ന്യൂഡൽഹി: ബംഗാൾ ഉൾക്കടലിൽ രൂപം കൊണ്ട ന്യൂനമർദം 'മോന്ത' (Montha) ചുഴലിക്കാറ്റായി ശക്തി പ്രാപിച്ച് തീവ്ര ചുഴലിക്കാറ്റായി മാറുമെന്ന് കേന്ദ്ര കാലാവസ്ഥാ നിരീക്ഷണ കേന്ദ്രം (ഐ.എം.ഡി.) മുന്നറിയിപ്പ് നൽകി. ഒക്ടോബർ 28-ന് വൈകുന്നേരത്തോടെയോ രാത്രിയോ ചുഴലിക്കാറ്റ് ആന്ധ്രാപ്രദേശിൽ കരയിലേക്ക് വീശിയടിക്കുമെന്നാണ് കണക്കാക്കുന്നത്.
ചുഴലിക്കാറ്റിന്റെ സഞ്ചാരപാത
ഒക്ടോബർ 28-ന് വൈകുന്നേരത്തിനും രാത്രിക്കും ഇടയിൽ ആന്ധ്രാപ്രദേശിലെ മച്ചിലിപട്ടണത്തിനും കലിംഗപട്ടണത്തിനും ഇടയിലുള്ള തീരത്തുകൂടി ചുഴലിക്കാറ്റ് കരയിലേക്ക് പ്രവേശിക്കാൻ സാധ്യതയുണ്ട്. കാറ്റിന്റെ വേഗം മണിക്കൂറിൽ 90 മുതൽ 100 കിലോമീറ്റർ വരെയാകാം. ഇത് തീവ്ര ചുഴലിക്കാറ്റായി മാറാൻ സാധ്യതയുണ്ട്.
ഒഡിഷയിൽ ശക്തമായ തയ്യാറെടുപ്പുകൾ
ചുഴലിക്കാറ്റ് ഒഡിഷയെ നേരിട്ട് ബാധിക്കില്ലെങ്കിലും, ഒക്ടോബർ 30 വരെ സംസ്ഥാനത്ത് കനത്ത മഴയ്ക്ക് സാധ്യതയുണ്ട്.
അതേസമയം , ഒക്ടോബർ 27, 28, 29 തീയതികളിൽ കാലഹണ്ടി, ഗജപതി ജില്ലകളിലെ സർക്കാർ ജീവനക്കാരുടെ അവധി റദ്ദാക്കി.
വിനോദസഞ്ചാരികളുടെ സുരക്ഷ ഉറപ്പാക്കാൻ പുരി ബീച്ചിൽ ഇറങ്ങുന്നതിന് നിരോധനമുണ്ട്. ഞായറാഴ്ച മുതൽ മത്സ്യത്തൊഴിലാളികൾ കടലിൽ പോകരുത്.റവന്യൂ മന്ത്രി സുരേഷ് പൂജാരിയുടെ ടൂർ പ്രോഗ്രാം റദ്ദാക്കുകയും അദ്ദേഹത്തിൻ്റെ ഓഫീസ് കൺട്രോൾ റൂമാക്കി മാറ്റുകയും ചെയ്തു. ഒക്ടോബർ 27 മുതൽ 29 വരെ തീരദേശ, തെക്കൻ ഒഡിഷയിൽ കനത്ത മഴ പ്രതീക്ഷിക്കുന്നു. മാൽക്കൻഗിരി, കോരാപുട്ട്, നവരങ്പുർ, റായ്ഗഡ്, ഗജപതി എന്നീ ജില്ലകളെയാണ് ഇത് കൂടുതൽ ബാധിക്കുക.
തമിഴ്നാട്ടിലും പശ്ചിമ ബംഗാളിലും മഴ മുന്നറിയിപ്പ്
ചെന്നൈ കാലാവസ്ഥാ കേന്ദ്രത്തിൻ്റെ അറിയിപ്പ് പ്രകാരം, ചുഴലിക്കാറ്റ് തിരുവള്ളൂർ, ചെന്നൈ, റാണിപേട്ട്, കാഞ്ചീപുരം, ചെങ്കൽപ്പട്ട്, വിലുപുരം ജില്ലകളിൽ കനത്ത മഴയ്ക്ക് കാരണമാകും. ഈ കാലയളവിൽ ഇടിമിന്നലിനും സാധ്യതയുണ്ട്.
പശ്ചിമ ബംഗാളിൽ ഒക്ടോബർ 27 മുതൽ തെക്കൻ ജില്ലകളിൽ നേരിയ മഴ പ്രതീക്ഷിക്കുന്നു. ഒക്ടോബർ 28-നും 29-നും സൗത്ത് 24 പർഗാനാസ്, ഈസ്റ്റ് മിഡ്‌നാപൂർ, കൊൽക്കത്ത, ഹൗറ തുടങ്ങിയ ജില്ലകളിൽ കനത്ത മഴക്കും ഇടിമിന്നലിനും സാധ്യതയുണ്ട്.
തമിഴ്‌നാട്, ആന്ധ്രാപ്രദേശ് തീരപ്രദേശങ്ങളിലെ മത്സ്യത്തൊഴിലാളികൾ കടലിൽ പോകരുതെന്ന് കർശന മുന്നറിയിപ്പ് നൽകിയിട്ടുണ്ട്.