ഹൗറ: പശ്ചിമ ബംഗാളിലെ (West Bengal) ഹൗറ ജില്ലയിലുള്ള ഉലുബേരിയയിൽ വീടിന് തീപിടിച്ച് ദമ്പതികളും ഒരു വയസ്സുള്ള കുഞ്ഞും ഉൾപ്പെടെ ഒരു കുടുംബത്തിലെ നാല് പേർ വെന്തുമരിച്ചു. ഉലുബേരിയ മുനിസിപ്പാലിറ്റിയിലെ 25-ാം വാർഡിൽ ഞായറാഴ്ച പുലർച്ചെ മൂന്ന് മണിയോടെയായിരുന്നു ദാരുണമായ ഈ സംഭവം നടന്നത്.
തുണി വ്യാപാരിയായ യാസിൻ മാലിക് (32), ഭാര്യ മഹിമ ബീഗം (27), ഒരു വയസ്സുകാരിയായ മകൾ ഹുമൈറ ഖാത്തൂൺ, യാസിന്റെ മാതാവ് നൂർജഹാൻ ബീഗം (65) എന്നിവരാണ് മരിച്ചത്. കുടുംബാംഗങ്ങൾ ഉറങ്ങിക്കിടക്കുമ്പോഴാണ് വീടിന് തീപിടിച്ചത്. രണ്ടാം നിലയിൽ ഉറങ്ങുകയായിരുന്ന യാസിനും ഭാര്യയും കുഞ്ഞും സംഭവസ്ഥലത്ത് തന്നെ മരിച്ചു. മറ്റൊരു മുറിയിലായിരുന്ന നൂർജഹാൻ ബീഗത്തെ നാട്ടുകാരും അഗ്നിരക്ഷാസേനയും ചേർന്ന് രക്ഷപ്പെടുത്തി ആശുപത്രിയിലെത്തിച്ചെങ്കിലും ചികിത്സയിലിരിക്കെ നൂർജഹാൻ ബീഗം മരണപ്പെട്ടു.
ഇലക്ട്രിക്കൽ ഷോർട്ട് സർക്യൂട്ടാണ് തീപിടുത്തത്തിന് കാരണമെന്ന് പോലീസ് സംശയിക്കുന്നു. നാല് അഗ്നിരക്ഷാ യൂണിറ്റുകൾ മണിക്കൂറുകൾ പ്രയത്നിച്ചാണ് തീ നിയന്ത്രണവിധേയമാക്കിയത്. വീടിനുള്ളിലെ ഫർണിച്ചറുകളും അൽമാരയും ഉൾപ്പെടെയുള്ള സാധനങ്ങൾ പൂർണ്ണമായും കത്തിനശിച്ചു. മൃതദേഹങ്ങൾ പോസ്റ്റ്മോർട്ടത്തിനായി അയച്ചതായും അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചതായും ഉലുബേരിയ പോലീസ് അറിയിച്ചു.
A devastating fire in the early hours of Sunday claimed the lives of a textile trader, his wife, their infant daughter, and his elderly mother in the Uluberia area of Howrah. The blaze, suspected to have been caused by an electrical short circuit, gutted the two-story house while the family was asleep. Although the trader's mother was rescued and rushed to the hospital, she tragically succumbed to her injuries shortly after.