടുപ്പിൽ നേരിട്ട പരാജയം ചില പാർട്ടികൾക്ക് ഇപ്പോഴും ദഹിച്ചിട്ടില്ലെന്നും അതിന്റെ അനന്തരഫലം പ്രകടിപ്പിക്കാനുള്ള വേദിയായി പാർലമെന്റ് മാറില്ലെന്ന് പ്രത്യാശിക്കുന്നതായും അദ്ദേഹം പറഞ്ഞിരുന്നു.
പാർലമെന്റിന്റെ ശീതകാല സമ്മേളനം ഇന്ന് ആരംഭിച്ച് ഡിസംബർ 19-ന് അവസാനിക്കും. ഈ സമ്മേളനത്തിൽ സർക്കാർ 13 ബില്ലുകൾ അവതരിപ്പിക്കാൻ ഉദ്ദേശിക്കുന്നുണ്ട്. അതേസമയം, എസ്.ഐ.ആർ. വിഷയം പാർലമെന്റിൽ ഉന്നയിക്കാനാണ് ഇന്ത്യ സഖ്യത്തിന്റെ തീരുമാനം.