ന്യൂഡൽഹി: ഡൽഹി ചെങ്കോട്ടയ്ക്ക് സമീപം വാഹനത്തിൽ ഐ.ഇ.ഡി. (Improvised Explosive Device) ഉപയോഗിച്ച് നടന്നത് ചാവേറാക്രമണമായിരുന്നുവെന്ന് ദേശീയ അന്വേഷണ ഏജൻസി (എൻ.ഐ.എ.) സ്ഥിരീകരിച്ചു. സ്ഫോടനം നടത്തിയത് ഉമർ ഉൻ നബി എന്നയാളാണെന്നും ഇയാൾ ചാവേറായിരുന്നുവെന്നും എൻ.ഐ.എ. അറിയിച്ചു.
സ്ഫോടനത്തിൻ്റെ പിന്നിൽ പ്രവർത്തിച്ച സഹായികളിലൊരാളായ അമീർ റാഷിദ് അലിയെ എൻ.ഐ.എ. അറസ്റ്റ് ചെയ്തു. സ്ഫോടകവസ്തുക്കൾ ഘടിപ്പിച്ച വാഹനം സംഘടിപ്പിക്കാൻ ഉമറുമായി ഗൂഢാലോചന നടത്തിയത് അമീറാണ്. സ്ഫോടനത്തിന് ഉപയോഗിച്ച കാർ അമീറിൻ്റെ പേരിലാണ് രജിസ്റ്റർ ചെയ്തിരുന്നത്. ജമ്മു കശ്മീരിലെ പാമ്പോർ, സംബൂര സ്വദേശിയാണ് അമീർ. വാഹനം വാങ്ങാൻ സഹായിക്കുന്നതിനായി ഇയാൾ ഡൽഹിയിലേക്ക് യാത്ര ചെയ്തിരുന്നതായി അന്വേഷണ ഉദ്യോഗസ്ഥർ കണ്ടെത്തി.
കൊല്ലപ്പെട്ട ഉമർ ഉൻ നബി പുൽവാമ സ്വദേശിയും ഫരീദാബാദിലെ അൽ ഫലാ യൂണിവേഴ്‌സിറ്റിയിലെ ജനറൽ മെഡിസിൻ വിഭാഗം അസിസ്റ്റൻ്റ് പ്രൊഫസറുമാണ്. ഫോറൻസിക് പരിശോധനയിലൂടെയാണ് ഇയാളെ തിരിച്ചറിഞ്ഞത്. ഇയാളുടെ ഉടമസ്ഥതയിലുള്ള മറ്റൊരു വാഹനവും തെളിവുകൾക്കായി എൻ.ഐ.എ. പിടിച്ചെടുത്ത് പരിശോധിക്കുന്നുണ്ട്.
സംഭവത്തിൽ നൂഹിലെ ഹയാത്ത് കോളനിയിൽ നിന്ന് റിസ്‌വാൻ, ഷൊയ്ബ് എന്നീ രണ്ട് പേരെ കേന്ദ്ര ഏജൻസികൾ ഞായറാഴ്ച അറസ്റ്റ് ചെയ്തു.
ഈ അറസ്റ്റുകൾ അൽ-ഫലാ യൂണിവേഴ്‌സിറ്റിയുമായി ബന്ധമുള്ള ഒരു വലിയ ഭീകരവാദ ഫണ്ടിംഗ് ശൃംഖലയിലേക്ക് വിരൽ ചൂണ്ടുന്നു. ഡോ. ഉമറിൻ്റെ കൂട്ടാളികളായ ഡോ. മുജാമ്മിൽ, ഡോ. ഷാഹീൻ എന്നിവരെക്കുറിച്ചുള്ള വിവരങ്ങൾ ലഭിക്കാൻ ഈ അറസ്റ്റുകൾ സഹായകമായേക്കും. അതേസമയം , ഉമറുമായി പരിചയമുണ്ടായിരുന്ന മൂന്ന് ഡോക്ടർമാരും ഒരു വളം വ്യാപാരിയും ഉൾപ്പെടെ കസ്റ്റഡിയിലെടുത്തിരുന്ന നാല് പേരെ കൃത്യമായ ബന്ധം കണ്ടെത്താൻ കഴിയാത്തതിനെ തുടർന്ന് എൻ.ഐ.എ. വിട്ടയച്ചു.
നവംബർ 10-ന് നടന്ന സ്ഫോടനത്തിൽ 13 പേർ കൊല്ലപ്പെടുകയും 30-ൽ അധികം പേർക്ക് പരിക്കേൽക്കുകയും ചെയ്തിരുന്നു. ഡൽഹി, ജമ്മു കശ്മീർ, ഹരിയാണ, ഉത്തർപ്രദേശ് തുടങ്ങിയ സംസ്ഥാനങ്ങളിലെ പോലീസുമായി ചേർന്ന് എൻ.ഐ.എ. അന്വേഷണം തുടരുകയാണ്. ആക്രമണത്തിന് പിന്നിലെ വിശാലമായ ഗൂഢാലോചനയും മറ്റ് വ്യക്തികളെയും കണ്ടെത്താനുള്ള ശ്രമത്തിലാണ് അന്വേഷണ സംഘം. ഇതുവരെ, പരിക്കേറ്റവർ ഉൾപ്പെടെ 73 സാക്ഷികളെ ഏജൻസി ചോദ്യം ചെയ്തു.