ന്യൂഡൽഹി: രാജ്യതലസ്ഥാനം കടുത്ത ശൈത്യതരംഗത്തിന്റെയും പുകമഞ്ഞിന്റെയും പിടിയിൽ. മഞ്ഞും പുകയും കലർന്ന അന്തരീക്ഷം മൂലം സൂര്യപ്രകാശം പോലും ഭൂമിയിലെത്താത്ത അവസ്ഥയാണ്. പകൽ സമയത്തും നഗരം ഇരുണ്ട അന്തരീക്ഷത്തിലാണ്. ശരാശരി താപനില 16.9 ഡിഗ്രി സെൽഷ്യസായി കുറഞ്ഞു.(Delhi suffocates in bitter cold and fog, Flight services disrupted)
കടുത്ത മൂടൽമഞ്ഞ് കാഴ്ചാപരിധി കുറച്ചത് വ്യോമഗതാഗതത്തെ സാരമായി ബാധിച്ചു. ശനിയാഴ്ച മാത്രം ഡൽഹിയിലേക്കുള്ള 66 വിമാനങ്ങളെയും ഡൽഹിയിൽ നിന്നുള്ള 63 വിമാനങ്ങളെയും പ്രതിസന്ധി ബാധിച്ചു. സഫ്ദർജംഗിൽ കാഴ്ചാപരിധി 200 മീറ്ററായും പാലത്തിൽ 350 മീറ്ററായും കുറഞ്ഞു.
ഉച്ചയോടെ നേരിയ പുരോഗതി ഉണ്ടായെങ്കിലും ഗതാഗത തടസ്സങ്ങൾ തുടർന്നു. മഞ്ഞിനൊപ്പം വായുമലിനീകരണവും വർദ്ധിച്ചത് ജനജീവിതം ദുസ്സഹമാക്കിയിരിക്കുകയാണ്. ശനിയാഴ്ച വൈകുന്നേരം അഞ്ച് മണിയോടെ വായു ഗുണനിലവാര സൂചിക (AQI) 401-ൽ എത്തി. ഇത് അതീവ ഗുരുതരമായ സാഹചര്യമാണ്.
വാഹനങ്ങളിൽ നിന്നുള്ള പുക, വ്യവസായ ശാലകൾ, മാലിന്യം കത്തിക്കുന്നത് എന്നിവ അന്തരീക്ഷത്തെ കൂടുതൽ മലീമസമാക്കുന്നു. കാറ്റില്ലാത്ത അവസ്ഥ മലിനീകരണ കണികകൾ അന്തരീക്ഷത്തിൽ തന്നെ തങ്ങിനിൽക്കാൻ കാരണമാകുന്നു. മൂടൽമഞ്ഞ് വരും ദിവസങ്ങളിലും തുടരാൻ സാധ്യതയുണ്ടെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്.