ചെന്നൈ: തെന്നിന്ത്യൻ താരം ധനുഷും ബോളിവുഡ് നടി മൃണാൾ ഠാക്കൂറും വിവാഹിതരാകുന്നു എന്ന വാർത്തകൾ വ്യാജമെന്ന് സ്ഥിരീകരണം. വാലന്റൈൻസ് ഡേയിൽ ഇരുവരും ഒന്നിക്കുന്നു എന്ന തരത്തിൽ പ്രചരിച്ച റിപ്പോർട്ടുകൾ തീർത്തും അടിസ്ഥാനരഹിതമാണെന്ന് ധനുഷിനോട് അടുത്ത വൃത്തങ്ങൾ വ്യക്തമാക്കി. "ഇതൊരു വ്യാജ പ്രചാരണമാണ്, ഇത്തരം വാർത്തകളിൽ വീഴരുത്" എന്ന് ഇവർ പ്രതികരിച്ചതായി പ്രമുഖ ദേശീയ മാധ്യമങ്ങൾ റിപ്പോർട്ട് ചെയ്യുന്നു.
കഴിഞ്ഞ കുറച്ചു നാളുകളായി ഇരുവരും പ്രണയത്തിലാണെന്ന തരത്തിൽ സോഷ്യൽ മീഡിയയിൽ പല കണ്ടെത്തലുകളും ആരാധകർ നടത്തിയിരുന്നു. അജയ് ദേവ്ഗൺ ചിത്രം 'സൺ ഓഫ് സർദാർ 2'-ന്റെ പ്രീമിയറിനിടെ ഇരുവരും ആലിംഗനം ചെയ്തു നിൽക്കുന്ന ചിത്രം വൈറലായിരുന്നു. മൃണാളിന്റെ പിറന്നാൾ ആഘോഷത്തിൽ ധനുഷ് പങ്കെടുത്തതും ചർച്ചയായി. എന്നാൽ അജയ് ദേവ്ഗൺ ക്ഷണിച്ചിട്ടാണ് ധനുഷ് എത്തിയതെന്നായിരുന്നു മൃണാളിന്റെ വിശദീകരണം.
ധനുഷിന്റെ സഹോദരിമാരെ മൃണാൾ ഇൻസ്റ്റഗ്രാമിൽ ഫോളോ ചെയ്യുന്നതും, സ്പോട്ടിഫൈയിൽ ഇരുവരും ഒരേ പ്ലേലിസ്റ്റ് പങ്കുവെക്കുന്നതും ആരാധകർക്കിടയിൽ സംശയങ്ങൾ വർദ്ധിപ്പിച്ചു.
തമിഴ് സൂപ്പർതാരം രജനീകാന്തിന്റെ മകൾ ഐശ്വര്യയുമായുള്ള വിവാഹബന്ധം ധനുഷ് 2024-ലാണ് ഔദ്യോഗികമായി വേർപെടുത്തിയത്. ഈ ബന്ധത്തിൽ ഇവർക്ക് രണ്ട് ആൺമക്കളുണ്ട്. മറുവശത്ത്, 'സീതാരാമം' എന്ന ചിത്രത്തിലൂടെ പാൻ-ഇന്ത്യൻ തലത്തിൽ ശ്രദ്ധിക്കപ്പെട്ട മൃണാൾ ഠാക്കൂർ നിലവിൽ ബോളിവുഡിലും തെന്നിന്ത്യയിലും തിരക്കുള്ള നടിയാണ്.
നിലവിൽ പുതിയ ചിത്രങ്ങളുടെ തിരക്കിലാണ് ഇരു താരങ്ങളും. വിവാഹവാർത്തയോട് താരങ്ങൾ ഇതുവരെ നേരിട്ട് പ്രതികരിച്ചിട്ടില്ലെങ്കിലും അടുത്ത വൃത്തങ്ങളുടെ വിശദീകരണം വന്നതോടെ അഭ്യൂഹങ്ങൾക്ക് താൽക്കാലിക വിരാമമായിരിക്കുകയാണ്.