ചെന്നൈ: ഡിറ്റ്‌വാ ചുഴലിക്കാറ്റിനെ തുടർന്നുള്ള തീവ്രമഴയിലും വെള്ളപ്പൊക്കത്തിലും ശ്രീലങ്കയിൽ വ്യാപക നാശനഷ്ടം. മരണം 100 കടന്നുവെന്നാണ് പുറത്തുവരുന്ന റിപ്പോർട്ടുകൾ. ഏകദേശം രണ്ട് ലക്ഷം പേർ ദുരിതമനുഭവിക്കുന്നുണ്ടെന്നാണ് സർക്കാർ കണക്ക്. ഡിറ്റ്‌വാ ശ്രീലങ്കയിൽ നാശം വിതച്ച് ഇന്ത്യൻ തീരത്തേക്ക് നീങ്ങുമ്പോൾ, ചുഴലിക്കാറ്റിന്റെ ഇഷ്ടമാസം എന്നറിയപ്പെടുന്ന നവംബറിലെ ഓഖി ദുരന്തം (2017) വീണ്ടും ഓർമ്മിപ്പിക്കുകയാണ്.(Cyclone Ditwah, Sri Lanka, India and November)
ഓഖി ദുരന്തം സംഭവിച്ച നവംബർ 29-ന് പിന്നാലെ നവംബർ 30-നാണ് ഡിറ്റ്‌വാ ചുഴലിക്കാറ്റ് ഇന്ത്യൻ തീരം തൊടുമെന്ന് അറിയിച്ചിരിക്കുന്നത്. ശ്രീലങ്കയിലെ 25 ജില്ലകളിൽ ഇരുപതിലും ജനജീവിതം നിശ്ചലമായി. മണ്ണിടിച്ചിലിലും പ്രളയത്തിലും 100 പേർ മരിക്കുകയും 35 പേരെ കാണാതാവുകയും ചെയ്തതായി ഔദ്യോഗിക അറിയിപ്പുണ്ട്. 44,000 പേരെ പ്രളയം നേരിട്ട് ബാധിച്ചു. നിരവധി റോഡുകളും പാലങ്ങളും ഒലിച്ചുപോയി.
വീടുകളുടെ ടെറസുകളിലും മരങ്ങളുടെ മുകളിലും അഭയം തേടിയ പലരെയും വ്യോമസേനയുടെ ഹെലികോപ്റ്ററുകൾ ഉപയോഗിച്ച് രക്ഷപ്പെടുത്തി. രാജ്യത്ത് രാവിലെ 6 മണി മുതൽ ട്രെയിൻ ഗതാഗതം നിർത്തിവച്ചിരിക്കുകയാണ്. ലങ്കൻ നാവികസേനയുടെ ക്ഷണപ്രകാരം ബുധനാഴ്ച കൊളംബോ തീരത്തെത്തിയ ഇന്ത്യയുടെ വിമാനവാഹിനിക്കപ്പലായ ഐ.എൻ.എസ്. വിക്രാന്ത് രക്ഷാദൗത്യത്തിന്റെ ഭാഗമായി. 'ഓപ്പറേഷൻ സാഗർ ബന്ധുവി'ന്റെ ഭാഗമായി ഇന്ത്യ കൂടുതൽ സഹായം ഇന്ന് കൈമാറും.
കൊളംബോ വിമാനത്താവളത്തിലേക്കുള്ള പല വിമാനങ്ങളും തിരുവനന്തപുരത്തേക്കോ കൊച്ചിയിലേക്കോ തിരിച്ചുവിടാൻ ലങ്കൻ സർക്കാർ അഭ്യർത്ഥിച്ചു. തെക്കുപടിഞ്ഞാറൻ ബംഗാൾ ഉൾക്കടലിൽ സ്ഥിതി ചെയ്യുന്ന ഡിറ്റ്‌വാ ചുഴലിക്കാറ്റ് വടക്ക്–വടക്കുപടിഞ്ഞാറ് ദിശയിൽ സഞ്ചരിച്ച് നവംബർ 30 രാവിലെയോടെ വടക്കൻ തമിഴ്‌നാട്–പുതുച്ചേരി, തെക്കൻ ആന്ധ്രാപ്രദേശ് തീരത്തേക്ക് നീങ്ങാൻ സാധ്യതയുണ്ട്.
ഡിറ്റ്‌വായുടെ സ്വാധീനത്തിൽ തമിഴ്‌നാട്ടിലെ തെക്കൻ ജില്ലകളിലും പുതുച്ചേരിയിലും അടുത്ത മൂന്ന് ദിവസം മഴ കനക്കുമെന്നാണ് മുന്നറിയിപ്പ്. കിഴക്കൻ തമിഴ്‌നാട്ടിലെ തീരദേശ ജില്ലകളിൽ ഇന്ന് റെഡ് അലർട്ട് പ്രഖ്യാപിച്ചു. മുൻകരുതലിന്റെ ഭാഗമായി ചെന്നൈയിലെ മൂന്ന് ജലസംഭരണികളിൽ നിന്ന് സെക്കൻഡിൽ 200 ഘനയടി വീതം വെള്ളം തുറന്നുവിട്ടിട്ടുണ്ട്. എൻ.ഡി.ആർ.എഫ്., എസ്.ഡി.ആർ.എഫ്. സംഘങ്ങളെ വിവിധ ജില്ലകളിൽ വിന്യസിച്ചു.
കള്ളക്കടൽ പ്രതിഭാസത്തിന്റെ ഭാഗമായി ഇന്ന് (നവംബർ 29) രാത്രി 11.30 വരെ കേരള തീരത്ത് കടലാക്രമണത്തിനും കള്ളക്കടലിനും സാധ്യതയുണ്ട്. മുന്നറിയിപ്പ് പിൻവലിക്കുന്നത് വരെ തമിഴ്‌നാട്, പുതുച്ചേരി, ആന്ധ്ര, കേരളം, ലക്ഷദ്വീപ് തീരങ്ങളിൽ മത്സ്യബന്ധനം പൂർണ്ണമായി നിരോധിച്ചിരിക്കുകയാണ്. കടൽക്ഷോഭം രൂക്ഷമാകാൻ സാധ്യതയുള്ളതിനാൽ അപകട മേഖലകളിൽനിന്ന് അധികൃതരുടെ നിർദേശാനുസരണം മാറി താമസിക്കണം. ബീച്ചുകൾ കേന്ദ്രീകരിച്ചുള്ള വിനോദസഞ്ചാരമുൾപ്പെടെയുള്ള എല്ലാ പ്രവർത്തനങ്ങളും പൂർണ്ണമായി ഒഴിവാക്കണമെന്നും നിർദേശമുണ്ട്.
2017 നവംബർ 29-ലെ ഓഖി ദുരന്തമാണ് ഡിറ്റ്‌വാ ചുഴലിക്കാറ്റ് ഓർമിപ്പിക്കുന്നത്. കേരളതീരം ഒരു സുരക്ഷിത തീരമാണ് എന്ന ധാരണയെ തകിടംമറിച്ചുകൊണ്ട് അപ്രതീക്ഷിതമായി ഗതിമാറി വന്ന ഓഖി, രക്ഷാപ്രവർത്തനത്തെ ദുഷ്കരമാക്കുകയും സംസ്ഥാനത്ത് 143 മത്സ്യത്തൊഴിലാളികളുടെ ജീവൻ അപഹരിക്കുകയും ചെയ്തു. ആവശ്യമായ മുന്നറിയിപ്പുകൾ യഥാസമയം ലഭിക്കാതെ പോയതും ദുരന്തനിവാരണ സംവിധാനങ്ങളുടെ പരിമിതികളുമാണ് അന്ന് കനത്ത നാശങ്ങൾക്ക് കാരണമായത്. എത്രത്തോളം മുന്നൊരുക്കങ്ങൾ നടത്തുന്നുവോ അത്രത്തോളം നാശനഷ്ടങ്ങളും മരണങ്ങളും കുറയ്ക്കാൻ സാധിക്കുമെന്നാണ് ചുഴലിക്കാറ്റുകൾ നൽകുന്ന പ്രധാന പാഠം.
ഇന്ത്യയിൽ ചുഴലിക്കാറ്റുകൾക്കെതിരായ പ്രതിരോധ നടപടികൾ ഫലപ്രദമായി നടപ്പാക്കി മറ്റ് സംസ്ഥാനങ്ങൾക്ക് ഒഡീഷ മാതൃകയാണ്. മുന്നൊരുക്കങ്ങൾ, കൃത്യമായ ഒഴിപ്പിക്കൽ, ദുരന്ത നിവാരണ സേനയുടെ ഏകോപനം എന്നിവ വഴി വൻ നാശനഷ്ടങ്ങൾ ഒഡീഷ ഒഴിവാക്കിയിരുന്നു. ഈ മാതൃക മറ്റ് സംസ്ഥാനങ്ങളും പിന്തുടരേണ്ടതുണ്ട്.