ന്യൂഡൽഹി: ചെങ്കോട്ട സ്ഫോടനവുമായി ബന്ധപ്പെട്ട് സ്ഫോടന സ്ഥലത്തുനിന്നും വെടിയുണ്ടകളും ഒഴിഞ്ഞ ഷെല്ലുകളും കണ്ടെത്തി. എന്നാൽ, സ്ഫോടനത്തിന് ഉപയോഗിച്ച തോക്ക് ഇതുവരെ കണ്ടെത്താനായിട്ടില്ല. കാറിൽ 30 കിലോയോളം സ്ഫോടകവസ്തുക്കൾ സൂക്ഷിച്ചിരുന്നതായാണ് അന്വേഷണ സംഘത്തിൻ്റെ നിഗമനം. അതിമാരകശേഷിയുള്ള ടി.എ.ടി.പി എന്ന സ്ഫോടകവസ്തുവാണ് ആക്രമണത്തിന് ഉപയോഗിച്ചതെന്നാണ് പ്രാഥമിക നിഗമനം.(Delhi blast, Bullets and empty shells found at the site)
ഡൽഹി ചെങ്കോട്ട സ്ഫോടനത്തിൽ പൊട്ടിത്തെറിച്ച ഐ20 കാർ ഓടിച്ചിരുന്ന ഭീകരൻ ഉമർ മുഹമ്മദിന് ആക്രമണത്തിനായി 20 ലക്ഷം രൂപ ലഭിച്ചിരുന്നതായി ദേശീയ അന്വേഷണ ഏജൻസി (എൻഐഎ) കണ്ടെത്തി. ഈ ഹവാല ഇടപാടുമായി ബന്ധമുള്ള ചിലരെ അന്വേഷണ സംഘം വിശദമായി ചോദ്യം ചെയ്തുവരികയാണ്.
ഇന്ത്യയിൽ സ്ഫോടന പരമ്പരകൾ നടത്താൻ ഭീകരർ വിപുലമായ പദ്ധതികൾ ആസൂത്രണം ചെയ്തിരുന്നതായും അന്വേഷണ ഏജൻസികൾക്ക് വിവരം ലഭിച്ചിട്ടുണ്ട്. സ്ഫോടകവസ്തുക്കൾ നിർമിക്കുന്നതിനായി ഉമർ മുഹമ്മദ് ഹരിയാണയിലെ നൂഹിൽനിന്ന് വലിയ അളവിൽ വളം (ഫെർട്ടിലൈസർ) സംഭരിച്ചതായും അന്വേഷണത്തിൽ വ്യക്തമായിട്ടുണ്ട്. സ്ഫോടകവസ്തു നിർമ്മാണത്തിന് ഉപയോഗിക്കാവുന്ന എൻപികെ (NPK) വളമാണ് ഇയാൾ വാങ്ങിക്കൂട്ടിയത്.
ലൈസൻസില്ലാതെ വളം വിൽപ്പന നടത്തിയിരുന്ന ദിനേശ് എന്നയാളെ നൂഹിൽനിന്ന് അധികൃതർ കസ്റ്റഡിയിലെടുത്തിട്ടുണ്ട്. ഇയാളെ ചോദ്യം ചെയ്യുന്നതിലൂടെ ഉമർ മുഹമ്മദിൻ്റെ ഗൂഢാലോചനയുടെ കൂടുതൽ വിവരങ്ങൾ പുറത്തുവരുമെന്നാണ് എൻഐഎയുടെ പ്രതീക്ഷ.
സ്ഫോടനക്കേസിൽ കസ്റ്റഡിയിലുള്ള ഭീകരരിൽ നിന്ന് ദേശീയ അന്വേഷണ ഏജൻസി (എൻഐഎ) നിർണായക വിവരങ്ങൾ ശേഖരിക്കുകയാണ്. ഹരിയാണയിലെ നൂഹിൽ നിന്ന് കസ്റ്റഡിയിലെടുത്ത ഡോക്ടർമാരിൽ ഒരാളുടെ മൊബൈൽ ഫോണിൽ നിന്ന് സംശയാസ്പദമായ ഫോൺ നമ്പറുകൾ കണ്ടെത്തിയിട്ടുണ്ട്. ഈ നമ്പറുകൾ കേന്ദ്രീകരിച്ച് എൻഐഎ വിശദമായ അന്വേഷണം നടത്തും.
ഡോക്ടർമാരായ മുസമ്മിൽ, ആദിൽ, ഷെഹീൻ എന്നിവരെ എൻഐഎ സംഘം വിശദമായി ചോദ്യം ചെയ്തു. സ്ഫോടനം നടത്തിയ ഉമർ ഉൾപ്പെടെയുള്ള ഡോക്ടർമാർ പലതവണ നൂഹ് സന്ദർശിച്ചുവെന്ന വിവരവും അന്വേഷണ സംഘത്തിന് ലഭിച്ചു. കേസുമായി ബന്ധപ്പെട്ട് അയൽ സംസ്ഥാനങ്ങളിൽ ഉൾപ്പെടെ എൻഐഎ പരിശോധന തുടരുകയാണ്.
ഭീകര സംഘടനകളുമായി ബന്ധമുണ്ടെന്ന സംശയത്തെ തുടർന്ന് നേരത്തെ എൻഐഎ അറസ്റ്റ് ചെയ്ത അൽ ഫലാഹ് സർവകലാശാലയിലെ എംബിബിഎസ് വിദ്യാർഥിയെ ചോദ്യം ചെയ്യലിന് ശേഷം വിട്ടയച്ചു.
ചെങ്കോട്ട സ്ഫോടനവുമായി ബന്ധപ്പെട്ട സ്ഫോടകവസ്തുക്കൾ പൊട്ടിത്തെറിച്ച് ഒൻപത് പേർ കൊല്ലപ്പെട്ട നൗഗാം സ്ഫോടനത്തിൻ്റെ കാരണം കണ്ടെത്താനുള്ള അന്വേഷണം ഊർജിതമാക്കിയിട്ടുണ്ട്. സ്ഫോടനം സംഭവിച്ചതിൻ്റെ കൃത്യമായ കാരണം കണ്ടെത്താനുള്ള ശ്രമങ്ങൾ തുടരുകയാണ്.