ന്യൂഡൽഹി: തലസ്ഥാന നഗരിയിൽ വായു മലിനീകരണം വീണ്ടും രൂക്ഷമായതിനെ തുടർന്ന് കൂടുതൽ നിയന്ത്രണങ്ങൾ ഏർപ്പെടുത്തി. സർക്കാർ, സ്വകാര്യ ഓഫീസുകളിലെ 50 ശതമാനം ജീവനക്കാർക്ക് വർക്ക് ഫ്രം ഹോം ഏർപ്പെടുത്താൻ സർക്കാർ തീരുമാനിച്ചു. ഡൽഹിയിൽ വായു ഗുണനിലവാരം (AQI) ഇപ്പോഴും 'വളരെ മോശം' (Very Poor) വിഭാഗത്തിൽ തുടരുകയാണ്. ഇന്ന് രേഖപ്പെടുത്തിയ ശരാശരി എ.ക്യു.ഐ. 362 ആണ്.(Delhi is Suffocating, Air pollution is severe, restrictions have been tightened)
വായു ഗുണനിലവാര മേൽനോട്ട സമിതിയുടെ നിർദ്ദേശപ്രകാരമാണ് സർക്കാർ പുതിയ നിയന്ത്രണങ്ങൾ ഏർപ്പെടുത്തിയത്. ഡൽഹിയിലെ വായു മലിനീകരണത്തിൻ്റെ പശ്ചാത്തലത്തിൽ അയൽ സംസ്ഥാനങ്ങൾക്ക് പ്രധാനമന്ത്രിയുടെ ഓഫീസ് (PMO) നിർദ്ദേശം നൽകി. ഇലക്ട്രിക് വാഹനങ്ങളുടെ ഉപയോഗം വർദ്ധിപ്പിക്കാൻ രജിസ്‌ട്രേഷൻ നടപടികൾ ലഘൂകരിക്കണം. വായു മലിനീകരണം കുറയ്ക്കുന്നതിന് നൂതന സാങ്കേതികവിദ്യ ഫലപ്രദമായി ഉപയോഗിക്കണമെന്നും നിർദ്ദേശമുണ്ട്.
രാജസ്ഥാൻ, ഹരിയാണ, പഞ്ചാബ്, ഉത്തർപ്രദേശ് എന്നീ സംസ്ഥാനങ്ങൾക്കും ഡൽഹിയിലെയും ചീഫ് സെക്രട്ടറിമാർ പങ്കെടുത്ത യോഗത്തിലാണ് പി.എം.ഒ. നിർദ്ദേശങ്ങൾ നൽകിയത്. വായു മലിനീകരണത്തിനെതിരെ ഇന്ത്യ ഗേറ്റിൽ നടന്ന 'ജൻ സി' പ്രക്ഷോഭത്തിൽ പോലീസ് അന്വേഷണം പ്രഖ്യാപിച്ചു.
പ്രതിഷേധത്തിനിടെ മാവോയിസ്റ്റ് നേതാവിൻ്റെ ചിത്രവും പേരും അടങ്ങിയ പ്ലക്കാർഡുകൾ പ്രദർശിപ്പിച്ചതിൻ്റെ പശ്ചാത്തലത്തിലാണ് പോലീസ് രാഷ്ട്രീയ പശ്ചാത്തലം അന്വേഷിക്കുന്നത്. പ്രതിഷേധത്തിനിടെ പോലീസിന് നേരെ കുരുമുളക് സ്പ്രേ (Pepper Spray) പ്രയോഗിച്ച 15 പേരെ ഡൽഹി പോലീസ് അറസ്റ്റ് ചെയ്തതായും അറിയിച്ചു.