ഉഭയ സമ്മത പ്രകാരമുള്ള ബന്ധത്തിൻ്റെ പ്രായം 16 ആക്കണമെന്ന ആവശ്യം: സുപ്രീം കോടതിയിൽ വാദം നവംബർ 12ന്, ചൂടേറിയ ചർച്ചകൾ | SC

ന്യൂഡൽഹി: ഇന്ത്യയിൽ നിലവിൽ ശാരീരിക ബന്ധങ്ങൾക്കുള്ള നിയമപരമായ സമ്മത പ്രായം18 വയസ്സായിരിക്കെ, ഇത് 16 വയസ്സായി കുറയ്ക്കണമെന്ന ആവശ്യം ഉന്നയിച്ചുള്ള ഹർജിയിലെ വാദം നവംബർ 12-ന് സുപ്രീം കോടതിയിൽ ആരംഭിക്കാനിരിക്കുകയാണ്. ഈ വിഷയത്തിൽ അനുകൂലിച്ചും പ്രതികൂലിച്ചുമുള്ള ശക്തമായ ചർച്ചകളാണ് സാമൂഹിക മാധ്യമങ്ങളിൽ നടക്കുന്നത്. നിലവിലെ നിയമപ്രകാരം, 18 വയസ്സിന് താഴെയുള്ളവരുമായി പരസ്പരസമ്മതപ്രകാരമുള്ള ലൈംഗികബന്ധം പോലും പോക്സോ (POCSO) നിയമപ്രകാരം കുറ്റകരമാണ്.(Demand to raise the age of consent to 16 on SC)

'നിപുൻ സക്സേന vs യൂണിയൻ ഓഫ് ഇന്ത്യ' എന്ന കേസിലാണ് സുപ്രീം കോടതി വാദം കേൾക്കാനൊരുങ്ങുന്നത്. മുതിർന്ന അഭിഭാഷകയായ ഇന്ദിര ജയ്‌സിംഗ് ആണ് കേസിൽ സുപ്രീം കോടതിയെ സഹായിക്കുന്നത്. കൺസെൻ്റിനുള്ള പ്രായം 16 വയസ്സാക്കണമെന്നാണ് ഇവരുടെ പ്രധാന വാദം.

നിലവിലെ 18 വയസ്സ് എന്ന നിയമം കൗമാരക്കാർക്കിടയിലെ പരസ്പര സമ്മതത്തോടെയുള്ള പ്രണയബന്ധങ്ങളെപ്പോലും കുറ്റകരമാക്കുന്നുവെന്നും, ഇത് ഭരണഘടന നൽകിയിട്ടുള്ള അവരുടെ അവകാശങ്ങളെ ലംഘിക്കുന്നതാണെന്നുമാണ് ഇന്ദിര ജയ്‌സിംഗ് വാദിക്കുന്നത്.

സമൂഹ മാധ്യമങ്ങളിലെ വലിയൊരു വിഭാഗം ഈ നീക്കത്തിനെതിരെ ശക്തമായ വിമർശനമാണ് ഉയർത്തുന്നത്. 16 വയസ്സ് എന്നത് ലൈംഗിക ബന്ധങ്ങൾക്ക് സമ്മതം നൽകാൻ കഴിയുന്നത്ര പക്വതയില്ലാത്ത പ്രായമാണെന്ന് പലരും അഭിപ്രായപ്പെടുന്നു.

16 വയസ്സ് എന്നത് പത്താം ക്ലാസ്സിലോ പതിനൊന്നാം ക്ലാസ്സിലോ പഠിക്കുന്ന വിദ്യാർത്ഥികളുടെ പ്രായമാണ്. ഈ നിയമം പെൺകുട്ടികൾക്ക് നേരെയുള്ള ലൈംഗിക ചൂഷണങ്ങൾക്ക് കാരണമായിത്തീരും എന്ന് വിമർശകർ വാദിക്കുന്നു.

ഇന്ത്യയിൽ മദ്യപാനം, വാഹനമോടിക്കൽ, വോട്ട് ചെയ്യൽ തുടങ്ങിയവയ്ക്ക് നിയമപരമായ പ്രായമായി 18 വയസ്സ് നിശ്ചയിച്ചിരിക്കെ, ലൈംഗിക ബന്ധങ്ങൾക്ക് സമ്മതം നൽകാനുള്ള പ്രായം 16 ആയി കുറയ്ക്കുന്നത് എന്തുകൊണ്ടാണെന്നും ആളുകൾ ചോദ്യം ചെയ്യുന്നു.