ന്യൂഡൽഹി: തലസ്ഥാനത്തെ നടുക്കിയ ചെങ്കോട്ടയ്ക്ക് സമീപം നടന്ന സ്ഫോടനത്തിൻ്റെ നിർണായകമായ സി.സി.ടി.വി. ദൃശ്യങ്ങൾ പുറത്തുവന്നു. തിരക്കേറിയ സമയത്ത് വെള്ള ഹ്യുണ്ടായ് ഐ20 കാർ പൊട്ടിത്തെറിക്കുന്നതാണ് ദൃശ്യങ്ങളിലുള്ളത്. ഈ സംഭവം 'ഹീനമായ ഭീകരപ്രവർത്തനമാണ്' എന്ന് കേന്ദ്രം വിശേഷിപ്പിച്ചതിന് പിന്നാലെ, കേസിൻ്റെ അന്വേഷണം ദേശീയ അന്വേഷണ ഏജൻസി (എൻ.ഐ.എ.) ഔദ്യോഗികമായി ഏറ്റെടുത്തു.(Delhi blast, Umar spent about 10 minutes in a mosque)
ചെങ്കോട്ട മെട്രോ സ്റ്റേഷൻ്റെ ഗേറ്റ് നമ്പർ 1 ന് സമീപമുള്ള ഒരു ട്രാഫിക് കാമറയിൽ നിന്നാണ് സ്ഫോടനത്തിൻ്റെ ദൃശ്യങ്ങൾ ലഭിച്ചത്. തിങ്കളാഴ്ച വൈകുന്നേരം 6:52 ന് സ്ഫോടനം നടന്ന സമയത്ത്, വെള്ള ഐ20 കാറിന് ചുറ്റും ഇ-റിക്ഷകളും ഓട്ടോകളും മറ്റ് വാഹനങ്ങളും ഉണ്ടായിരുന്നു. തിരക്കിനിടയിലൂടെ സാവധാനം നീങ്ങുകയായിരുന്ന കാർ പെട്ടെന്ന് തീജ്വാലകളായി പൊട്ടിത്തെറിക്കുന്നതാണ് വീഡിയോയിൽ വ്യക്തമാവുന്നത്. ഈ സ്ഫോടനം ജനസാന്ദ്രതയേറിയ ഓൾഡ് ഡൽഹി പ്രദേശത്തുടനീളം വലിയ ആഘാതമുണ്ടാക്കുകയും സമീപത്തെ വാഹനങ്ങൾക്കും കെട്ടിടങ്ങൾക്കും നാശനഷ്ടം വരുത്തുകയും ചെയ്തു.
സ്ഫോടനത്തിൽ ചിന്നിച്ചിതറിയ ശരീരഭാഗങ്ങളിൽ നിന്നും ശേഖരിച്ച ഡി.എൻ.എ. സാമ്പിളുകൾ പുൽവാമ സ്വദേശി ഡോ. ഉമർ മുഹമ്മദിൻ്റെ (32) അമ്മയുടെയും സഹോദരൻ്റെയും ഡി.എൻ.എ.യുമായി 100 ശതമാനം പൊരുത്തപ്പെടുന്നു എന്ന് പരിശോധനയിൽ സ്ഥിരീകരിച്ചു. കാറിൽ നിന്ന് കണ്ടെത്തിയ ഉമറിൻ്റെ എല്ലുകൾ, പല്ലുകൾ, വസ്ത്രങ്ങളുടെ കഷണങ്ങൾ എന്നിവയാണ് പരിശോധിച്ചത്.
പാകിസ്ഥാൻ ആസ്ഥാനമായുള്ള ഭീകര സംഘടനയായ ജെയ്‌ഷെ മുഹമ്മദുമായി ബന്ധമുള്ള ഭീകര ശൃംഖലയിലെ അംഗമെന്ന് സംശയിക്കുന്ന ഡോ. ഉമർ തന്നെയാണ് കാർ ഓടിച്ചിരുന്നത്. ഫരീദാബാദിലെ അൽ ഫലാഹ് യൂണിവേഴ്സിറ്റിയിൽ സീനിയർ ഡോക്ടറായി ജോലി ചെയ്തിരുന്ന വ്യക്തിയാണ് ഡോ. ഉമർ മുഹമ്മദ്. ഡി.എൻ.എ. പരിശോധനയ്ക്കായി സ്ഫോടനം നടന്ന തിങ്കളാഴ്ച രാത്രി തന്നെ ഉമറിൻ്റെ അമ്മയെയും രണ്ട് സഹോദരങ്ങളെയും ചോദ്യം ചെയ്യലിനായി കസ്റ്റഡിയിലെടുക്കുകയും ചെയ്തിരുന്നു.
സ്ഫോടനത്തിനു മുൻപ് ഡോക്ടർ ഉമർ ഓൾഡ് ഡൽഹിയിൽ എത്തിയിരുന്നതായി വിവരം ലഭിച്ചു. രാംലീല മൈതാനിന് സമീപമുള്ള പള്ളിയിൽ ഉമർ 10 മിനിറ്റ് സമയം ചെലവിട്ടു. ഇവിടെ നിന്നാണ് രണ്ടരയോടെ ഉമർ ചെങ്കോട്ടയ്ക്കടുത്തേക്ക് പോയത്. ഉമർ എത്തിയ പള്ളിയിലെ സി.സി.ടി.വി. ദൃശ്യങ്ങൾ പോലീസിന് ലഭിച്ചു. സ്ഫോടനത്തിനു പിന്നാലെ കണ്ടെത്തിയ രണ്ടാമത്തെ കാർ (ചുവന്ന എക്കോ സ്പോർട്ട്) സ്ഫോടകവസ്തുക്കൾ കടത്താൻ ഉപയോഗിച്ചിരുന്നതായി സൂചനയുണ്ട്. അമോണിയം നൈട്രേറ്റ് കടത്താൻ ഈ കാർ ഉപയോഗിച്ചെന്നാണ് പ്രാഥമിക നിഗമനം. ഇന്നലെ ഹരിയാനയിൽ നിന്നാണ് ഫരീദാബാദ് പോലീസ് ഈ കാർ കണ്ടെത്തിയത്.
സുരക്ഷാകാരണങ്ങൾ ചൂണ്ടിക്കാട്ടി സ്ഫോടനം നടന്നതിന് സമീപമുള്ള ലാൽ ഖില മെട്രോ സ്റ്റേഷൻ അടച്ചു. ഇനിയൊരു അറിയിപ്പ് ഉണ്ടാകുന്നതുവരെ സ്റ്റേഷൻ തുറക്കില്ല. സ്ഫോടനത്തിനുശേഷം മൂന്നു ദിവസത്തേക്ക് മെട്രോ സ്റ്റേഷൻ അടച്ചിടും എന്നായിരുന്നു നേരത്തെ അറിയിച്ചിരുന്നത്.