ഇന്ന് 'ഡിസംബർ 6'. ഇന്ത്യൻ മതേതരത്വത്തിന്റെ ചരിത്രത്തിലെ ഏറ്റവും കറുത്ത അധ്യായം എഴുതിച്ചേർത്ത ദിനം. 1992 ഡിസംബർ 6 ന് അയോധ്യയിൽ ബാബ്റി മസ്ജിദ് തകർക്കപ്പെട്ടിട്ട് ഇന്ന് 33 വർഷം തികയുന്നു. ഇന്ത്യയെന്ന ജനാധിപത്യ രാജ്യത്തിന്റെ അടിത്തറയായ മതസൗഹാർദ്ദവും ഭരണഘടനാ മൂല്യങ്ങളും ചോദ്യം ചെയ്യപ്പെട്ട നിമിഷമായിരുന്നു അത്. ഒരു ആരാധനാലയം തകർക്കപ്പെട്ടതിലുപരി, ഇന്ത്യ നൂറ്റാണ്ടുകളായി കാത്തുസൂക്ഷിച്ച ഹിന്ദു-മുസ്ലിം സൗഹൃദം മണ്ണോട് ചേർന്ന ദുരന്തമായിരുന്നു അന്നവിടെ അരങ്ങേറിയത്. അധികാര രാഷ്ട്രീയത്തിനായി മതത്തെ ആയുധമാക്കിയപ്പോൾ, രാജ്യത്തിന്റെ നെഞ്ചിൽ ഇപ്പോഴും ഉണങ്ങാത്ത ഒരു മുറിവായി ബാബ്റി മസ്ജിദ് ദിനം നീറിക്കിടക്കുന്നു.
'1992 ഡിസംബർ 6 ന്' ഉത്തർപ്രദേശിലെ അയോധ്യയിൽ സ്ഥിതിചെയ്യുന്ന ബാബ്റി മസ്ജിദിലേക്ക് ആയുധധാരികളായ ആയിരക്കണക്കിനു കർസേവകർ അതിക്രമിച്ച് കടന്ന് ഏതാനും മണിക്കൂറുകൾക്കുള്ളിൽ മസ്ജിദ് പൂർണ്ണമായി തകർത്തു. 1528 ൽ മുഗൾ ഭരണത്തിൻ കീഴിൽ മിർ ബാഖിയാണ് ബാബറി മസ്ജിദ് നിർമ്മിച്ചത്. ശ്രീരാമ ജന്മഭൂമിയായി കണക്കാക്കുന്ന അയോദ്ധ്യയിലെ രാമക്ഷേത്രം തകർത്താണ് പള്ളി പണിതത് എന്ന വാദമാണ് നൂറ്റാണ്ടുകളായി തർക്കങ്ങൾക്ക് അടിസ്ഥാനം. 1859-ൽ ബ്രിട്ടീഷ് ഭരണകാലത്ത് ഈ സ്ഥലത്തെ ഹിന്ദുക്കൾക്കും മുസ്ലീങ്ങൾക്കുമായി ആരാധനയ്ക്കായി വിഭജിച്ച് നൽകിയെങ്കിലും തർക്കങ്ങൾ തുടർന്നു. 1949-ൽ ഹിന്ദുമഹാസഭയുടെ പ്രവർത്തകർ രാമവിഗ്രഹങ്ങൾ പള്ളിക്കുള്ളിൽ സ്ഥാപിച്ചതിനെ തുടർന്ന് സർക്കാർ പള്ളിയെ "തർക്ക ഭൂമിയായി" പ്രഖ്യാപിക്കുകയും പൂട്ടുകയും ചെയ്തു. അതിനുശേഷം മുസ്ലീം ആരാധനകൾ പള്ളിയിൽ നടന്നില്ല.
പള്ളി പൊളിച്ച സ്ഥാനത്ത് രാമക്ഷേത്രം പണിയുക എന്ന ആവശ്യം 1980-കൾ മുതൽക്ക് ശക്തമായ രാഷ്ട്രീയ അജണ്ടയായി ഉയർന്നു വന്നു. 1984-ൽ വിശ്വഹിന്ദു പരിഷത്ത് (വിഎച്ച്പി) രാമക്ഷേത്ര നിർമ്മാണത്തിന് നേതൃത്വം നൽകാൻ കമ്മിറ്റി രൂപീകരിച്ചു. 1986-ൽ ജില്ലാ കോടതിയുടെ ഉത്തരവിനെ തുടർന്ന് പള്ളി ഹിന്ദു ആരാധനയ്ക്കായി തുറന്നു കൊടുത്തു. ബി.ജെ.പി നേതാവ് എൽ കെ അദ്വാനിയുടെ നേതൃത്വത്തിൽ നടന്ന പ്രക്ഷോഭങ്ങൾ ഈ വിഷയത്തിന് രാജ്യവ്യാപക ശ്രദ്ധ നൽകി. 1991-ൽ ഉത്തർപ്രദേശിൽ ബിജെപി സർക്കാർ അധികാരത്തിൽ വന്നതോടെ അയോധ്യയിലെ സ്ഥിതിഗതികൾ തീവ്ര വർഗീയ സ്വഭാവം കൈക്കൊണ്ടു.
പള്ളി തകർത്ത സംഭവത്തെക്കുറിച്ച് അന്വേഷിക്കാൻ കേന്ദ്ര സർക്കാർ ലിബർഹാൻ കമ്മീഷനെ നിയമിച്ചു. 2010-ൽ അലഹബാദ് ഹൈക്കോടതി തർക്കഭൂമി ഹിന്ദുക്കൾക്കും മുസ്ലീങ്ങൾക്കുമായി പങ്കിടണമെന്ന് വിധിച്ചു. എന്നാൽ, പള്ളി തകർത്ത കേസിൽ എൽ കെ അദ്വാനിയും ജോഷിയും ഉൾപ്പെടെയുള്ള 32 പ്രതികളെയും 2020-ൽ തെളിവുകളുടെ അഭാവത്തിൽ പ്രത്യേക സിബിഐ കോടതി വെറുതെ വിട്ടു.
പള്ളി തകർക്കപ്പെട്ട് 33 വർഷങ്ങൾക്കു ശേഷവും ബാബ്റി മസ്ജിദ് സംഭവം ഇപ്പോഴും ഇന്ത്യയുടെ മതേതരത്വത്തിൽ മായാത്ത മുറിവായി നിലനിൽക്കുന്നു. ഈ സംഭവം രാജ്യത്തെ ഏറ്റവും വലിയ സാമുദായിക ലഹളകളിൽ ഒന്നിലേക്ക് നയിക്കുകയും, രാജ്യത്തിൻ്റെ സാമൂഹിക സൗഹൃദത്തിൽ ആഴമേറിയ വിള്ളൽ ഉണ്ടാക്കുകയും ചെയ്തു.
Today, December 6th, marks the 33rd anniversary of the demolition of the Babri Masjid in Ayodhya in 1992, an event the article describes as a major blow to India's secularism and communal harmony. The text outlines the historical land dispute, tracing it from the mosque's construction in 1528 to the political escalation led by Hindu nationalist groups in the late 20th century. Key events include the locking of the mosque in 1949, the political mobilization to build a Ram Temple, and the 1992 demolition.