ന്യൂഡൽഹി: ഇന്ത്യയുടെ 52-ാമത് ചീഫ് ജസ്റ്റിസ് ബി.ആർ. ഗവായിക്ക് സുപ്രീംകോടതിയിൽ നൽകിയ യാത്രയയപ്പ് ചടങ്ങ് വികാരപരവും എന്നാൽ രസകരവുമായ നിമിഷങ്ങൾക്ക് സാക്ഷ്യം വഹിച്ചു. കോടതിമുറിയിൽ പുഷ്പവൃഷ്ടിക്കൊരുങ്ങിയ അഭിഭാഷകനെ ചിരിയോടെ വിലക്കിക്കൊണ്ടുള്ള ചീഫ് ജസ്റ്റിസിന്റെ പ്രതികരണമാണ് ഏവരുടെയും ശ്രദ്ധ പിടിച്ചുപറ്റിയത്.(Don't throw flowers, BR Gavai spreads laughter)
'പൂവിതളുകൾ എറിയരുത്, മറ്റാർക്കെങ്കിലും കൊടുക്കൂ'
യാത്രയയപ്പ് ചടങ്ങിനിടെ ചീഫ് ജസ്റ്റിസിനെ പ്രശംസിച്ച ശേഷം, താൻ കൊണ്ടുവന്ന പൂവിതളുകളെക്കുറിച്ച് അഭിഭാഷകൻ സൂചിപ്പിച്ചപ്പോഴായിരുന്നു സംഭവം. ചീഫ് ജസ്റ്റിസ് ബി.ആർ. ഗവായ് ഉടൻ ഇടപെട്ട് "പൂവ് എറിയരുത്" എന്ന് നിർദ്ദേശിക്കുകയും, അത് മറ്റാർക്കെങ്കിലും നൽകാൻ അഭിഭാഷകനോട് പറയുകയും ചെയ്തു. ഈ ലളിതമായ പ്രതികരണം കോടതിയിൽ ചിരി പടർത്തി.
കഴിഞ്ഞ മാസം സനാതന ധർമത്തെ അവഹേളിച്ചെന്നാരോപിച്ച് ഒരു അഭിഭാഷകൻ, ജസ്റ്റിസ് ഗവായിക്കുനേരേ കോടതിമുറിയിൽവെച്ച് ഷൂ എറിയാൻ ശ്രമിച്ചത് വിവാദമായിരുന്നു. ഈ പശ്ചാത്തലത്തിൽ, ചീഫ് ജസ്റ്റിസിന്റെ ഈ പ്രതികരണം അദ്ദേഹത്തിന്റെ സൗമ്യതയും നർമ്മബോധവും വ്യക്തമാക്കുന്നതായിരുന്നു.
അവസാന പ്രവൃത്തിദിനമായ വെള്ളിയാഴ്ചയാണ് ചീഫ് ജസ്റ്റിസ് ബി.ആർ. ഗവായ് യാത്ര പറഞ്ഞത്. ഞായറാഴ്ചയാണ് അദ്ദേഹം ഔദ്യോഗികമായി വിരമിക്കുന്നത്. സെറിമോണിയൽ ബെഞ്ചിൽ നിയുക്ത ചീഫ് ജസ്റ്റിസ് സൂര്യകാന്തും ജസ്റ്റിസ് കെ. വിനോദ് ചന്ദ്രനും അദ്ദേഹത്തോടൊപ്പം ഉണ്ടായിരുന്നു.
"രാജ്യത്തിനുവേണ്ടി തന്നാൽ സാധിക്കുന്നതെല്ലാം ചെയ്തതിന്റെ സംതൃപ്തിയോടെയാണ് പടിയിറങ്ങുന്നത്. അഭിഭാഷകനായി തുടങ്ങി ചീഫ് ജസ്റ്റിസ് വരെയായ 40 വർഷത്തെ യാത്ര സംതൃപ്തി നൽകുന്നതാണ്," അദ്ദേഹം പറഞ്ഞു.
ജസ്റ്റിസ് ഗവായ് സഹോദരതുല്യനായിരുന്നെന്നും ക്ഷമയോടെയും മാന്യതയോടെയുമാണ് കേസുകൾ കൈകാര്യം ചെയ്തതെന്നും നിയുക്ത ചീഫ് ജസ്റ്റിസ് സൂര്യകാന്ത് പറഞ്ഞു. സോളിസിറ്റർ ജനറൽ തുഷാർ മേത്ത, അറ്റോർണി ജനറൽ ആർ. വെങ്കട്ടരമണി, സുപ്രീംകോടതി ബാർ അസോസിയേഷൻ പ്രസിഡന്റ് വികാസ് സിങ്, മുതിർന്ന അഭിഭാഷകൻ കപിൽ സിബൽ തുടങ്ങിയവർ ചടങ്ങിൽ പങ്കെടുത്തു.
സുപ്രീംകോടതി ബാർ അസോസിയേഷന്റെ യാത്രയയപ്പ് ചടങ്ങിൽ പങ്കെടുത്ത ചീഫ് ജസ്റ്റിസ്, പട്ടികജാതി വിഭാഗങ്ങളിലെ ക്രീമിലെയർ വിഭാഗത്തെ സംവരണ ആനുകൂല്യങ്ങളിൽനിന്ന് ഒഴിവാക്കണമെന്ന തന്റെ നിലപാടിൽ ഉറച്ചുനിൽക്കുന്നതായി ആവർത്തിച്ചു.