ന്യൂഡൽഹി: ഡൽഹി മുനിസിപ്പൽ കോർപ്പറേഷനിലെ 12 വാർഡുകളിലേക്കുള്ള ഉപതിരഞ്ഞെടുപ്പിന്റെ വോട്ടെടുപ്പ് ഇന്ന് നടക്കും. ആകെയുള്ള 12 സീറ്റുകളിലായി 53 സ്ഥാനാർത്ഥികളാണ് ജനവിധി തേടുന്നത്. ഭരണകക്ഷികളായ ബി.ജെ.പി.ക്കും എ.എ.പി.ക്കും ഈ തിരഞ്ഞെടുപ്പ് നിർണായകമാണ്.(Delhi MCD by-elections today, Voting in 12 wards)
കോർപ്പറേഷനിലെ 12 കൗൺസിലർമാർ ഡൽഹി നിയമസഭയിലേക്ക് തിരഞ്ഞെടുക്കപ്പെട്ട ഒഴിവുകളിലാണ് നിലവിൽ വോട്ടെടുപ്പ് നടക്കുന്നത്. ഈ 12 സീറ്റുകളിൽ ഒമ്പതും ബി.ജെ.പി.യുടെയും മൂന്നെണ്ണം ആം ആദ്മി പാർട്ടി (എ.എ.പി.)യുടെയും സിറ്റിങ് സീറ്റുകളായിരുന്നു.
മുഖ്യമന്ത്രി രേഖ ഗുപ്തയുടെ മുൻ കൗൺസിലർ സീറ്റിൽ ഉൾപ്പെടെയാണ് വോട്ടെടുപ്പ് നടക്കുന്നത്. കൗൺസിലറായിരിക്കെയാണ് അവർ നിയമസഭയിലേക്ക് മത്സരിച്ച് ജയിച്ച് മുഖ്യമന്ത്രിയായത്. 2022 ഡിസംബറിൽ 250 സീറ്റുകളിലേക്ക് നടന്ന കോർപ്പറേഷൻ തിരഞ്ഞെടുപ്പിൽ ബി.ജെ.പി. 115 സീറ്റുകൾ നേടി ഏറ്റവും വലിയ ഒറ്റക്കക്ഷിയായിരുന്നു. എ.എ.പി. 99 സീറ്റും നേടി. കേവലഭൂരിപക്ഷമായ 125 സീറ്റിലേക്ക് എത്താൻ ഇരു പാർട്ടികൾക്കും സാധിച്ചിരുന്നില്ല.
നിലവിൽ 115 സീറ്റുകളുള്ള ബി.ജെ.പി.ക്ക് കേവല ഭൂരിപക്ഷത്തിലേക്ക് എത്താൻ ഈ 12 സീറ്റുകളിലും വിജയിക്കേണ്ടത് അത്യാവശ്യമാണ്. മുഖ്യമന്ത്രി രേഖ ഗുപ്തയുടെ നേതൃത്വത്തിലായിരുന്നു ബി.ജെ.പി.യുടെ പ്രചാരണം. നിയമസഭാ തിരഞ്ഞെടുപ്പിലേറ്റ തിരിച്ചടിയിൽ നിന്ന് പാർട്ടിയുടെ ജനസ്വാധീനം തിരിച്ചുപിടിക്കാനുള്ള നിർണായക അവസരമായാണ് എ.എ.പി. ഈ ഉപതിരഞ്ഞെടുപ്പിനെ കാണുന്നത്. മുൻ മുഖ്യമന്ത്രി അതിഷിയായിരുന്നു എ.എ.പി.യുടെ പ്രചാരണങ്ങൾക്ക് നേതൃത്വം നൽകിയത്.