ന്യൂഡൽഹി: ഡൽഹി ചെങ്കോട്ട സ്ഫോടനക്കേസിലെ അന്വേഷണം പാകിസ്ഥാനിലേക്ക് നീങ്ങുന്നതായി റിപ്പോർട്ട്. അറസ്റ്റിലായ ലക്‌നൗ സ്വദേശിയായ വനിതാ ഡോക്ടർ ഷഹീന്, ജെയ്‌ഷെ-ഇ-മുഹമ്മദ് തലവൻ മസൂദ് അസറിൻ്റെ അനന്തരവൻ്റെ ഭാര്യ ആരിഫ ബീവിയുമായി അടുത്ത ബന്ധമുണ്ടെന്ന് അന്വേഷണ ഏജൻസികൾ കണ്ടെത്തി. ഡോക്ടർ ഷഹീൻ, ആരിഫ ബീവിയുമായി സ്ഥിരമായി സമ്പർക്കത്തിലായിരുന്നു എന്നാണ് ഏജൻസികൾ വ്യക്തമാക്കുന്നത്.(Delhi blast, Female doctor Shaheen's car found at university )
ജെയ്‌ഷെ വനിതാ സംഘത്തിനായി ഷഹീൻ പ്രവർത്തിച്ചിരുന്നു എന്ന വിവരം നേരത്തെ പുറത്തുവന്നിരുന്നു. എന്നാൽ, ജെയ്‌ഷെ മുഹമ്മദിലെ ഉന്നതരുമായി ഷഹീന് നേരിട്ട് ബന്ധമുണ്ടെന്നാണ് നിലവിൽ പുറത്തുവരുന്ന ഏറ്റവും പുതിയ റിപ്പോർട്ടുകൾ. ഇന്ത്യൻ സുരക്ഷാ ഏജൻസികൾക്ക് ഏറെ നിർണായകമായ ഈ കണ്ടെത്തൽ, ചെങ്കോട്ട സ്ഫോടനത്തിൻ്റെ പിന്നിലെ അന്താരാഷ്ട്ര ഗൂഢാലോചനയിലേക്ക് വിരൽചൂണ്ടുന്നു.
ഡൽഹി ചെങ്കോട്ട സ്ഫോടനക്കേസുമായി ബന്ധപ്പെട്ട് ഭീകരസംഘം ഉപയോഗിച്ച മൂന്നാമത്തെ കാറും അന്വേഷണ സംഘം കണ്ടെത്തി. ഭീകര സംഘത്തിലെ വനിതാ ഡോക്ടറായ ഷഹീൻ്റെ 'ബ്രീസ' കാറാണ് അൽ ഫലാഹ് സർവകലാശാലയിൽ പാർക്ക് ചെയ്ത നിലയിൽ കണ്ടെത്തിയത്. ഇതോടെ സ്ഫോടനത്തിന് ഉപയോഗിച്ച ഹ്യുണ്ടായി ഐ20 കാറിന് പുറമേ മൂന്ന് വാഹനങ്ങൾ കൂടി അന്വേഷണ ഏജൻസികളുടെ കസ്റ്റഡിയിലായി.
കഴിഞ്ഞ ദിവസം ചുവന്ന എക്കോ സ്പോർട്ട് കാർ ഫരീദാബാദ് പോലീസ് കണ്ടെത്തിയിരുന്നു. DL 10 CK 0458 എന്ന നമ്പറുള്ള ഈ കാർ ഖണ്ഡവാലി ഗ്രാമത്തിൽ പാർക്ക് ചെയ്തിരുന്ന നിലയിലായിരുന്നു. ഉമറും മുസമിലും രണ്ട് കാറുകൾ വ്യാജ വിലാസത്തിൽ രജിസ്റ്റർ ചെയ്തതായും പോലീസ് കണ്ടെത്തി. രണ്ടാമത്തെ കാർ രജിസ്റ്റർ ചെയ്തിരുന്നത് ദില്ലി ന്യൂ സീലംപൂരിലെ വ്യാജ വിലാസത്തിലായിരുന്നു. ഡോക്ടർ ഉമർ നബി എന്നയാളുടെ പേരിലാണ് വാഹനം രജിസ്റ്റർ ചെയ്തിരിക്കുന്നത്.
സ്ഫോടനത്തിൻ്റെ പശ്ചാത്തലത്തിൽ ഡൽഹി നഗരത്തിൽ ഉടനീളം പോലീസ് ജാഗ്രതാ നിർദ്ദേശം നൽകിയിട്ടുണ്ട്. രാജ്യസുരക്ഷയെ വെല്ലുവിളിച്ച ചെങ്കോട്ട സ്ഫോടനത്തിൻ്റെ ചുരുളഴിക്കാനുള്ള ശ്രമത്തിലാണ് എൻ.ഐ.എ. സ്ഫോടനത്തിനിടെ കൊല്ലപ്പെട്ട ഡോ. ഉമർ നബിയും കൂട്ടാളികളും നേരത്തെയും ആക്രമണത്തിന് പദ്ധതിയിട്ടിരുന്നതായി അന്വേഷണ സംഘം കണ്ടെത്തി.
റിപ്പബ്ലിക് ദിനാഘോഷങ്ങൾക്കിടയിലോ ദീപാവലിക്കോ ആക്രമണം നടത്താനായിരുന്നു ഭീകരരുടെ നീക്കം. ഉമറും അറസ്റ്റിലായ മുസ്‌മിൽ ഷക്കീലും കഴിഞ്ഞ ജനുവരിയിൽ ചെങ്കോട്ട സന്ദർശിച്ചിരുന്നു. മുസ്‌മിലിൻ്റെ ഫോൺ പരിശോധിച്ചതിൽ നിന്ന് ഇവർ ചാന്ദ്നി ചൗക്കിലും ജുമാ മസ്ജിദിലും എത്തിയതായും കണ്ടെത്തി. ദീപാവലി പോലുള്ള ആഘോഷവസരങ്ങളിൽ ആക്രമണം നടത്താനായിരുന്നു ഇവരുടെ പദ്ധതിയെന്നാണ് സൂചന.
സംഭവ ദിവസം ഉമർ ഏകദേശം പതിനൊന്ന് മണിക്കൂർ ഡൽഹിയിൽ ഉണ്ടായിരുന്നു. ഫരീദാബാദിലെ കൂട്ടാളികളുടെ അറസ്റ്റുകൾ അറിഞ്ഞ ഇയാൾ പരിഭ്രാന്തിയിലായി. അറസ്റ്റ് ഉണ്ടായില്ലെങ്കിൽ ഇതിലും വലിയ ആക്രമണത്തിന് സാധ്യതയുണ്ടായിരുന്നു എന്നാണ് അന്വേഷണ ഏജൻസികളുടെ വിലയിരുത്തൽ.
അതേസമയം, ആശുപത്രിയിൽ ചികിത്സയിലായിരുന്ന ഒരാൾ കൂടി മരിച്ചതോടെ ആകെ മരണസംഖ്യ 13 ആയി ഉയർന്നു. എൽ.എൻ.ജെ.പി. ആശുപത്രിയിൽ ചികിത്സയിലായിരുന്ന ബിലാൽ എന്നയാളാണ് മരിച്ചത്. നേരത്തെ 12 മരണമായിരുന്നു സ്ഥിരീകരിച്ചിരുന്നത്. സ്ഫോടനവുമായി ബന്ധപ്പെട്ട് എക്കോ സ്പോർട്ട് കാർ പാർക്ക് ചെയ്ത വ്യക്തി കൂടി അറസ്റ്റിലായി. ഫഹീം ആണ് അറസ്റ്റിലായത്. അറസ്റ്റിലായ ഫഹീം, മുഖ്യപ്രതിയായ ഡോ. ഉമറിൻ്റെ ബന്ധുവാണെന്നാണ് വിവരം. ഫരീദാബാദ് സർവകലാശാലയിലെ രണ്ട് വിദ്യാർഥികളെ പോലീസ് കൂടി കസ്റ്റഡിയിലെടുത്തു. ചെങ്കോട്ട സ്ഫോടനവുമായി ബന്ധപ്പെട്ട് പുതിയ സി.സി.ടി.വി. ദൃശ്യങ്ങൾ പുറത്തുവന്നു. സ്ഫോടനത്തിനു മുൻപ് ഡോ. ഉമർ ഉൻ-നബി വെള്ള ഐ20 കാറുമായി കൊണാട്ട് പ്ലേസിൽ എത്തിയതിൻ്റെ ദൃശ്യങ്ങളാണ് പുറത്തുവന്നത്. ഇത് ഗൂഢാലോചനയുടെ വ്യാപ്തി വർധിപ്പിക്കുന്ന വിവരമാണ്.
രാജ്യത്തെ സൈനിക മേധാവിയുടെ അധികാരം വിപുലീകരിച്ചതിന് പിന്നാലെ, പ്രകോപനപരമായ അവകാശവാദവുമായി പാകിസ്താൻ പ്രതിരോധമന്ത്രി ഖ്വാജ ആസിഫ് വീണ്ടും രംഗത്ത്. ഇന്ത്യയ്‌ക്കെതിരെയും താലിബാനെതിരെയും യുദ്ധം ചെയ്യാൻ തങ്ങളുടെ രാജ്യം പൂർണമായും സജ്ജമാണ് എന്നാണ് ഖ്വാജ ആസിഫിന്റെ പ്രസ്താവന.
"ഞങ്ങൾ കിഴക്കും പടിഞ്ഞാറും അതിർത്തികളിൽ യുദ്ധത്തിന് സജ്ജമാണ്. ആദ്യ റൗണ്ടിൽ ദൈവം ഞങ്ങളെ സഹായിച്ചു, രണ്ടാം റൗണ്ടിലും അദ്ദേഹം ഞങ്ങളെ സഹായിക്കും," കിഴക്ക് വശത്തുള്ള ഇന്ത്യയെയും പടിഞ്ഞാറുള്ള അഫ്ഗാനിസ്ഥാനെയും പരാമർശിച്ചുകൊണ്ട് ഒരു പൊതുപരിപാടിയിൽ ഖ്വാജ ആസിഫ് പ്രസ്താവിച്ചു.
ചൊവ്വാഴ്ച ഇസ്ലാമാബാദിലുണ്ടായ ചാവേർ സ്ഫോടനത്തിൽ 12 പേർ കൊല്ലപ്പെടുകയും 36 പേർക്ക് പരിക്കേൽക്കുകയും ചെയ്തതിന് പിന്നാലെയാണ് ഖ്വാജ ആസിഫിൻ്റെ ഈ വിവാദ പരാമർശം. പാകിസ്താനി താലിബാൻ (ടി.ടി.പി.) ഈ ചാവേറാക്രമണത്തിൻ്റെ ഉത്തരവാദിത്വം ഏറ്റെടുത്തിരുന്നു.
ഇന്ത്യൻ പിന്തുണയോടെ സജീവമായ ഗ്രൂപ്പുകൾക്ക് ആക്രമണത്തിൽ പങ്കുണ്ടെന്ന് പാക് പ്രധാനമന്ത്രി ഷഹ്ബാസ് ഷെരീഫ് ആരോപിച്ചു. എന്നാൽ, ബോംബാക്രമണത്തിലൂടെ താലിബാൻ ഒരു സന്ദേശം നൽകുകയായിരുന്നുവെന്ന് ഖവാജ ആസിഫ് പറഞ്ഞു.
"അഫ്ഗാനിലെ ഭരണാധികാരികൾക്ക് പാകിസ്താനിലെ ഭീകരവാദം തടയാൻ കഴിയും. എന്നാൽ ഈ യുദ്ധം ഇസ്ലാമാബാദ് വരെ എത്തിച്ചത് താലിബാനിൽ നിന്നുള്ള ഒരു സന്ദേശമാണ്, അതിന് മറുപടി നൽകാൻ പാകിസ്താന് സമ്പൂർണശേഷിയുണ്ട്," ഖ്വാജ 'എക്‌സി'ൽ പങ്കുവെച്ച കുറിപ്പിൽ പറഞ്ഞു. ഡൽഹിയിലുണ്ടായ സ്ഫോടനത്തെക്കുറിച്ചുള്ള വിവാദപരാമർശങ്ങൾക്ക് തൊട്ടുപിന്നാലെയാണ് ആസിഫിൻ്റെ പുതിയ പ്രസ്താവനകൾ.
ഡൽഹിയിലെ സ്ഫോടനത്തെ 'ഗ്യാസ് സിലിണ്ടർ സ്ഫോടനം മാത്രമാണ്' എന്ന് ഖ്വാജ വിശേഷിപ്പിക്കുകയും ഇന്ത്യ സംഭവത്തെ രാഷ്ട്രീയവൽക്കരിക്കുകയാണെന്ന് ആരോപിക്കുകയും ചെയ്തിരുന്നു. ഈ ആരോപണത്തെ ശ്രദ്ധ തിരിക്കാനുള്ള നിരാശാജനകമായ ശ്രമം എന്ന് ഇന്ത്യൻ അധികൃതർ തള്ളിക്കളഞ്ഞിരുന്നു.
അതേസമയം, ഡൽഹിയിലെ മഹിപാൽപൂരിലെ റാഡിസൺ ഹോട്ടലിന് സമീപം വീണ്ടും സ്ഫോടന ശബ്ദം കേട്ടതായി റിപ്പോർട്ട്. ഈയടുത്ത് ചെങ്കോട്ടക്ക് സമീപം നടന്ന സ്ഫോടനത്തിന്റെ പശ്ചാത്തലത്തിൽ, ശബ്ദം കേട്ടതിനെ തുടർന്ന് പ്രദേശത്ത് പരിഭ്രാന്തി ഉടലെടുത്തു. വിവരം ലഭിച്ചതിനെ തുടർന്ന് മൂന്ന് ഫയർ എഞ്ചിനുകളും പോലീസ് സംഘവും സ്ഥലത്തെത്തി പരിശോധന നടത്തി. എന്നാൽ, പരിശോധനയിൽ സംശയാസ്പദമായി ഒന്നും കണ്ടെത്താനായില്ലെന്ന് പോലീസ് അറിയിച്ചു. സ്ഥലത്ത് കേട്ടത് സ്ഫോടന ശബ്ദമല്ല, മറിച്ച് ബസിൻ്റെ ടയർ പൊട്ടിത്തെറിച്ച ശബ്ദമാണ് എന്ന് പോലീസ് സ്ഥിരീകരിച്ചു.
ഡൽഹിയിലെ ചരിത്രപ്രസിദ്ധമായ ചെങ്കോട്ടയ്ക്ക് സമീപം നടന്ന സ്ഫോടനക്കേസ് അന്വേഷിക്കുന്ന അന്വേഷണ ഉദ്യോഗസ്ഥർ ഞെട്ടിക്കുന്ന ഭീകരപദ്ധതിയുടെ വിശദാംശങ്ങൾ കണ്ടെത്തി. ജെയ്‌ഷെ-ഇ-മുഹമ്മദുമായി ബന്ധമുള്ള ഡോക്ടർമാർ ഉൾപ്പെട്ട ഭീകരസംഘടന, ഡിസംബർ 6 ന് ദേശീയ തലസ്ഥാന മേഖലയിലെ (എൻ.സി.ആർ.) ആറ് സ്ഥലങ്ങളിൽ ഏകോപിത സ്ഫോടനങ്ങൾ നടത്താൻ ആസൂത്രണം ചെയ്തിരുന്നു.
സ്ഫോടനങ്ങൾക്കായി തിരഞ്ഞെടുത്ത തീയതി അതീവ ഗൗരവതരമാണ്. 1992-ൽ അയോധ്യയിലെ ബാബറി മസ്ജിദ് പൊളിച്ചുമാറ്റിയ ദിവസമായിരുന്നു ഡിസംബർ 6. "ബാബറി മസ്ജിദ് പൊളിച്ചതിന് പ്രതികാരം ചെയ്യാൻ" ആഗ്രഹിച്ചതിനാലാണ് അറസ്റ്റിലായ ഭീകരർ ഈ തീയതി തിരഞ്ഞെടുത്തതെന്ന് ചോദ്യം ചെയ്യലിൽ സമ്മതിച്ചതായി ഉന്നത ഇന്റലിജൻസ് വൃത്തങ്ങൾ അറിയിച്ചു.
ജയ്‌ഷെ-ഇ-മുഹമ്മദ് തലവൻ മസൂദ് അസ്ഹർ വർഷങ്ങളായി തന്റെ കോളങ്ങളിലൂടെ അയോധ്യയെ ലക്ഷ്യമിടുമെന്ന് പ്രതിജ്ഞയെടുത്തിരുന്നു. ദേശീയ തലസ്ഥാന മേഖലയിൽ സ്ഫോടന പരമ്പരകൾ നടത്താൻ ഭീകരസംഘടനയിലെ അംഗങ്ങൾ ഘട്ടം ഘട്ടമായുള്ള പദ്ധതി തയ്യാറാക്കിയതായി ചോദ്യം ചെയ്യലിൽ തെളിഞ്ഞു. ഉദ്യോഗസ്ഥർ പങ്കുവെച്ചത് അഞ്ച് ഘട്ടങ്ങളുള്ള പദ്ധതിയാണ്,
ഘട്ടം 1: ജെയ്‌ഷെ-മുഹമ്മദ്, അൻസാർ ഗസ്‌വത്-ഉൽ-ഹിന്ദ് എന്നിവയുമായി ബന്ധമുള്ള ഭീകര സംഘടനയുടെ രൂപീകരണം.
ഘട്ടം 2: ഇംപ്രൊവൈസ്ഡ് സ്ഫോടകവസ്തുക്കൾ (ഐ.ഇ.ഡി.കൾ) കൂട്ടിച്ചേർക്കുന്നതിനും വെടിമരുന്ന് ശേഖരിക്കുന്നതിനുമുള്ള അസംസ്‌കൃത വസ്തുക്കൾ ഹരിയാനയിലെ നൂഹ്, ഗുരുഗ്രാം എന്നിവിടങ്ങളിൽ നിന്ന് സംഭരിക്കുക.
ഘട്ടം 3: മാരകമായ രാസവസ്തുക്കൾ ഉപയോഗിച്ചുള്ള ഐ.ഇ.ഡി.കളുടെ നിർമ്മാണവും സ്ഫോടനം നടത്താൻ സാധ്യതയുള്ള ലക്ഷ്യസ്ഥാനങ്ങളുടെ നിരീക്ഷണവും.
ഘട്ടം 4: നിരീക്ഷണത്തിന് ശേഷം അസംബിൾ ചെയ്ത ബോംബുകൾ മൊഡ്യൂളിലെ അംഗങ്ങൾക്കിടയിൽ വിതരണം ചെയ്യുക.
ഘട്ടം 5 (അവസാനം): ഡൽഹിയിലെ ആറ് മുതൽ ഏഴ് വരെ സ്ഥലങ്ങളിൽ ഏകോപിത ബോംബാക്രമണങ്ങൾ നടത്തുക.
ഈ വർഷം ഓഗസ്റ്റിൽ ആക്രമണങ്ങൾ നടത്താനായിരുന്നു യഥാർത്ഥ പദ്ധതി. എന്നാൽ പ്രവർത്തന കാലതാമസത്തെ തുടർന്നാണ് പുതിയ തീയതിയായി ഡിസംബർ 6 തിരഞ്ഞെടുത്തത്. അന്വേഷണ സംഘം സുപ്രധാന വിവരങ്ങൾ കണ്ടെത്തി. കേസിലെ മുഖ്യപ്രതികളായ ഡോ. ഉമറിൻ്റെയും മുസമിലിൻ്റെയും മുറികളിൽ നിന്ന് ഇവർ ഉപയോഗിച്ചിരുന്ന ഡയറികളും നോട്ട്ബുക്കുകളും എൻ.ഐ.എ. പിടിച്ചെടുത്തു. അൽഫല സർവകലാശാലയിലെ ഡോക്ടർമാരുടെ മുറികളിൽ നിന്നാണ് ഇവ കണ്ടെത്തിയത്.
ഡയറിയിലെ വിവരങ്ങൾ ആസൂത്രിതമായ ഭീകരാക്രമണ പദ്ധതികളെക്കുറിച്ചുള്ള സൂചനകളാണ് നൽകുന്നത്. നവംബർ 8 മുതൽ 12 വരെയുള്ള തീയതികളിലെ കോഡ് ചെയ്ത വിവരങ്ങളും ഡയറിയിൽ നിന്ന് കണ്ടെത്തി. ഇത് ആക്രമണത്തിനുള്ള ഒരുക്കങ്ങളുമായി ബന്ധപ്പെട്ടുള്ളതാണെന്നാണ് നിഗമനം.
ജമ്മു കശ്മീർ, ഫരീദാബാദ് എന്നിവിടങ്ങളിൽ നിന്നുള്ള 25 ഓളം പേരുടെ പേരുകൾ ഡയറിയിൽ എഴുതിയിരുന്നു. ഇവർക്ക് ഭീകര ശൃംഖലയുമായി ബന്ധമുണ്ടോ എന്ന് അന്വേഷണ സംഘം പരിശോധിച്ചുവരികയാണ്. പിടിയിലായ ഡോക്ടർമാരുൾപ്പെടെയുള്ള പ്രതികളെ വിശദമായി ചോദ്യം ചെയ്യുന്നതിലൂടെ കൂടുതൽ വിവരങ്ങൾ ലഭിക്കുമെന്നാണ് അന്വേഷണ സംഘത്തിൻ്റെ പ്രതീക്ഷ. ചെങ്കോട്ട മെട്രോ സ്റ്റേഷന് സമീപം നടന്ന കാർ സ്ഫോടനത്തിൽ ഫരീദാബാദിലെ അൽ ഫലാഹ് സർവകലാശാലയിൽ ജോലി ചെയ്യുന്ന കശ്മീരി ഡോക്ടറായ ഡോ. ഉമർ ആയിരുന്നു കാർ ഓടിച്ചിരുന്നത്. ഫരീദാബാദിൽ നടന്ന റെയ്ഡുകളിൽ 2,900 കിലോഗ്രാം അമോണിയം നൈട്രേറ്റ് (സ്‌ഫോടകവസ്തു) കണ്ടെത്തിയതിന് പിന്നാലെയാണ് ഡോക്ടർമാരായ മുസമ്മിൽ ഷെയ്ക്, ഷഹീൻ സയീദ് എന്നിവർ അറസ്റ്റിലായത്. ഉന്നത വിദ്യാഭ്യാസമുള്ള പ്രൊഫഷണലുകൾ ഉൾപ്പെടുന്ന ജെയ്‌ഷെ പുതുതായി രൂപീകരിച്ച ഭീകര സംഘടനയിലെ അംഗങ്ങളാണ് ഈ ഡോക്ടർമാർ എന്ന് സംശയിക്കുന്നു. തൻ്റെ കൂട്ടാളികൾ അറസ്റ്റിലായതിലുള്ള പരിഭ്രാന്തി കാരണമാണ് ഉമർ നിരാശയോടെ കാർ സ്ഫോടനം നടത്തിയതെന്നും, വലിയ ആക്രമണത്തിനുള്ള പദ്ധതി ആസൂത്രണം ചെയ്തിരുന്നുവെന്നും അന്വേഷണത്തിൽ കണ്ടെത്തി.
രണ്ടംഗങ്ങൾ വീതമുള്ള നാല് സംഘങ്ങളായി സ്ഫോടനം നടത്താനായിരുന്നു ഇവരുടെ ശ്രമം. ഇതിനായി 'സിഗ്നൽ' ആപ്പ് വഴിയാണ് ഭീകരർ ആശയവിനിമയം നടത്തിയിരുന്നതെന്നും പോലീസ് അറിയിച്ചു. ദേശീയ അന്വേഷണ ഏജൻസി (എൻ.ഐ.എ.) അന്വേഷണം ഊർജിതമാക്കുകയും കൂടുതൽ പേർക്കായി തിരച്ചിൽ ആരംഭിക്കുകയും ചെയ്തിട്ടുണ്ട്. സമാനമായ സ്ഫോടനങ്ങൾ ആസൂത്രണം ചെയ്ത ഇവർ കൂടുതൽ വാഹനങ്ങൾ വാങ്ങിയിരുന്നോ എന്നും അന്വേഷണസംഘം പരിശോധിക്കുന്നുണ്ട്. സ്ഫോടനത്തിന് ഉപയോഗിച്ച ഐ20, പിന്നീട് കണ്ടെത്തിയ എക്കോസ്പോർട്ട് കാറുകൾക്ക് പുറമെ, രണ്ട് വാഹനങ്ങൾ കൂടി സംഘം വാങ്ങിയതായാണ് പോലീസിന് ലഭിക്കുന്ന സൂചന. ഇവയിൽ സ്ഫോടക വസ്തുക്കൾ നിറച്ച് വലിയ ആക്രമണങ്ങൾ നടത്താൻ പദ്ധതിയിട്ടിരുന്നതായാണ് നിഗമനം.
ഹരിയാനയിൽ നിന്ന് ഫരീദാബാദ് പോലീസ് കണ്ടെത്തിയ ചുവന്ന എക്കോ സ്പോർട്ട് കാർ സ്ഫോടകവസ്തുക്കൾ കടത്താൻ ഉപയോഗിച്ചതായി സൂചനയുണ്ട്. അമോണിയം നൈട്രേറ്റ് കടത്താൻ ഈ കാർ ഉപയോഗിച്ചു എന്നാണ് പ്രാഥമിക നിഗമനം. കേസുമായി ബന്ധപ്പെട്ട് കാൺപൂരിൽ നിന്ന് അനന്ത്‌നാഗ് സ്വദേശി മുഹമ്മദ് ആരിഫ് എന്ന ഒരു ഡോക്ടറെക്കൂടി എൻ.ഐ.എ. കസ്റ്റഡിയിലെടുത്തു. നേരത്തെ പിടിയിലായ പർവ്വേസിനെ ഡൽഹിയിൽ എത്തിച്ചിട്ടുണ്ട്.
ഭീകരർക്ക് തുർക്കിയിൽ നിന്ന് സഹായം ലഭിച്ചതിനെക്കുറിച്ചും അന്വേഷണം നടക്കുന്നുണ്ട്. തുർക്കിയിലെ ചിലർ ഉമർ അടക്കമുള്ളവരുമായി സംസാരിച്ചിരുന്നതായാണ് വിവരം. കാർ ഓടിച്ചിരുന്നത് പുൽവാമ സ്വദേശി ഡോ. ഉമർ തന്നെയെന്ന് ഡി.എൻ.എ. പരിശോധനാ ഫലം സ്ഥിരീകരിച്ചിരുന്നു. കശ്മീരിൽ അറസ്റ്റിലായ ഡോക്ടർ സജാദ് മാലിക്ക് പ്രതിയായ മുസമിലിൻ്റെ സുഹൃത്താണ്. ഉമർ വാങ്ങിയ ചുവന്ന കാർ ഉപയോഗിച്ചിരുന്നത് മുസമീൽ ആയിരുന്നു. വലിയ ആക്രമണത്തെക്കുറിച്ച് ഉമർ എപ്പോഴും സംസാരിച്ചിരുന്നു എന്ന് അന്വേഷണ ഏജൻസി വൃത്തങ്ങൾ പറയുന്നു.
ഉമറും കൂട്ടാളികളും യഥാർത്ഥത്തിൽ ഡിസംബർ ആറിന് ചെങ്കോട്ടയിൽ സ്ഫോടനം നടത്താൻ ആയിരുന്നു ആസൂത്രണം ചെയ്തിരുന്നത്. ഈ വിവരത്തിൻ്റെ അടിസ്ഥാനത്തിലാണ് കേന്ദ്രമന്ത്രിസഭ ഈ നീക്കത്തെ 'ഭീകര നീക്കം' എന്ന് നിഗമനത്തിലെത്തിയത്. സ്ഫോടനത്തിനു മുൻപ് ഡോക്ടർ ഉമർ ഓൾഡ് ഡൽഹിയിൽ എത്തിയിരുന്നതായി വിവരം ലഭിച്ചു. രാംലീല മൈതാനിന് സമീപമുള്ള പള്ളിയിൽ ഉമർ 10 മിനിറ്റ് സമയം ചെലവിട്ടു. ഇവിടെ നിന്ന് രണ്ടരയോടെയാണ് ഉമർ ചെങ്കോട്ടയ്ക്കടുത്തേക്ക് പോയത്. ഉമർ എത്തിയ പള്ളിയിലെ സി.സി.ടി.വി. ദൃശ്യം പോലീസിന് ലഭിച്ചു കഴിഞ്ഞു. ഇതിനിടെ, സുരക്ഷാകാരണങ്ങൾ ചൂണ്ടിക്കാട്ടി സ്ഫോടനം നടന്നതിന് സമീപമുള്ള ലാൽ ഖില മെട്രോ സ്റ്റേഷൻ ഇനിയൊരു അറിയിപ്പ് ഉണ്ടാകുന്നതുവരെ അടച്ചിട്ടിരിക്കുകയാണ്.