ചെന്നൈ: 'ഡിറ്റ് വാ' ചുഴലിക്കാറ്റിന്റെ സ്വാധീനം ഇന്ത്യൻ തീരത്തേക്ക് അടുക്കുകയാണ്. തമിഴ്‌നാട്ടിലെ തീരദേശ ജില്ലകളിൽ കനത്ത മഴ തുടരുന്നു. സംസ്ഥാനത്ത് രണ്ട് ജില്ലകളിൽ റെഡ് അലർട്ടും ചെന്നൈ ഉൾപ്പെടെ ഏഴ് ജില്ലകളിൽ ഓറഞ്ച് അലർട്ടും പ്രഖ്യാപിച്ചു. ചെന്നൈയിൽ നിന്നുള്ള 47 വിമാന സർവീസുകൾ റദ്ദാക്കി.(Cyclone Ditwah, Heavy rains in Tamil Nadu, red alert)
നാഗപട്ടണം, മയിലാടുതുറൈ പ്രദേശങ്ങളിൽ വ്യാപകമായ കൃഷിനാശമുണ്ടായി. തൂത്തുക്കുടി വിമാനത്താവളത്തിന്റെ റൺവേയിൽ വെള്ളം കയറി. ഏത് സാഹചര്യത്തെയും നേരിടാൻ എസ്.ഡി.ആർ.എഫ്., എൻ.ഡി.ആർ.എഫ്. ടീമുകൾ സജ്ജമാണ്. 'ഡിറ്റ് വാ'യുടെ പ്രഭാവത്തിൽ കടൽ അതീവ പ്രക്ഷുബ്ധമാണ്. മത്സ്യബന്ധന ബോട്ടുകൾക്ക് വ്യാപകമായി കേടുപാടുകൾ സംഭവിച്ചു. കടുത്ത കടൽക്ഷോഭത്തിൽ സമീപത്തെ റോഡുകളുടെ ചില ഭാഗങ്ങളും തകർന്നു.
ഞായറാഴ്ച രാവിലെയോടെ ചുഴലിക്കാറ്റ് തീരത്തുനിന്ന് ഏകദേശം 50 കിലോമീറ്ററും വൈകുന്നേരത്തോടെ 25 കിലോമീറ്ററും അകലെയായിരിക്കും എത്തുക. അതേസമയം, പുതുച്ചേരി തീരത്തോട് അടുക്കുമ്പോഴേക്കും 'ഡിറ്റ് വാ' ന്യൂനമർദമായി ദുർബലമായേക്കുമെന്നാണ് പ്രവചനം. വൈകുന്നേരത്തോടെ ചെന്നൈ തീരത്തുനിന്ന് 25 കിലോമീറ്റർ അകലെ കൂടി കടന്നുപോകും.
ആന്ധ്രാപ്രദേശ്, പുതുച്ചേരി എന്നിവിടങ്ങളിലും അതിതീവ്ര മഴയ്ക്ക് സാധ്യതയുണ്ടെന്ന് ഇന്ത്യൻ കാലാവസ്ഥാ വകുപ്പ് അറിയിച്ചിട്ടുണ്ട്. 'ഡിറ്റ് വാ' ചുഴലിക്കാറ്റ് ശ്രീലങ്കയിൽ വലിയ നാശനഷ്ടങ്ങളാണ് ഉണ്ടാക്കിയത്. ശ്രീലങ്കയിൽ മരണസംഖ്യ 200 കടന്നു. 774,000 പേരെ പ്രളയം ബാധിച്ചു. 700-ൽ അധികം വീടുകൾ തകർന്നു. 100,000 പേരെ 798 ദുരിതാശ്വാസ ക്യാമ്പുകളിലേക്ക് മാറ്റിപ്പാർപ്പിച്ചു.
കനത്ത നാശനഷ്ടങ്ങളെ തുടർന്ന് ശ്രീലങ്കയിൽ ഭരണകൂടം അടിയന്തരാവസ്ഥ പ്രഖ്യാപിച്ചു. ഡിസംബർ 16 വരെ സ്കൂളുകൾ അടച്ചിടും. കൊളംബോ തുറമുഖം താത്കാലികമായി അടച്ചിരിക്കുകയാണ്. പ്രളയക്കെടുതിയിൽ വലയുന്ന ശ്രീലങ്കയ്ക്ക് ഇന്ത്യ സഹായഹസ്തം നീട്ടി. ഇന്ത്യൻ നാവികസേനയുടെ ഹെലികോപ്റ്ററുകൾ ഉപയോഗിച്ച് വിവിധ ഇടങ്ങളിൽ കുടുങ്ങിയ നിരവധി പേരെ രക്ഷപ്പെടുത്തി. വിമാനവാഹിനിക്കപ്പലായ ഐ.എൻ.എസ്. വിക്രാന്തിൽ നിന്നുള്ള ഹെലികോപ്റ്ററുകൾ ഉൾപ്പെടെ രക്ഷാപ്രവർത്തനങ്ങളിൽ സജീവമാണ്. കൊളംബോയിൽ കുടുങ്ങിയ ഇന്ത്യക്കാർക്കായി ഇന്ത്യൻ ഹൈക്കമ്മീഷൻ പ്രത്യേക വിമാനങ്ങളും ക്രമീകരിച്ചിട്ടുണ്ട്. മഴ കുറയുന്നതോടെ രക്ഷാപ്രവർത്തനം കൂടുതൽ ഊർജിതമാക്കാനാകുമെന്ന പ്രതീക്ഷയിലാണ് ശ്രീലങ്കൻ അധികൃതർ.