ന്യൂഡൽഹി: ചെങ്കോട്ട സ്ഫോടനക്കേസുമായി ബന്ധപ്പെട്ട് ഉത്തരാഖണ്ഡിലെ ഹൽദ്വാനിയിൽ നിന്ന് മൂന്നുപേരെ പോലീസ് അറസ്റ്റ് ചെയ്തു. ഇവരിൽ ഒരു മതപണ്ഡിതനും ഉൾപ്പെടുന്നു. ബിലാലി പള്ളിയിലെ ഇമാം മുഹമ്മദ് ആസിഫ്, ഇയാളുടെ രണ്ട് സഹായികൾ എന്നിവരാണ് പിടിയിലായത്. സ്ഫോടനം നടത്തിയ പ്രധാന പ്രതിയായ ഉമർ നബിയുടെ ഫോൺ വിവരങ്ങൾ വിശദമായി പരിശോധിച്ചതിനെ തുടർന്നാണ് ഇമാം മുഹമ്മദ് ആസിഫ് ഉമർ നബിയുമായി ബന്ധപ്പെട്ടിരുന്നതായി കണ്ടെത്തിയത്.(Delhi blast, 3 people linked to terrorist Umar arrested in Uttarakhand)
ചെങ്കോട്ട സ്ഫോടനത്തിൽ വിദേശത്ത് നിന്നുള്ള ഭീകരരാണ് സംഘത്തെ നിയന്ത്രിച്ചതെന്ന് വ്യക്തമാക്കുന്ന കൂടുതൽ തെളിവുകൾ പുറത്തുവന്നു. വിദേശത്തുള്ള ഉകാസ എന്ന ഭീകരൻ ഉമർ അടക്കമുള്ളവരുമായി അഞ്ച് വർഷം മുൻപേ ബന്ധം സ്ഥാപിച്ചതായി എൻ.ഐ.എ. കണ്ടെത്തി. അറസ്റ്റിലായ ഭീകരരുടെ ഇലക്ട്രോണിക് ഉപകരണങ്ങൾ പരിശോധിച്ചതിൽ നിന്നാണ് പാക്കിസ്ഥാനിലേക്കും അഫ്ഗാനിസ്ഥാനിലേക്കും നീളുന്ന കണ്ണികളെക്കുറിച്ചുള്ള തെളിവുകൾ ലഭിച്ചത്.
വൈറ്റ് കോളർ ഭീകരസംഘത്തെ നിയന്ത്രിച്ചിരുന്ന ഉകാസ എന്ന അപരനാമത്തിൽ അറിയപ്പെടുന്ന വ്യക്തി 2020-ൽ തന്നെ പ്രതികളുമായി ബന്ധപ്പെട്ടിരുന്നു. കേസിൽ പിടിയിലായ ആദിലിന്റെ സഹോദരൻ മുസാഫിർ വഴിയാണ് മറ്റ് ഡോക്ടർമാരിലേക്ക് ഉകാസ എത്തുന്നത്. 2020 മുതൽ ഉമർ, മുസമ്മിൽ എന്നിവരുമായി ഉകാസ ആശയവിനിമയം നടത്തി. ചാവേർ സ്ഫോടനം നടത്താനുള്ള പദ്ധതികളിലേക്ക് പ്രതികളെ എത്തിച്ചത് ഉകാസയുടെ നിർദ്ദേശപ്രകാരമാണ്.
2012-ൽ ഭീകരവിരുദ്ധ കേസിനെ തുടർന്ന് രാജ്യം വിട്ട കർണാടക സ്വദേശി മുഹമ്മദ് ഷാഹിദ് ഫൈസലാണ് ഉകാസ എന്ന അപരനാമത്തിൽ അറിയപ്പെടുന്നതെന്നാണ് ഏജൻസികളുടെ പ്രാഥമിക നിഗമനം. ഇയാളുടെ സഹായത്തോടെയാണ് ആദിലിന്റെ സഹോദരൻ മുസാഫിർ തുർക്കി വഴി അഫ്ഗാനിസ്ഥാനിലേക്ക് കടന്നത്. ഫരീദാബാദ് സംഘം ഉകാസ രാജ്യത്തുടനീളം ലക്ഷ്യമിട്ട നെറ്റ്വർക്കുകളിൽ ഒന്നു മാത്രമാണെന്നും എൻ.ഐ.എ. കണ്ടെത്തിയിട്ടുണ്ട്.
ഭീകരാക്രമണങ്ങളുടെ സാധ്യത കണക്കിലെടുത്ത് രാജ്യത്തെ വിമാനത്താവളങ്ങളിൽ ഡ്രോൺ വേധ സംവിധാനം (Anti-drone systems) സ്ഥാപിക്കാൻ ആഭ്യന്തര മന്ത്രാലയം തീരുമാനിച്ചു. കേസുമായി ബന്ധമുള്ള പ്രതികൾ പ്രവർത്തിച്ച അൽ ഫലാഹ് സർവകലാശാലയ്ക്ക് ദേശീയ ന്യൂനപക്ഷ വിദ്യാഭ്യാസ കമ്മീഷൻ കാരണം കാണിക്കൽ നോട്ടീസ് നൽകി. സർവകലാശാലയുടെ ന്യൂനപക്ഷ പദവി എടുത്തു കളയാതിരിക്കാൻ കാരണം വ്യക്തമാക്കണമെന്നാണ് നോട്ടീസിലെ ആവശ്യം.