ന്യൂഡൽഹി: ഡൽഹി ചെങ്കോട്ടയ്ക്ക് സമീപമുണ്ടായ സ്ഫോടനവുമായി ബന്ധപ്പെട്ട് ഭീകരബന്ധം ആരോപിക്കപ്പെടുന്ന കേസിൽ ഒരു ഡോക്ടർ കൂടി അറസ്റ്റിൽ. റയീസ് അഹമ്മദ് എന്ന സർജനാണ് പ്രത്യേക അന്വേഷണ സംഘത്തിൻ്റെ പിടിയിലായത്. പഞ്ചാബിലെ പത്താൻകോട്ടിൽ നിന്നാണ് ഇയാളെ പിടികൂടിയത്.(Delhi blast, One more doctor arrested from Pathankot)
നേരത്തെ സസ്‌പെൻഡ് ചെയ്യപ്പെട്ട ഡോ. നിസാർ ഉൾ ഹസ്സൻ ജോലി ചെയ്തിരുന്ന അൽ-ഫലാഹ് യൂണിവേഴ്സിറ്റിയിലേക്ക് റയീസ് അഹമ്മദ് പലതവണ വിളിച്ചതായി അന്വേഷണ ഉദ്യോഗസ്ഥർക്ക് വിവരം ലഭിച്ചിട്ടുണ്ട്. ഇതിന്റെ അടിസ്ഥാനത്തിലാണ് അറസ്റ്റ്.
കേസുമായി ബന്ധപ്പെട്ട് ഹരിയാനയിലെ നൂഹിലടക്കം വിവിധയിടങ്ങളിൽ പോലീസ് പരിശോധനകൾ വ്യാപകമാക്കിയിട്ടുണ്ട്. ഭീകരസംഘടനയായ ജെയ്‌ഷെ-മുഹമ്മദുമായി ബന്ധമുള്ള നാല് ഡോക്ടർമാരുടെ രജിസ്‌ട്രേഷൻ കഴിഞ്ഞ ദിവസം ദേശീയ മെഡിക്കൽ കമ്മീഷൻ റദ്ദാക്കിയിരുന്നു. ഈ കേസുമായി ബന്ധപ്പെട്ട് കൂടുതൽ ഡോക്ടർമാർ സംശയത്തിൻ്റെ നിഴലിലാണ്.
അതേസമയം, സ്ഫോടനവുമായി ബന്ധപ്പെട്ട് അറസ്റ്റിലായ ജെയ്‌ഷെ-മുഹമ്മദ് ഭീകരസംഘടനയുമായി ബന്ധമുള്ള നാല് ഡോക്ടർമാരുടെ രജിസ്‌ട്രേഷൻ ദേശീയ മെഡിക്കൽ കമ്മീഷൻ (എൻഎംസി) റദ്ദാക്കി. ഭീകരവാദവുമായി ബന്ധപ്പെട്ട കേസിൽ ഇവർക്ക് പ്രഥമദൃഷ്ട്യാ പങ്കുണ്ടെന്ന് കണ്ടെത്തിയതിനെ തുടർന്നാണ് ഈ കർശന നടപടി.
ഡോക്ടർമാരായ മുസാഫർ അഹമ്മദ്, അദീൽ അഹമ്മദ് റാത്തർ, മുസാമിൽ ഷക്കീൽ, ഷഹീൻ സയീദ് എന്നിവരുടെ ഇന്ത്യൻ മെഡിക്കൽ രജിസ്റ്ററും (ഐഎംആർ) നാഷണൽ മെഡിക്കൽ രജിസ്റ്ററും (എൻഎംആർ) ഉടനടി പ്രാബല്യത്തിൽ വരുന്ന വിധത്തിൽ റദ്ദാക്കി. ഈ ഡോക്ടർമാർക്ക് ഇനി ഇന്ത്യയിൽ ഒരിടത്തും ചികിത്സ നടത്താനോ ഏതെങ്കിലും മെഡിക്കൽ പദവി വഹിക്കാനോ സാധിക്കില്ലെന്ന് എൻഎംസി പുറത്തിറക്കിയ നോട്ടീസിൽ വ്യക്തമാക്കുന്നു.
ജമ്മു കശ്മീർ പോലീസും ജമ്മു കശ്മീർ, ഉത്തർപ്രദേശ് മെഡിക്കൽ കൗൺസിലുകളും ശേഖരിച്ച ശക്തമായ തെളിവുകളുടെ അടിസ്ഥാനത്തിലാണ് നാല് ഡോക്ടർമാരുടെയും രജിസ്‌ട്രേഷൻ റദ്ദാക്കിയത്. രാജ്യത്തിൻ്റെ സുരക്ഷയുമായി ബന്ധപ്പെട്ട കേസിൽ ഡോക്ടർമാർക്ക് പങ്കുണ്ടെന്ന് കണ്ടെത്തിയതോടെയാണ് എൻഎംസി ഈ സുപ്രധാന ഉത്തരവിറക്കിയത്.
മുൻപ് ജമ്മു കശ്മീർ ഭരണകൂടം സർവീസിൽ നിന്ന് പിരിച്ചുവിട്ട ഡോക്ടർ നിസാർ ഉൾ ഹസ്സൻ സംശയത്തിൻ്റെ നിഴലിൽ. 2023 നവംബറിൽ ജമ്മു കശ്മീർ ലഫ്റ്റനൻ്റ് ഗവർണർ മനോജ് സിൻഹയുടെ ഉത്തരവനുസരിച്ച് ശ്രീനഗറിലെ എസ്എച്ച്എംഎസ് ആശുപത്രിയിൽ നിന്നാണ് ഇദ്ദേഹത്തെ പുറത്താക്കിയത്.
പിരിച്ചുവിട്ട വേളയിൽ ജമ്മു കശ്മീർ സിഐഡി, ഡോ. നിസാർ ഉൾ ഹസ്സനെ വിശേഷിപ്പിച്ചത് "വ്യാപകമായ അക്രമം അഴിച്ചുവിടാനും ഇന്ത്യയുടെ പരമാധികാരത്തിനും അഖണ്ഡതയ്ക്കും ഭീഷണി ഉയർത്താനും പാകിസ്താനും അതിൻ്റെ ഭീകര-വിഘടനവാദി ശൃംഖലയ്ക്കും എപ്പോൾ വേണമെങ്കിലും വീണ്ടും ഉപയോഗിക്കാൻ കഴിയുന്ന 'ഒരു ടൈം ബോംബ്'" എന്നായിരുന്നു.
സർവീസിൽ നിന്ന് പുറത്താക്കിയ ഉടൻ തന്നെ ഹസ്സനെ ഫരീദാബാദിലെ അൽ-ഫലാഹ് സ്‌കൂൾ ഓഫ് മെഡിക്കൽ സയൻസ് ആൻഡ് റിസർച്ച് സെൻ്ററിൽ ജോലിക്ക് എടുത്തിരുന്നു. അവിടെവെച്ച്, അദ്ദേഹത്തിൻ്റെ കീഴിൽ ജനറൽ മെഡിസിൻ വിഭാഗത്തിൽ ജോലി ചെയ്തിരുന്നതും കാർ ബോംബറായി ആരോപിക്കപ്പെടുന്നതുമായ ഉമർ ഉൾപ്പെടെയുള്ള മെഡിക്കൽ പ്രൊഫഷണലുകളെ ഹസ്സൻ തീവ്രവാദത്തിലേക്ക് ആകർഷിച്ചതായി അന്വേഷണ ഉദ്യോഗസ്ഥർ സംശയിക്കുന്നു.
കശ്മീരിലെ വിഘടനവാദികൾക്ക് പിന്തുണ നൽകുകയും മെഡിക്കൽ പ്രൊഫഷണലുകൾക്കിടയിൽ വിഘടനവാദ ആശയങ്ങൾ പ്രചരിപ്പിക്കുകയും ചെയ്ത ഹസ്സൻ്റെ മുൻകാല ചരിത്രമാണ് നിലവിലെ സംശയങ്ങൾക്ക് പ്രധാന കാരണം. ജെയ്‌ഷെ-മുഹമ്മദ് സംഘത്തിൻ്റെ സൂത്രധാരനും പ്രേരകനുമായി നിസാർ ഉൾ ഹസ്സൻ മാറിയോ എന്നാണ് അന്വേഷണ സംഘം പരിശോധിക്കുന്നത്.
അറസ്റ്റിലായ ഡോക്ടർമാരായ ഡോ. മുസമ്മിൽ, ഡോ. അദീൽ, ഡോ. ഷഹീൻ, ഡോ. പർവേസ്, മരിച്ചതായി റിപ്പോർട്ട് ചെയ്യപ്പെട്ട ഉമർ നബി എന്നിവരടങ്ങുന്ന സംഘവുമായി നിസാർ ഉൾ ഹസ്സനുള്ള ബന്ധം എങ്ങനെയായിരുന്നുവെന്ന് എൻഐഎ (ദേശീയ അന്വേഷണ ഏജൻസി) ഇപ്പോൾ വിശദമായി പരിശോധിച്ച് വരുന്നു. സംഭവവുമായി ബന്ധപ്പെട്ട് ചോദ്യം ചെയ്യലിനായി നിസാർ ഉൾ ഹസ്സനെ എൻഐഎ കസ്റ്റഡിയിലെടുത്തതായും വിവരമുണ്ട്.