"ഡല്‍ഹിയിലെ പുകമഞ്ഞും വായു മലിനീകരണവും സ്ത്രീ-പുരുഷന്മാരുടെ പ്രത്യുല്‍പാദനക്ഷമതയെ ബാധിക്കുന്നു." - ഡോക്ടര്‍മാരുടെ മുന്നറിയിപ്പ് | Pollution
ന്യൂഡല്‍ഹി: എല്ലാ വര്‍ഷവും ദീപാവലി ആഘോഷങ്ങള്‍ കഴിയുമ്പോൾ ഉത്തരേന്ത്യയിലെ വായുവിന്റെ ഗുണനിലവാരം ആശങ്കാജനകമായ നിലയിലേക്ക് താഴും. ആളുകൾക്ക് ചുമ, ശ്വാസതടസ്സം എന്നിവ പ്രകടമാണെങ്കിലും ഇതിന്റെ ദൂഷ്യവശങ്ങൾ വളരെ ആഴത്തില്‍ വ്യാപിക്കുന്നു. അത് സ്ത്രീ-പുരുഷന്മാരുടെ പ്രത്യുത്പാദന വ്യവസ്ഥയെ പോലും ബാധിക്കുന്നുവെന്ന് ഡോക്ടര്‍മാര്‍ മുന്നറിയിപ്പ്.
"വായു മലിനീകരണവും പുകമഞ്ഞും ശ്വസനസംബന്ധമായ അപകടങ്ങള്‍ മാത്രമല്ല, അവ ഹോര്‍മോണ്‍ സന്തുലിതാവസ്ഥയെയും പ്രത്യുല്‍പാദന ആരോഗ്യത്തെയും തടസ്സപ്പെടുത്തുന്നു. ഇത് പലപ്പോഴും ശ്രദ്ധിക്കപ്പെടാതെ പോകുന്ന വിധത്തില്‍ പുരുഷന്മാരെയും സ്ത്രീകളെയും ബാധിക്കുന്നു." - ഗുരുഗ്രാമിലെ സിഫാറിലെ ഐവിഎഫ് വിദഗ്ദ്ധനായ ഡോ. പുനീത് റാണ അറോറ പറയുന്നു.
"നൈട്രജന്‍ ഡൈ ഓക്‌സൈഡ്, സള്‍ഫര്‍ ഡൈ ഓക്‌സൈഡ്, കാര്‍ബണ്‍ മോണോക്‌സൈഡ് എന്നിവ ശ്വാസകോശത്തിലേക്കും രക്തപ്രവാഹത്തിലേക്കും തുളച്ചുകയറുന്ന സൂക്ഷ്മ കണികകളാണ്. ആഗിരണം ചെയ്ത ശേഷം, അവ ഓക്‌സിഡേറ്റീവ് സമ്മര്‍ദ്ദത്തിനും ഹോര്‍മോണ്‍ അസന്തുലിതാവസ്ഥയ്ക്കും കാരണമാകുന്നു, ഇത് പ്രത്യുത്പാദന അവയവങ്ങളെ ബാധിക്കുന്നു. ഈ മാലിന്യങ്ങള്‍ ശരീരത്തിന്റെ ഹോര്‍മോണ്‍ താളം തെറ്റിക്കുന്നു," -ഡോ. അറോറ വിശദീകരിച്ചു.
"ഇത് കാലക്രമേണ, സ്ത്രീകളില്‍ അണ്ഡോത്പാദനത്തെ തടസ്സപ്പെടുത്തുകയും പുരുഷന്മാരില്‍ ബീജത്തിന്റെ ഗുണനിലവാരം കുറയ്ക്കുകയും ചെയ്യുന്നു, ഇത് സ്വാഭാവികമായി ഗര്‍ഭം ധരിക്കുന്നത് ബുദ്ധിമുട്ടാക്കുന്നു. സ്ത്രീകള്‍ കൂടുതല്‍ നേരം പുകമഞ്ഞില്‍ ഇരിക്കുന്നത് അപകടകരമാണ്. ഇത് ക്രമരഹിതമായ ആര്‍ത്തവചക്രം, അണ്ഡാശയ റിസര്‍വ് കുറയല്‍, അകാല ആര്‍ത്തവവിരാമം എന്നിവയ്ക്ക് കാരണമാകും. ഈ വിഷവസ്തുക്കള്‍ ഈസ്ട്രജന്റെ അളവിനെ ബാധിക്കുകയും അണ്ഡത്തിന്റെ ഗുണനിലവാരം കുറയ്ക്കുകയും വന്ധ്യതയ്ക്കും ഗര്‍ഭകാല സങ്കീര്‍ണതകള്‍ക്കും സാധ്യത വര്‍ദ്ധിപ്പിക്കുകയും ചെയ്യുന്നുവെന്ന് ഗവേഷണങ്ങള്‍ സൂചിപ്പിക്കുന്നു. മലിനമായ വായു ശ്വസിക്കുന്ന ഗര്‍ഭിണികള്‍ മാസം തികയാതെയുള്ള കുഞ്ഞുങ്ങള്‍ക്ക് ജന്മം നല്‍കാനോ ഭാരം കുറഞ്ഞ കുഞ്ഞുങ്ങള്‍ക്ക് ജനനം നല്‍കാനോ സാധ്യതയുണ്ട്. ഈ വിഷവസ്തുക്കള്‍ മറുപിള്ളയിലൂടെ കടന്നുപോകുകയും ഗര്ഭപിണ്ഡത്തിന്റെ വളര്‍ച്ചയെ തടസ്സപ്പെടുത്തുകയും ചെയ്യും." - ഡോ. അറോറ മുന്നറിയിപ്പ് നല്‍കുന്നു.
"പുരുഷന്മാരില്‍, പുകമഞ്ഞുമായി ബന്ധപ്പെട്ട വായു മലിനീകരണം ബീജങ്ങളുടെ എണ്ണവും ചലനശേഷിയും കുറയ്ക്കുകയും അവയുടെ രൂപഘടനയെ നശിപ്പിക്കുകയും ചെയ്യുന്നു. ദീര്‍ഘനേരം എക്‌സ്‌പോഷര്‍ ചെയ്യുന്നത് ടെസ്റ്റോസ്റ്റിറോണിനെ കുറയ്ക്കും. ദീപാവലിക്ക് ശേഷമുള്ള വായുവില്‍ കാണപ്പെടുന്ന ഘനലോഹങ്ങളും ഹൈഡ്രോകാര്‍ബണുകളും ബീജത്തിന്റെ ഡിഎന്‍എയെ തകരാറിലാക്കുമെന്ന് പഠനങ്ങള്‍ കാണിക്കുന്നു, ഇത് പുരുഷ വന്ധ്യതയുടെ വര്‍ദ്ധനവിന് പിന്നിലെ ഒരു പ്രധാന ഘടകമാണ്. പുകമഞ്ഞുകാലത്ത് വിഷ കണികകള്‍ ശ്വസിക്കുന്നത് ബീജത്തിലെ ഡിഎന്‍എ വിഘടനത്തിന് കാരണമാകും. ഇത് പ്രത്യുല്‍പാദനക്ഷമതയെ മാത്രമല്ല, ഭാവിയിലെ സന്താനങ്ങളുടെ ആരോഗ്യത്തെയും സ്വാധീനിക്കും." - ഡോ. അറോറ വിശദീകരിച്ചു.